ەلىمىزدىڭ شىعىسىندا وسىرىلگەن بانان اعاشى جەمىس بەردى

نۇر-سۇلتان. قازاقپارات - شىعىس قازاقستان وبلىسى اباي اۋدانىندا بانان اعاشى جەمىس بەردى.

تروپيكتىك وسىمدىك وسىدان 3 جىل بۇرىن قاراۋىلداعى مەكتەپتىڭ جىلىجايىندا وسىرىلە باستاعان.

سودان بەرى وڭىرگە تاڭسىق ءونىمدى كۇتىپ باققان جۇرتتىڭ ءوزى دە تاڭ-تاماشا. بيولوگ مۇعالىمدەر مەن وقۋشىلار بانان ءوسىرۋدىڭ وزىندىك ماشاقاتىن دا ايتادى.

جىل ون ەكى اي جىلۋ سۇيەتىن وسىمدىككە اسىرەسە قىستا قاجەتتى تەمپەراتۋرانى ۇستاپ تۇرۋ قاجەت.

جاپىراعى جايىلىپ وسەتىن اعاشقا بولاشاقتا ارنايى بولەك ورىن دايىنداۋ دا جوسپاردا بار. وسى قاراۋىلداعى جىلىجايدا بۇعان دەيىن انار، ماندارين، ليمون سياقتى اعاشتار دا جەمىس بەرىپتى.

گۇلميرا نۇرعاليەۆا، بيولوگيا ءپانىنىڭ مۇعالىمى:

- ءبىرىنشى رەت بەردى، ءوزىمىز دە تاڭقالدىق. ساناپ تا كوردىك ءتىپتى قىزىعىپ. سوندا 26 بانان تۇر ەكەن ۇستىڭگى قاتاردا. ال استىڭعى قاتاردان تاعى دا بەرىپ كەلە جاتىر. بىرتە-بىرتە وسىلاي ءونىم بەرە بەرەدى ەكەن. ەندى بۇل بانانعا ءبىر جارىم اي بولىپ قالدى ۇلكەيىپ كەلە جاتقانىنا. ەندى ءبىر ايدىڭ ىشىندە پىسەدى دەپ ويلايمىز ءبىز.

ال ەكىنشى قاتاردان پايدا بولعانىنا ەكى جۇما بولدى. ءونىم كوپ بەرەدى ەكەن، وعان كوزىمىز جەتىپ تۇر. ءارى قاراي كوبەيتكىمىز كەلىپ تۇر. دۇرىس ورىندارعا ورنالاستىرىپ، ونىڭ بيىكتەپ وسەتىنىنە كوزىمىز جەتىپ تۇر. ياعني بار جاعدايدى جاسايىق دەپ وتىرمىز. جانە تەك ونى ءوسىرىپ قويماي، جەپ عانا قويماي ءونىمىن، وقۋشىلارمەن بىرگە تاجىريبە جاساپ، ولارمەن بىرگە عىلىمي جوبا جاساپ، ءارى قاراي جالعاستىرامىز.

24.kz