وڭتۇستىك كورەيا ەلشىسى كۋ حونگ-سوك: قازاقستان – مۇمكىندىكتەر ەلى
كورەياداعى مەديتسينالىق تۋريزمنىڭ قۇپياسى نەدە؟ كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كۋ حونگ-سوك قازاقپاراتقا بەرگەن سۇحباتىندا وسى ساۋالدار توڭىرەگىندە اڭگىمە ءوربىتتى.
- كۋ حونگ-سوك مىرزا، ءسىز كورەيا رەسپۋبليكاسىنىڭ ەلشىسى قىزمەتىندە ءبىر جىلعا جۋىق ۋاقىت بولدىڭىز. وڭتۇستىك كورەيا قازاقستانمەن ىنتىماقتاستىقتىڭ قانداي جاڭا باعىتتارىن دامىتۋى مۇمكىن؟
- ءيا، راسىمەن دە وسىناۋ تاڭعاجايىپ ەلدە جۇمىس ىستەپ جۇرگەنىمە ءبىر جىل بولىپتى. وسى ۋاقىت ىشىندە اراداعى ىنتىماقتى نىعايتۋعا ۇلەس قوسا الاتىنىما سەنىم ۇيالادى. ءبىز ەكىجاقتى قارىم-قاتىناستى تەرەڭدەتەمىز. قالىپتاسقان جاعدايعا بايلانىستى ءتورت باعىت بويىنشا ماقساتقا قول جەتكىزە الار ەدىك دەپ ويلايمىن. ەڭ الدىمەن، دەنساۋلىق ساقتاۋ سالاسىنداعى ىنتىماقتى تەرەڭدەتۋگە بولادى.
ءبىز پاندەميامەن بايلانىستى قيىن جاعدايدى باستان وتكەرىپ جاتىرمىز. الماتىدا جۇمىس ىستەيتىن Medical Partners Korean Cliniс پاندەميامەن كۇرەس كەزىندە پ ت ر-تەستى وتكىزۋگە ەلەۋلى ۇلەس قوستى. قازاقستان پرەزيدەنتى قاسىم-جومارت توقايەۆ بۇل ورتالىققا وتكەن جىلدىڭ مامىر ايىندا باس سۇققان بولاتىن. ىنتىماقتاستىقتى تەرەڭدەتۋ ءۇشىن اۋرۋحانالار سالۋ، مەديتسينالىق قىزمەتكەرلەردى تارتۋ ارقىلى تاجىريبە الماسۋ جوبالارىن ىسكە اسىرۋعا مۇمكىندىك مول.
ەكىنشى باعىت – مۇناي-گاز سالاسىن دامىتۋ. ءسوزسىز، قازاقستان – كورەيا ءۇشىن مۇناي مەن گاز ەكسپورتتايتىن نەگىزگى ەلدەردىڭ ءبىرى. قازاقستان ۇكىمەتى مۇناي-گاز سالاسىن بەلسەندى دامىتۋدا. مەن قازاقستاننىڭ باسقا دا باعىتتاردى، مىسالى، حيميا، مۇناي-حيميا ونەركاسىبىن دامىتىپ جاتقانىن بىلەمىن. وڭتۇستىك كورەيا قازاقستان ءۇشىن مۇناي مەن گاز بويىنشا يمپورتتاۋشى ەلدەردىڭ ءبىرى بولىپ قالا بەرمەك.
كورەيا ۇكىمەتى مەن كورەيالىق كومپانيالار قايتا وڭدەۋ سالاسىن ىلگەرىلەتۋگە ءوز ۇلەستەرىن قوسقىسى كەلەدى. ءوز كەزەگىندە مەن وسى سالادا جۇمىس ىستەيتىن كورەيالىق كومپانيالاردى قازاقستاندا جۇمىس ىستەۋگە شاقىرامىن. ۇشىنشىدەن، ەنەرگەتيكا سالاسىنداعى، اسىرەسە، بالامالى جانە جاڭارتىلاتىن ەنەرگيا كوزدەرى بويىنشا جاڭا باعىتتارعا قاتىستى ىنتىماقتاستىقتى اتاۋعا بولادى. بۇل بولىكتە كورەيا ءوزىنىڭ وزىق تەحنولوگيالارىمەن تانىمال. ءبىز وڭتۇستىك-شىعىس ازيا ەلدەرىندە، ءتىپتى امەريكا قۇرلىعىندا وسى باعىتتا ۇلكەن ۇلەس قوسقانىمىزدى ايتقىم كەلەدى. كورەيا مەن قازاقستان ەنەرگەتيكانىڭ ءداستۇرلى سەكتورلارىندا جاقسى بايلانىس ورناتىپ جاتىر.
قازىر ءبىزدىڭ ەلدىڭ ۇكىمەتى تومەن كومىرتەكتى ەنەرگياعا نەگىزدەلگەن جاڭا ەكولوگيالىق ساياساتپەن جۇمىس ىستەۋدە. قازاقستان ۇكىمەتى دە «جاسىل» ەكونوميكا ساياساتىمەن جۇمىس ىستەۋدە. كورەيا - ەنەرگيانىڭ كوپ بولىگىن اتوم ەلەكتر ستانسيالارى ارقىلى جەتكىزەتىن ەلدەردىڭ ءبىرى ەكەنىن اتاپ وتكىم كەلەدى. اەس-تەردەگى قاۋىپسىزدىكتى قاتاڭ باقىلايدى. كورەيانىڭ بۇل باعىتتا ەكسپورتتىق الەۋەتىن ارتتىرىپ جاتىر. مىسالى، بىرىككەن اراب امىرلىكتەرىندە اتوم ەلەكتر ستانسيالارىن سالدى. قازاقستان ۇكىمەتىنىڭ مۇمكىندىكتەرى بولسا، سونداي-اق ازاماتتاردىڭ وزدەرى اتوم ەلەكتر ستانسياسىن سالۋ تۋرالى ويلانسا، كورەيا سەرىكتەس بولۋعا دايىن.
قازىردىڭ وزىندە قازاقستان كورەياعا رەنييدىڭ ۇلكەن كولەمىن ەكسپورتتايدى. سونىمەن قاتار، مەن اەس قۇرىلىسىنا قاتىستى قازاقستاندىقتاردىڭ كەيبىر قورقىنىشتارىن تولىق تۇسىنەمىن جانە قاۋىپسىزدىك بارىنەن جوعارى ەكەنىن قايتالايمىن. ەگەر قازاقستان ءبىر كەزدەرى ەلەكتر ستانسياسىن سالۋدى شەشسە، جوعارىدا ايتىپ وتكەندەي، ءبىزدىڭ تاراپ وسى ماسەلە اياسىندا ىنتىماقتاسۋعا دايىن.
تورتىنشىدەن، اقپاراتتىق-كوممۋنيكاتسيالىق تەحنولوگيالار سالاسىنداعى ىنتىماقتاستىقتىڭ الەۋەتى زور. بولاشاقتا اقپاراتتىق تەحنولوگيالار ماڭىزدى بولادى دەپ ويلايمىن. كورەيا – وسى سالاداعى ەڭ وزىق ەلدەردىڭ ءبىرى. جاقىندا كورەيا ۇكىمەتى جاڭا تسيفرلىق كەلىسىمدى باستادى، ونىڭ اياسىندا كورەيا اقپاراتتىق-كوممۋنيكاتسيالىق تەحنولوگيالار سالاسىندا ودان ءارى وركەندەۋدى جوسپارلاپ وتىر.
قازاقستان ۇكىمەتىنىڭ «سيفرلىق قازاقستان» باعدارلاماسى شەڭبەرىندەگى ۇزاق مەرزىمدى ماقساتتارى دا بار. بۇل ماسەلەدە ەكى ەلدىڭ ماقساتتارى وتە ۇقساس. اقپاراتتىق-كوممۋنيكاتسيالىق تەحنولوگيالار سالاسى ءبىزدىڭ ىنتىماقتاستىعىمىزدىڭ ەڭ پەرسپەكتيۆالى باعىتتارىنىڭ ءبىرى بولا الار ەدى. وسى ءتورت باعىت ءبىزدىڭ ىنتىماقتاستىعىمىزعا ەرەكشە نازار اۋدارتادى.
«كەڭەيتۋ جانە ءارتاراپتاندىرۋ» – ءبىزدىڭ ىنتىماقتاستىعىمىزدى وسىلاي اتاعىم كەلەدى. ەكى ەلدىڭ ەكونوميكاسى ءوزارا ءتيىمدى ارەكەتتەسە وتىرىپ دامي الادى.
- بۇگىنگى تاڭدا قازاقستاندا قانشا كورەي كومپانياسى جۇمىس ىستەيدى، ولار قانداي قىزمەت تۇرىمەن جانە قانداي جاڭا جوبالارمەن اينالىسىپ ءجۇر؟
- ءبىزدىڭ ۇكىمەتتىڭ ستاتيستيكاسى بويىنشا، قازاقستاندا 300-دەن استام كورەي كومپانياسى ءوز بيزنەسىن جۇرگىزۋدە. مەن مۇندا كورەي اۆتوموبيلدەرى مەن ەلەكترونيكا سالاسىنداعى كومپانيالار كەڭ تارالعانىن كورىپ ءجۇرمىن. مىسالى، Highvill, SK Engineering & Construction Co, Ltd جانە ت.ب. ءىرى كومپانيالار عانا ەمەس، شاعىن جانە ورتا كومپانيالار دا قازاقستاندا بيزنەستى ينۆەستيتسيالاۋعا جانە جۇرگىزۋگە وتە مۇددەلى.
قازاقستان ۇكىمەتىنىڭ مالىمەتىنشە، ەلدەگى كورەيالىق ينۆەستيتسيالاردىڭ قۇنى 8 ميلليارد دوللارعا باعالانىپ وتىر. ءبىز ءۇشىن، قازاقستان ورتالىق ازياداعى ەڭ ءىرى ينۆەستيتسيالىق باعىتتاردىڭ ءبىرى ەكەنى ءسوزسىز. مەن اۆتوموبيل جانە ەلەكترونيكا سالاسىندا جۇمىس ىستەيتىن كومپانيالار تۋرالى ايتتىم. قۇرىلىستا ماماندانعان كومپانيالارى جۇمىس ىستەپ ءجۇر. ونىڭ ءبىرى الماتىدا اۆتوماگيسترال سالىپ جاتىر.
قازاقستاندىقتار كورەي تاعامدارىن دا جاقسى كورەدى. سۋپەرماركەتتەردە lotte ونىمدەرىن تابا الاسىز. قازاقستاندا كوپشىلىك كورەي كوسمەتيكاسىن قولدانعاندى ۇناتاتىنىن بىلەمىن. كورەيالىق كومپانيالار قازاقستان نارىعىنا قىزىعۋشىلىق تانىتۋى كوڭىل قۋانتادى.
- كوروناۆيرۋس پاندەمياسى قازاقستان مەن كورەيا اراسىنداعى تاۋار اينالىمىنا قالاي اسەر ەتتى؟
- باسقا ەلدەرمەن سالىستىرعاندا قازاقستان مەن كورەيانىڭ ساۋدا اينالىمى جوعارى بولىپ قالاتىنى ءسوزسىز. قازاقستان ۇكىمەتى ۇسىنعان ستاتيستيكالىق دەرەكتەر بويىنشا، 2019 جىلى ەكىجاقتى ساۋدا كولەمى 6،5 ميلليارد ا ق ش دوللارىن قۇراعان. 2020 جىلى تاۋار اينالىمى 5،9 ميلليارد دوللارعا دەيىن تومەندەدى. بۇل 2019 جىلمەن سالىستىرعاندا شامامەن 10 پايىز از. وسىلايشا، ەكى ەل اراسىنداعى ساۋدا كولەمى 10 پايىزعا تومەندەگەن. بۇل ەكى ەلدىڭ ىنتىماقتاستىعى ءبىرقالىپتى جولعا قويىلعانىن كورسەتەدى.
جوعارىدا ايتقانىمداي، قازاقستان ءبىز ءۇشىن ەڭ ءىرى ساۋدا جانە ينۆەستيتسيالىق ارىپتەس بولىپ سانالادى. ال كورەيا – قازاقستان ءۇشىن ءتورتىنشى ساۋدا سەرىكتەسى. كوروناۆيرۋس جويىلعاننان كەيىن ەكى ەلدىڭ قارىم-قاتىناسى ايتارلىقتاي ىلگەرىلەۋى كەرەك. ءبىز ەكى ەل ازاماتتارىنىڭ اراسىنداعى قارىم-قاتىناستى دامىتۋ ءۇشىن قولدان كەلگەننىڭ ءبارىن جاسايمىز. ادامدار ارادا ەركىن ءجۇرىپ-تۇرۋى كەرەك. بايلانىسسىز كەزدەسۋلەر ءالى دە ءتيىمدى، بىراق مەن ىسكەرلىك كەزدەسۋلەر مەن كەڭەستەردى كوبىرەك كورگىم كەلەدى. بىزگە پروگرەسس كەرەك، سول ءۇشىن بىزگە ءورشىل ماقساتتار قويۋ قاجەت.
- كورەياعا بارىپ جاتقان قازاقستاندىقتاردىڭ سانى بەلگىلى مە؟ پاندەمياعا بايلانىستى ۆيزالارسانى ازايعان جوق پا؟
- 2019 جىلى وڭتۇستىك كورەياعا 50 مىڭنان استام قازاقستاندىق بارعان. كوروناۆيرۋسقا بايلانىستى ءبىزدىڭ ەلگە كەلگەن ازاماتتاردىڭ سانى 10 مىڭعا دەيىن ازايدى. پاندەميامەن كۇرەس ەكى ەلدىڭ باستى باسىمدىقتارىنىڭ ءبىرى بولىپ قالا بەرەدى. ەستەرىڭىزگە سالا كەتەيىن، كورەيا ۇكىمەتى قازاقستان مەن وڭتۇستىك كورەيا اراسىنداعى اۋە قاتىناسىن جاپقان جوق. الەمدەگى ەلدەردىڭ كوبى قالىپتى ومىرگە كوشىپ جاتىر دەۋگە بولادى. وسىنى كورىپ كورەيا مەن قازاقستان اۋە رەيستەرىنىڭ سانىن جاڭارتا الادى دەپ ۇمىتتەنۋگە بولاتىن سياقتى. وڭتۇستىك كورەياعا ساپارلايتىن قازاقستاندىقتاردىڭ سانى بولاشاقتا ارتادى دەپ سەنەمىن.
- تۋريزمدى، سونىڭ ىشىندە ەكى ەل اراسىندا مەديتسينالىق تۋريزمدى دامىتۋ تۋرالى نە ايتا الاسىز؟
- قازاقستانعا كەلەر الدىندا قازاقستاننىڭ وڭتۇستىك كورەياعا مەديتسينالىق ماقساتتا تۋريستەردى جىبەرەتىن ءىرى ەلدەردىڭ ءبىرى ەكەنىن ءبىلۋ مەن ءۇشىن قىزىقتى فاكت بولعان ەدى. كورەيا الەمدىك دەڭگەيدەگى مەديتسينالىق داعدىلاردى دامىتۋدا. مەن قازاقستاندىقتاردىڭ كورەيالىق مەديتسينا ورتالىقتارىنا نە ءۇشىن قاپتاپ كەلىپ جاتقانىن سۇرادىم. كوبى تۇتاس تەكسەرۋدەن ءوتۋ ءۇشىن نەمەسە وتا جاساتۋ ءۇشىن بارادى ەكەن. اراداعى بايلانىستىڭ دۇرىس جولعا قويىلعانى جانە 7 ساعاتتىق تىكەلەي اۋە رەيسىنىڭ بولۋى قازاقستاندىقتاردىڭ ءبىزدىڭ ەلگە مەديتسينالىق تۋريزم اياسىندا ساياحات جاساۋىنا جول اشىپ وتىر.
قازاقستاندا اۋرۋحانالار سالۋ ەسەبىنەن كورەي مەديتسيناسىنىڭ كوبىرەك ورنىعۋىن، سونداي-اق قازاقستاندىق ەمدەلۋشىلەردىڭ بىزدەگى بىلىكتى مەديتسينالىق جابدىقتارعا كەڭىنەن قول جەتكىزگەنىن قالايمىن. سونداي-اق، قازاقستاندىق مامانداردىڭ كورەي مەديتسينالىق ورتالىقتارىندا ءبىلىمىن جەتىلدىرۋىنە بولاتىنىن ايتا كەتۋ كەرەك.
- ال وڭتۇستىك كورەيانىڭ وزىندە قازىر ەپيدەميولوگيالىق جاعداي قانداي؟ كوروناۆيرۋسپەن كۇرەستە وزگە ەلدەرگە قالاي كومەكتەسىپ جاتىرسىزدار؟
- وڭتۇستىك كورەيا پاندەميادان زارداپ شەككەن العاشقى ەلدەردىڭ ءبىرى بولدى. بىراق ءبىزدىڭ ەل پاندەميامەن ءتيىمدى كۇرەسكەن ەلدەردىڭ ءبىرى. كورەيا ۇكىمەتىنە پاندەميا جاعدايىن ءتيىمدى باسقارۋ جۇكتەلدى. بىرىنشىدەن، ءبىزدىڭ ۇكىمەت ءوز تاجىريبەسىن باسقا ەلدەرمەن بولىسۋگە شەشىم قابىلدادى.
ەكىنشىدەن، ءبىز مۇقتاج ەلدەرگە گۋمانيتارلىق كومەك كورسەتىپ كەلەمىز. بىلتىر ەكى ەل ۇكىمەتتەرى مەن دۇنيەجۇزىلىك دەنساۋلىق ساقتاۋ ۇيىمىنىڭ ۇشجاقتى ىنتىماقتاستىعىنىڭ ارقاسىندا كورەيا ۇكىمەتىنەن قازاقستانعا 800 مىڭ دوللاردىڭ گۋمانيتارلىق كومەگى جەتكىزىلدى. ءبىز پ ت ر-تەست جيىنتىقتارىن، ماسكا، مەديتسينالىق جيىنتىقتار ۇسىندىق. گۋمانيتارلىق كومەك كورسەتكەن كەزدە قازاقستاننىڭ دەنساۋلىق ساقتاۋ ءمينيسترى ءتيىمدى ارەكەت ەتكەنىن ايتۋ كەرەك. قازىر كوروناۆيرۋس ءورشىپ تۇرعان ۇندىستانعا گۋمانيتارلىق كومەكتى كوبەيتۋدى جوسپارلاپ وتىرمىز.
- كورەيا كوروناۆيرۋسقا قارسى ءوز ۆاكسيناسىن شىعاردى ما؟ ءوزىڭىز ۆاكسينا الىپ ۇلگەردىڭىز بە؟
- قازاقستان ۇكىمەتىنە ريزاشىلىعىمدى بىلدىرگىم كەلەدى، قابىلدانعان شارالاردىڭ ارقاسىندا مەن تولىقتاي ۆاكسينا الدىم. مەن عانا ەمەس، مەنىڭ ارىپتەستەرىم دە، ەلشىلىك قىزمەتكەرلەرىنىڭ كوپشىلىگى دە ۆاكسينا الدى. مۇندا تۇراتىن كورەي قاۋىمداستىعىنىڭ كوپتەگەن وكىلدەرى بۇل ۇسىنىسقا ريزا. جەكە ءوزىم ۆاكسيناعا العاشقىلاردىڭ ءبىرى بولىپ ءوتىنىش بەردىم. مەنىڭ ماقساتىم كوروناۆيرۋستىق ۆاكسينانىڭ قانشالىقتى قاۋىپسىز ەكەنىن كورسەتۋ بولدى.
مەن كەيبىر ادامداردى ۆاكسينانىڭ قاۋىپسىزدىگىنە الاڭدايتىنىن تۇسىنەمىن. تولىق ۆاكسينا العان ەلشى رەتىندە ۆاكسيناتسيا قوعامدى الدەقايدا قاۋىپسىز ەتە الاتىنىن اتاپ وتكىم كەلەدى. وڭتۇستىك كورەيادا 50 ميلليوننان استام ادام تۇرادى. ال ەل ۇكىمەتى 100 ميلليون دوزانى قامتىپ قويدى. ۆاكسينانى كورەياداعى شەتەل ازاماتتارىدا ەشبىر كەدەرگىسىز قابىلداي الادى.
ءبىرقاتار كورەيالىق فارماتسەۆتيكالىق كومپانيا وزدەرىنىڭ ۆاكسينالارىن جاساپ جاتىر جانە قازىر كلينيكالىق زەرتتەۋلەر جۇرگىزۋدە. ۇكىمەت وتاندىق ۆاكسينالاردىڭ دامۋىن بەلسەندى قولداپ وتىر. كورەيالىق كومپانيالار كەلەسى جىلعا دەيىن تولىق رۇقسات ەتىلگەن ۆاكسينالاردى جاساي الادى دەپ ۇمىتتەنەمىن.
- قازاقستانداعى ۆاكسينالاۋ ناۋقانىن قالاي باعالار ەدىڭىز؟
- مەن قازاقستان ۇكىمەتىنىڭ ۆاكسينالاۋ باعىتىندا اتقارىپ جاتقان شارۋاسىنا ءتانتىمىن qazvac دەيتىن وتاندىق ۆاكسينا جاساي الدىڭىزدار.
پرەزيدەنت قاسىم-جومارت توقايەۆ ۆاكسينالاردى جەتكىزۋگە باسا ءمان بەرىپ، ازاماتتاردى تەزىرەك ۆاكسينا الۋعا ۇندەپ ءجۇر. مەن ونىڭ ۆاكسينا الۋ قاجەتتىگى تۋرالى يدەياسىن تولىق قولدايمىن. وسى جىلدىڭ سوڭىنا قاراي قازاقستاندىقتار قالىپتى ومىرگە تولىق ورالادى دەپ ۇمىتتەنەمىن. سوندىقتان مەن قازاقستان ۇكىمەتى مەن حالقى جاقىن ارادا بۇل جاعدايدان شىعاتىنىنا تولىق سەنىمدىمىن.
- وڭتۇستىك كورەيا ءبىزدىڭ ەلىمىزدە جۇرگىزىلىپ جاتقان ساياسي رەفورمانى قالاي باعالايدى جانە قازاقستان وڭتۇستىك كورەيا ءۇشىن نەسىمەن تارتىمدى؟
- 2019 -جىل ەكى ەلدىڭ قارىم-قاتىناسى ءۇشىن ەستە قالارلىق جىل بولدى. وڭتۇستىك كورەيا پرەزيدەنتى مۋن چجە ين قازاقستانعا كەلىپ، ق ر تۇڭعىش پرەزيدەنتى – ەلباسى نۇرسۇلتان نازاربايەۆپەن جانە ەل پرەزيدەنتى قاسىم-جومارت توقايەۆپەن وتە ناتيجەلى كەزدەسۋلەر وتكىزدى. سول كەزدە تاراپتار جاڭا ەكونوميكالىق قاتىناستار ورناتۋعا كەلىسكەن بولاتىن. قازىر ەكى ەلدىڭ ۇكىمەتتەرى قازاقستان پرەزيدەنتى قاسىم-جومارت توقايەۆتىڭ كورەيا رەسپۋبليكاسىنا بولاشاق ساپارىنا قىزۋ دايىندالىپ جاتىر. وسى جىل اراداعى قارىم-قاتىناستى ودان ءارى دامىتۋ ءۇشىن جاقسى مۇمكىندىكتەر اكەلەدى دەپ ۇمىتتەنەمىز.
قازاقستانداعى ساياسي جاعداي تۋرالى ءوز پىكىرىم بار. پرەزيدەنت قاسىم-جومارت توقايەۆتىڭ جۇرگىزگەن رەفورمالارى اسەرلى. مەن ساياسي رەفورمالاردى اشىق ءارى دەموكراتيالىق جولمەن جۇرگىزىپ جاتقان قازاقستان ۇكىمەتىنە شىن مانىندە العىس ايتقىم كەلەدى. مەن قازاقستان دۇرىس جولدا دەپ سانايمىن.
توقايەۆ مىرزا رەفورمالارعا ءوزىنىڭ تەرەڭ پايىمى اياسىندا باسا نازار اۋدارىپ وتىر. قازاقستان رەفورمالارعا داڭعىل جول سالىپ جاتقاندا كورەيا ونى قولداۋ ءۇشىن بار كۇشىن سالادى. مۇنداعى جاستاردىڭ ۇمتىلىسىن كورە وتىرىپ، قازاقستان ۇلكەن مۇمكىندىكتەر ەلى دەپ ايتۋعا بولادى. قازاقستاننىڭ جاستارى وتە ءبىلىمدى جانە اقىلدى. مەن قازاقستاننىڭ مۇمكىندىكتەر ەلى ەكەنىنە نىق سەنەمىن. ساياسي كوشباسشىلارىڭىز بارلىق رەفورمالاردى ورىنداۋ قازاقستاننىڭ بولاشاعىن الدەقايدا جارقىن ەتەتىنىنە سەنىپ وتىر. مەن قازاقستاندا ءبىر جىل تۇرعاندا ەل ىشىندەگى تاتۋلىقتى بايقادىم. قازاقستاندىقتارعا قوناقجايلىق تانىتقانى ءۇشىن العىس ايتقىم كەلەدى.
- ەلشى مىرزا، سۇحباتىڭىزعا راقمەت !