امەريكالىق ماماندار ارىستاعى ساپەرلەردىڭ جۇمىسىنا باعا بەردى

نۇر-سۇلتان. قازاقپارات - قورعانىس ءمينيسترى گەنەرال-لەيتەنانت نۇرلان ەرمەكبايەۆ ارىس قالاسىنداعى جارىلماعان وق-دارىلەردى جيناقتاۋ (جويۋ) جۇمىستارىن باعالاپ، كەڭەس بەرگەن امەريكالىق ساراپشىلاردى، سونداي-اق، قازاقستان رەسپۋبليكاسىنداعى امەريكا قۇراما شتاتتارىنىڭ اسكەري اتتاشەسى پولكوۆنيك بيلل سابانى قابىلدادى، دەپ حابارلايدى ق ر ق م باسپا ءسوز قىزمەتى.

گەنەرال-لەيتەنانت نۇرلان ەرمەكبايەۆ اسكەري اتتاشەگە امەريكالىق ساراپشىلار جۇرگىزگەن ءتيىمدى جۇمىسىنا العىسىن ءبىلدىردى.

قورعانىس ۆەدومستۆوسىنىڭ باسشىسى ارىستاعى ءورت سالدارىن جويۋ جۇمىستارى جالعاسىپ جاتقانىن مالىمدەدى.

قورعانىس مينيسترلىگى ءۇشىن بۇل ماڭىزدى ماسەلە. 2021-جىلدىڭ 27- ءساۋىرى مەن 14- مامىرى ارالىعىندا وق-دارىلەردى تازارتۋعا جەدەل دەن قويۋ جاساعىنىڭ ماماندارى مارك توباياس جانە گرەگوري فورد تەحنيكالىق ايماقتى وق-ءدارى قالدىقتارىنان تازارتۋ بويىنشا جۇرگىزىلگەن جانە الداعى اتقارىلاتىن جۇمىستارمەن تانىستى.

ولار مەتال سىنىقتارىن سۇرىپتايتىن جەردى ارالاپ، وق-ءدارى قالدىقتارىن جويۋ جۇمىستارىنىڭ جۇيەلىلىگىن زەردەلەدى.

ميناسىزداندىرۋ جانە EOD (Explosive Ordnance Disposal) سالاسىنداعى ساراپشىلار جارىلماعان وق-دارىلەردى جيناۋ مەن ولاردى جويۋداعى ساپەرلەردىڭ جۇمىسىن جوعارى باعالادى.

20 جىلدان استام الەمنىڭ ءتۇرلى ەلدەرىندە قىزمەت ەتكەن امەريكالىق ماماندار جۇمىستارىندا ارىس قالاسىنداعى جاعدايدى، جارىلعىش زاتتارمەن جوعارى دەڭگەيدە ۇيىمداستىرىلعان جۇمىستى جانە ونىڭ ساپاسىن، ادىستەمەسىن ەش جەردە كەزدەستىرمەگەنىن اتاپ ءوتتى.

ولاردىڭ ايتۋىنشا، قويما اۋماعىن جارىلۋ قاۋپى بار زاتتاردان تازارتۋ جۇمىستارى دۇرىس، رەتىمەن جانە بارىنشا قاۋىپسىز جۇرگىزىلەدى.

مارك توباياس جانە گرەگوري فورد ورتەنبەگەن جارىلعىشتار مەن ولاردىڭ قالدىقتارىنىڭ ۇشۋىن مۇلدە بولدىرمايتىن ارنايى جابدىقتالعان ورىنعا نازار اۋداردى.

امەريكالىق ماماندار سونداي-اق، قازاقستاندىق اسكەري قىزمەتشىلەرىمەن اۋماقتى جانە قويمالاردى تازارتۋ، وق-دارىلەردى زالالسىزداندىرۋ مەن جويۋ جونىندە كەڭەس بەرۋ-ادىستەمەلىك جيىنىن وتكىزدى.

اتالمىش ساباقتار ميناعا قارسى قىزمەتتىڭ حالىقارالىق ستاندارتتارىنا (IMAS) ساي جۇرگىزىلگەنىن اتاپ وتكەن ءجون.