وتكەن جىلى ەلوردا بيۋجەتىنىڭ كىرىسى ارتىعىمەن ورىندالدى

نۇر-سۇلتان. قازاقپارات - وتكەن جىلى نۇر-سۇلتان قالاسىنىڭ بيۋجەت كىرىسى ارتىعىمەن ورىندالدى.

2019-جىلمەن سالىستىرعاندا بيۋدجەتتىڭ جەكە كىرىسى 76 ميلليارد 66,6 ميلليون تەڭگەنى قۇرادى، ياعني تابىس 26,6 پايىزعا وسكەن.

بۇل تۋرالى نۇر-سۇلتان قالاسى قارجى باسقارماسىنىڭ باسشىسى ءالىبي جۇمايەۆ ءمالىم ەتتى، دەپ حابارلايدى قازاقپارات ءتىلشىسى.

«2020-جىلى قالا بيۋدجەتىنە 696 ميلليارد 940 ميلليون تەڭگە قارجى ءتۇستى. ەسەپ بويىنشا جوسپار 35 ميلليارد 899 ميلليون تەڭگەگە ارتىعىمەن ورىندالدى. جەكە كىرىستىڭ جيىنتىق كولەمى 361 ميلليارد 717 ميلليون تەڭگە نەمەسە 11 پايىزدى قۇرايدى. سالىق بويىنشا ءتۇسىم 332 ميلليارد 479 ميلليون تەڭگەنى قۇراسا، ال سالىقتان بولەك ءتۇسىم 11 ميلليارد 796 ميلليون تەڭگەنى قۇراپ، جوسپار ارتىعىمەن ورىندالدى. سونىمەن قاتار ساتۋدان تۇسكەن نەگىزگى كاپيتال كولەمى 17 ميلليارد 440 ميلليون تەڭگە نەمەسە 2 ميلليارد 508 ميلليون تەڭگە قوسىمشا تابىس ءتۇستى. قالا بيۋجەتىنىڭ كىرىسى نەگىزىنەن سالىق ءتۇسىمىنىڭ ەسەبىنەن ارتىعىمەن ورىندالىپ وتىر»، - دەدى ءالىبي جۇمايەۆ ەلوردا ءماسليحاتىنىڭ تۇراقتى كوميسسياسىنىڭ وتىرىسىندا جاساعان بايانداماسىندا.

ودان بولەك، باسقارما باسشىسى وتكەن جىلى ەلوردادا جەكە تابىس سالىعىنىڭ دا ارتىعىمەن ورىندالعانىن تىلگە تيەك ەتتى (122 ميلليارد 404 ميلليون تەڭگە) جانە الەۋمەتتىك سالىقتىڭ جالپى كولەمى 89 ميلليارد 521 ميلليون تەڭگەنى قۇراعانىن ايتىپ ءوتتى.

«سونداي-اق، 2020-جىلى ءبىزدىڭ باسقارما وتاندىق بيرجا قورىندا 93 ميلليارد 578 ميلليون تەڭگە تۇراتىن مەملەكەتتىك باعالى قاعاز شىعارۋدى ۇيىمداستىردى. ونىڭ 49 ميلليارد 548,6 ميلليون تەڭگەسى «نۇرلى جول» مەملەكەتتىك باعدارلاماسىن جۇزەگە اسىرۋ اياسىندا ءۇي سالۋدى قارجىلاندىرۋعا جۇمسالدى. سول سياقتى 44 ميلليارد 30 ميلليون تەڭگە وتكەن جىلى داعدارىسقا قارسى شارا قولدانۋ اياسىندا جول كارتاسىنا قۇيىلدى. ناتيجەسىندە 2020-جىلى 2019-جىلمەن سالىستىرعاندا بيۋجەتتىڭ جەكە كىرىسى 76 ميلليارد 66,6 ميلليون تەڭگەنى قۇرادى، بۇل جەكە كىرىستىڭ 26,6 پايىزعا وسكەنىن كورسەتىپ وتىر»، - دەيدى ول.