نايزاعايدان زاقىم العان كيىكتەر تىرىدەي كومىلگەن - مينيسترلىك تەكسەرۋدى باستادى

None
None
نۇر- سۇلتان. قازاقپارات - باتىس قازاقستاندا وقىستان مەرت بولعان كيىكتەردىڭ ۇشالارىن جويۋ كەزىندە ءتىرى قالعان كيىكتەر دە بىرگە كومىلگەن،

دەپ حابارلايدى قازاقپارات ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتىنە سىلتەمە جاساپ.

بۇعان دەيىن حابارلانعانداي، 2021 -جىلدىڭ 13 - مامىرىندا ب ق و جانىبەك اۋدانى تاۋ كەنتىنىڭ جانىنان 372 ولگەن كيىك ۇشاسى تابىلعان. الدىن الا اقپارات بويىنشا، جانۋارلاردىڭ ءولىم سەبەپتەرىنىڭ ءبىرى وسى ايماقتاعى قولايسىز اۋا رايىنا بايلانىستى بولۋى مۇمكىن (نوسەر جاڭبىر مەن نايزاعاي)، ويتكەنى قاڭقالاردا نايزاعاي رازريادىنىڭ ءىزى قالعان. ولگەن جانۋارلاردى جيناۋ جانە جويۋ جۇمىستارىن تاۋ اۋىلدىق وكرۋگىنىڭ اكىمدىگى جۇرگىزگەن.

«2021 -جىلعى 17 -مامىردا الەۋمەتتىك جەلىلەردە باتىس قازاقستان وبلىسىندا وقىستان مەرت بولعان جانۋارلاردىڭ ءولى ۇشالارىن جويۋ كەزىندە كەزدەسكەن ءتىرى كيىكتەردىڭ بەينەجازباسى تاراتىلدى. وقيعاعا بايلانىستى ورمان شارۋاشىلىعى جانە جانۋارلار دۇنيەسى كوميتەتى جانۋارلارعا جاسالعان كەز كەلگەن قاتىگەزدىكتى ايىپتايدى جانە وسى سالاداعى زاڭبۇزۋشىلارعا توزبەيتىنىن جەتكىزەدى! بۇل ماسەلە كوميتەتتىڭ قاتاڭ باقىلاۋىنا الىندى»، - دەپ حابارلادى ورمان شارۋاشىلىعى جانە جانۋارلار دۇنيەسى كوميتەتىنەن.

ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ رەسمي وكىلى سامال يبرايەۆا وبلىستىق پوليتسيا دەپارتامەنتىنە شاعىم تۇسىرىلەتىنىن، جازىقسىز جانۋارلارعا سالعىرتتىق تانىتقانداردىڭ جازالاناتىنىن جازدى.

اۆتور: ايجان سەرىكجان قىزى


سوڭعى جاڭالىقتار