ليتۆادا «ۇلى دالا ايەلدەرى» كورمەسى اشىلدى
اتالمىش شارا قازاقستاننىڭ ليتۆاداعى ەلشىلىگى، ق ر ورتالىق مەملەكەتتىك كينوفوتوقۇجاتتار جانە دىبىس جازبالار مۇراعاتىنىڭ، سونداي-اق «Women of Kazakhstan» ۇ ە ۇ قازاقستان ايەلدەرى ۆيرتۋالدى مۋزەيىنىڭ قولداۋىمەن ەل تاۋەلسىزدىگىنىڭ 30 جىلدىعىنا ارنالدى.
ليتۆا جۇرتشىلىعىنىڭ نازارىنا تاريحتىڭ ءارتۇرلى كەزەڭدەرىندە ۇلتتىق مادەنيەتتىڭ، ونەردىڭ، عىلىمنىڭ، ساياساتتىڭ جانە سپورتتىڭ دامۋىنا ءوز ۇلەسىن قوسقان قازاقستان حالقىنىڭ كورنەكتى وكىلدەرىنىڭ سۋرەتتەرى ۇسىنىلدى.
كورمەنى اشقان قازاقستان ەلشىسى ۆيكتور تەمىربايەۆ ەل تاۋەلسىزدىگىنىڭ قالىپتاسۋىنداعى ايەلدەردىڭ باعا جەتپەس ءرولىن اتاپ ءوتىپ، ولاردى قازاقستان حالقىنىڭ باستى بايلىقتارىنىڭ ءبىرى دەپ اتادى.
سونىمەن قاتار، ديپلومات جينالعان قوناقتاردى ايەلدەردىڭ ەكونوميكاعا، ساياساتقا، قوعامدىق قىزمەتكە قاتىسۋىن كەڭەيتۋ جونىندەگى مەملەكەتىمىزدىڭ جۇيەلى شارالارىمەن تانىستىردى.
پرەزيدەنتى قاسىم-جومارت توقايەۆتىڭ باستاماسى بويىنشا ايەلدەر مەن جاستار ءۇشىن پارلامەنتتىك سايلاۋدا ولاردىڭ كانديداتتارىنىڭ پارتيالىق تىزىمىندە 30 پايىزدىق كۆوتا ەنگىزىلگەنىن اتاپ ءوتتى.
اشىلۋ ءراسىمى بارىسىندا ەلشىلىك ليتۆادا عۇلاما عالىم ءارى فيلوسوف ءال-فارابيدىڭ 1150 جىلدىعىن جانە ۇلى اقىن ءارى ويشىل اباي قۇنانباي ۇلىنىڭ 175 جىلدىعىن مەرەكەلەۋگە بەلسەندى قاتىسقان ليتۆا قايراتكەرلەرىنە مەملەكەت باسشىسىنىڭ جانە مادەنيەت جانە سپورت ءمينيسترىنىڭ اتىنان العىس حاتتاردى تابىس ەتتى.
2020-جىلدىڭ بارىسىندا ليتۆادا ۇلتتىق قاۋىمداردىڭ ۇيىندە ءال-فارابي ورتالىعى جانە ۆيلنيۋس وكرۋگىنىڭ قوعامدىق كىتاپحاناسىندا اباي اتىنداعى وقۋ زالى اشىلدى.
سونىمەن قاتار، ءا. ءالىمجانوۆتىڭ «ۇستازدىڭ ورالۋى» پوۆەسى ليتۆا تىلىنە اۋدارىلىپ، م. اۋەزوۆتىڭ «اباي جولى» رومان-ەپوپەياسى قايتا باسىلىپ شىعارىلدى. «قازاق ۋنيۆەرسيتەتى» باسپاسىنان شىققان ءال-فارابي مەن ابايعا ارنالعان كىتاپتار وڭىردەگى ەڭ ءىرى «Vilnius Book Fair» كىتاپ جارمەڭكەسىنىڭ اياسىندا تانىستىرىلدى. سونىمەن قاتار، ليتۆاداعى توعىزقۇمالاقت قازاق ۇلتتىق زياتكەرلىك ويىنى بويىنشا كەزەكتى جارىس ابايدىڭ مەرەيتويىنا ارنالدى.