نۇر-سۇلتاندا اۋلا كەڭىستىگىن قۇرۋدىڭ جاڭا ءتاسىلى ەنگىزىلدى

نۇر-سۇلتان. قازاقپارات - ەلوردادا اۋلا كەڭىستىگىن قۇرۋدىڭ جاڭا ءتاسىلى ەنگىزىلدى.

ەلوردانىڭ جاڭا اۋلالارىندا تىنىش ورىندار مەن سپورتتىق اۋماقتار اشىلادى.

وندا بالالار دا، ەرەسەكتەر دە، زەينەتكەرلەر دە بوس ۋاقىتىن ءتيىمدى وتكىزە الادى. سونىمەن قاتار، ءۇي جانۋارلارىمەن سەرۋەندەۋگە دە جاعداي جاسالادى، دەپ حابارلايدى قازاقپارات قالالىق اكىمدىكتىڭ رەسمي سايتىنا سىلتەمە جاساپ.

مەملەكەت باسشىسىنىڭ تاپسىرماسى بويىنشا ەلوردا اكىمدىگى بۇقارالىق سپورتتى دامىتۋعا جانە وعان جۇرتتىڭ قىزىعۋشىلىعىن ارتتىرۋعا ەرەكشە كوڭىل بولەدى.

وسىلايشا، اۋلالار مەن قوعامدىق كەڭىستىكتەردى (ساياباقتار، گۇلزارلار، جەلەكجولدار) سالۋ جانە اباتتاندىرۋ بويىنشا اۋقىمدى جۇمىستار جالعاسۋدا. وسى ماۋسىمدا عانا ەلوردا اكىمدىگى 120 اۋلا مەن 40 قوعامدىق كەڭىستىك سالادى.

سول سياقتى ەسكى ورىندار جوندەۋدەن وتەدى. بۇدان بولەك اۋلالارى جوق ۇيلەرگە، قاراۋسىز قالعان ۋچاسكەلەرگە، بوس ورىندارعا باسا نازار اۋدارىلاتىن بولادى. اۋلالار مەن قوعامدىق كەڭىستىكتەردى سالۋ جانە اباتتاندىرۋ كەزىندە قالانىڭ ەسكى بولىگى مەن تۇرعىن الاپتارىنا ەرەكشە كوڭىل بولىنەدى.

جۇمىستار قالانىڭ بارلىق اۋدانىن قامتيدى. مىسالى، بايقوڭىر اۋدانىندا (بەيسەكبايەۆ كوشەسى 21، اباي كوشەسى 101، تاشەنوۆ كوشەسى 17/1) اۋلا كەڭىستىكتەرىنىڭ قۇرىلىسى بەلسەندى جۇرگىزىلۋدە. سونداي-اق، سول اۋداندا ورنالاسقان الاتاۋ شاعىن اۋدانى اۋلاىشىلىك اۋماقتارمەن قورشالادى. شاعىن اۋداندا توعىز ۇلكەن اۋلا اباتتاندىرىلادى، بۇل جاقىن ماڭداعى بارلىق تۇرعىن ءۇيدى (يمانوۆ كوشەسى 32، 32/1، 32/2، 34، 36؛ بەيسەكبايەۆ كوشەسى 1، 3؛ تارحان كوشەسى 5، 5/1، 7، 7/1) قامتۋعا مۇمكىندىك بەرەدى.

ءۇي تۇرعىندارى اۋلا كەڭىستىكتەرىنىڭ اشىلۋىن اسىعا كۇتىپ جۇرگەنىن جەتكىزدى.

«قۇرىلىس جۇمىسىنىڭ اياقتالۋىن اسىعا كۇتىپ ءجۇرمىز. ءوز اۋلامىزدىڭ بولعانىن 20 جىلدان استام ۋاقىت بويى ارماندادىق. ەندى ءتىپتى يتتەردى سەرۋەندەتۋگە ارنالعان ورنىمىز بولادى. بالالار وتە قۋانىشتى. ولار جازعى دەمالىسىن جاڭا اۋلادا وتكىزۋدى جوسپارلاپ وتىر. ءتىپتى، دوستارىن قوناققا دا شاقىرىپ قويدى»، - دەدى بەيسەكبايەۆ كوشەسى، 21 ءۇي تۇرعىنى تاتيانا.

جاڭا اۋلالاردا سپورتپەن شىنىعۋ قۇرالدارى، ويىن كەشەندەرى، ءتۇرلى اتكەنشەكتەر، بالالارعا ارنالعان توبەشىكتەر، قۇمسالعىشتار سەكىلدى جاعداي قاراستىرىلاتىن بولادى. سول سياقتى تىنىش ايماقتا قارتتارعا ارنالعان بەسەدكالار بار.

«ەكى بالانىڭ اناسى رەتىندە جاڭا اۋلا سالىنىپ جاتقانىنا قۋانىپ ءجۇرمىن. بۇرىن بالالارىمدى ويناتۋ ءۇشىن كورشى اۋلاعا باراتىنبىز. ەندى ءبارى وزىمىزدە اشىلاتىن بولدى. بۇل وتە ىڭعايلى»، - دەدى اينۇر ەسىمدى تاشەنوۆ كوشەسى، 17/1 ءۇيىنىڭ تۇرعىنى.

ەستەرىڭىزگە سالا كەتەيىك، 2020-جىلى نۇر-سۇلتان اكىمدىگى 76 گەكتاردان استام جەردى اباتتاندىردى. بۇل - شامامەن 150 اۋلا جانە 60 قوعامدىق كەڭىستىك (ساياباق، گۇلزار، جەلەكجول).

وسىلايشا ەلوردا حالقىنىڭ تورتتەن ءبىر بولىگىندە سپورتپەن اينالىسىپ، سەرۋەندەۋگە ارنالعان ورىندار اشىلدى. بيىل قالا تۇرعىندارىنىڭ جارتىسىنا ارناپ، اۋلالار مەن قوعامدىق كەڭىستىكتەر سالىنادى.

اۋلالاردى اباتتاندىرۋ كەزىندە كوگالداندىرۋعا دا ەرەكشە كوڭىل بولىنەدى. بيىل قالادا ءبىر ميلليوننان استام جاسىل جەلەك (اعاشتار، بۇتالار، كوشەتتەر جانە ت. ب.)، ونىڭ ىشىندە ەلوردانىڭ «جاسىل بەلدەۋىنە» وتىرعىزۋ جوسپارلانۋدا.

ەلوردا «نۇر-سۇلتان - جايلى قالا» ماستەر-جوسپارى اياسىندا دامىپ كەلەدى.