نۇر-سۇلتاندا زاڭسىز ورنالاسقان بازاردىڭ ورنىنا قوعامدىق كەڭىستىك سالىنادى
قالا تۇرعىندارىنىڭ جايلىلىعىنا، سونداي-اق الاڭداردىڭ سىرت كورىنىسىن جاقسارتۋعا ەرەكشە نازار اۋدارىلادى، دەپ حابارلايدى ەلوردا اكىمدىگىنىڭ رەسمي سايتى.
ەلوردادا زاڭسىز ساۋدا ورىندارىمەن كۇرەس ءجۇرىپ جاتىر. ەلوردالىق «شاپاعات» كوممۋنالدىق بازارىنىڭ جانىندا زاڭسىز ساۋدا جۇرگىزىلۋدە. جاقىن ماڭداعى ۇيلەردىڭ تۇرعىندارى جەرگىلىكتى اتقارۋشى ورگاندارعا بۇل ماڭايعا شاعىن گۇلزار نەمەسە ساياباق سالۋ تۋرالى ءوتىنىش ءبىلدىردى.
«بازاردىڭ جانىندا تۇرىپ جاتقانىما 7 جىل بولدى. انا رەتىندە ءۇيىمىزدىڭ ماڭىندا بولىپ جاتقان جاعدايعا قاتتى الاڭدايمىن. وسىعان بايلانىستى اكىمدىككە جۇگىندىك. ارينە، جاعدايدىڭ جاقسى جاعىنا قاراي وزگەرگەنىن قالايمىن»، - دەيدى اۋدان تۇرعىنى زارينا يسكازينا.
پوليتسيا اتالعان ساۋدا ورنىنىڭ قىزمەتى جەر جانە كاسىپكەرلىك زاڭىنىڭ تالاپتارىنا ساي كەلمەيتىنىن ءمالىم ەتتى. قۇقىق قورعاۋ ورگاندارىنىڭ ماماندارى تۇراقتى تۇردە ءتۇسىندىرۋ جۇمىستارىن جۇرگىزەدى. ءبىراق ايىپپۇلدىڭ ءجيى سالىنعانىنا قاراماستان ساۋداگەرلەر ساۋداسىن توقتاتار ەمەس. سونىمەن قاتار، اكىمدىك وكىلدەرىمەن كەزدەسۋدە وزدەرىنىڭ تۇيتكىلدى پروبلەمالارى تۋرالى ايتىپ، ساۋدانى وزگە ورىنعا كوشىرۋگە دايىن ەكەندىكتەرىن ءبىلدىردى.
«ەڭ الدىمەن، بۇل بازاردىڭ جۇمىسى جەر جانە كاسىپكەرلىك زاڭىنا قايشى. بۇل جەردە ەشقانداي سانيتارلىق، قاۋىپسىزدىك ەرەجەلەرى ساقتالمايدى. سارىارقا اۋدانى اكىمدىگىنىڭ اتىنا وسى الاڭدا ورنالاسقان ۇيلەردىڭ تۇرعىندارىنان تۇراق ايماعى بار اللەيا اشۋ تۋرالى كوپتەگەن ءوتىنىش تۇسۋدە. قازىرگى ۋاقىتتا ۋربانيستيكا ورتالىعىمەن بىرلەسىپ الاڭنىڭ جوبالىق ەسكيزىن بەكىتۋ جۇمىستارى جۇرگىزىلۋدە. سونداي-اق، اۋداندىق اكىمدىكتىڭ قىزمەتكەرلەرى ساۋداگەرلەرمەن كەزدەسىپ، قابىلداۋ ۇيىمداستىردىق. ءارقايسىسىنىڭ ماسەلەسىن جەكە قاراستىرىپ، قۇقىقتىق جانە الەۋمەتتىك ماسەلەلەر بويىنشا كەڭەستەر بەردىك. ەڭ باستىسى ساۋداگەرلەرگە زاڭدى تۇردە جۇمىس ىستەۋگە مۇمكىندىك بەرىپ، باسقا ساۋدا ورىندارىن ۇسىنىپ وتىرمىز»، - دەدى سارىارقا اۋدانى اكىمىنىڭ ورىنباسارى ابدراحمان داۋلەنبايەۆ.
ساۋداگەرلەرگە «دجافار» ساۋدا ءۇيىنىڭ جانىنان جانە ش. قوسشىعۇل ۇلى، 14 مەكەنجايىنان ورىندار بەرىلدى. قازىرگى ۋاقىتتا ساۋداگەرلەردىڭ باسىم بولىگى ۇسىنىلعان ورىنداردا جۇمىسىن جالعاستىرۋعا نيەتتى.
«بىزگە ۇسىنعان ساۋدا ورىندارى كوڭىلىمىزدەن شىقتى. بۇرىن كۇننىڭ استىندا، جەردە وتىرساق، ەندى توبەمىزدە شاتىرى بار، قورشالعان، ىڭعايلى ورنىمىز بار. ەڭ باستىسى زاڭدى تۇردە جۇمىس ىستەيتىنىمىزگە قۋانىشتىمىز»، - دەدى ساۋداگەر سابيرا قابيدوللا قىزى.