ب ۇ ۇ: ادامدار جۇمىس كۇنىنىڭ شامادان تىس ۇزاقتىعىنان زارداپ شەگەدى
ب ۇ ۇ- نىڭ ەكى جەتەكشى مەكەمەسىنىڭ جاڭا بىرلەسكەن زەرتتەۋى كورسەتكەندەي، كوپ جۇمىس جاساۋ كاسىبي اۋرۋلاردىڭ قاۋىپ فاكتورىنا اينالعان. Environment International جۋرنالىندا جاريالانعان زەرتتەۋدى دۇنيەجۇزىلىك دەنساۋلىق ساقتاۋ ۇيىمى (د د س ۇ) جانە حالىقارالىق ەڭبەك ۇيىمى (ح ە ۇ) جۇرگىزدى. بۇل - جۇمىس كۇنىنىڭ شامادان تىس ۇزاقتىعىنان بولاتىن ءولىم مەن اۋرۋدى جاھاندىق تالداۋدىڭ العاشقى ارەكەتى. ماسەلەن، 2016 -جىلى ينسۋلت پەن جۇرەكتىڭ يشەميالىق اۋرۋىنان 745000 ادام قايتىس بولدى. ولاردىڭ بارلىعى اپتاسىنا كەمىندە 55 ساعاتتان جۇمىس ىستەگەن. بۇل كورسەتكىش 2000 -جىلمەن سالىستىرعاندا 29 پايىزعا كوپ. ارتىق جۇمىس ىستەيتىن ادامداردىڭ سانى كۇن ساناپ ءوسىپ كەلەدى جانە قازىرگى ۋاقىتتا الەم حالقىنىڭ 9 پايىزىن قۇرايدى. سونىمەن بىرگە، زەرتتەۋشىلەر اپتاسىنا 55 ساعات نەمەسە ودان دا كوپ جۇمىس جاسايتىنداردا 35-40 ساعات جۇمىس ىستەيتىندەرگە قاراعاندا ينسۋلت قاۋپى شامامەن 35 پايىزعا، ال جۇرەكتىڭ يشەميالىق اۋرۋى قاۋپى 17 پايىزعا ارتاتىنىن انىقتادى.
جاڭا تالداۋ COVID-19 پاندەمياسى كەزىندە جۇمىس ۋاقىتىن ۇيىمداستىرۋ ماسەلەسى كوتەرىلگەندىكتەن جۇرگىزىلۋدە.
«COVID-19 پاندەمياسى كوپتەگەن ادامداردىڭ جۇمىسىن ايتارلىقتاي وزگەرتتى، - دەدى د د ۇ باس ديرەكتورى دوكتور تەدروس ادحانوم گەبرەيۋس. - قاشىقتان جۇمىس جاساۋ كوپتەگەن سالادا قالىپتى جاعدايعا اينالدى. كوپتەگەن كاسىپورىندار اقشانى ۇنەمدەۋ ماقساتىندا جۇمىستى توقتاتا تۇرۋعا نەمەسە تولىعىمەن جابۋعا ءماجبۇر بولدى، ال جالاقى الاتىن ادامدار ۇزاق جۇمىس ىستەۋگە ءماجبۇر».
ساراپشىلاردىڭ ايتۋىنشا، ەر ادامدار ايەلدەرگە قاراعاندا جۇمىس جۇكتەمەسى سالدارىنان جيىرەك ولەدى: ولار جۇمىسپەن بايلانىستى ءولىمنىڭ 72 پايىزىن قۇرايدى. شامادان تىس جۇمىس جۇكتەمەسى، ادەتتە ەگدە جاستاعىلارعا اسەر ەتەدى. مىسالى، ءولىمنىڭ كوپشىلىگى 60-79 جاس ارالىعىنداعى ادامدار اراسىندا تىركەلگەن، ولار 45 پەن 74 جاس ارالىعىندا اپتاسىنا 55 ساعاتتان ارتىق جۇمىس ىستەگەن. سونداي- اق جۇمىس سالدارىنان دەنساۋلىعى سىر بەرەتىندەردىڭ ەڭ كوپ بولىگى باتىس تىنىق مۇحيتى مەن وڭتۇستىك- شىعىس ازيا ايماعىنىڭ تۇرعىندارى ەكەنى بەلگىلى بولدى.