الەمدە قانداي تاۋارلار قىمباتتايدى؟
ساراپشىلار الداعى ۋاقىتتا باسقا دا تاۋارلار قۇنى شارىقتايتىنىن بولجاپ وتىر. ولاردىڭ قاتارىندا ءۇندى شايى، برازيليالىق كوفە مەن شوكولاد بار. ءۇندىستاندا قارا شاي قىمباتتاۋى مۇمكىن. ونىڭ ەكى سەبەبى بار. ياعني، پاندەميا مەن قۋاڭشىلىق. ەلدە بۇل وسىمدىكتىڭ ەڭ ءىرى ءوندىرۋشىسى - اسسام شتاتى. ءوڭىر قازىر الاپات قۇرعاقشىلىقتىڭ زاردابىن تارتىپ وتىر. ودان بولەك، ۆيرۋس كەسىرىنەن جۇمىس كۇشىنىڭ تاپشىلىعى تۋىنداعان. ويتكەنى پلانتاتسيادا ەڭبەك ەتەتىن قىزمەتكەرلەر اراسىندا ىندەت جۇقتىرعاندار كوپ. بىلتىر ەلدەگى ەپيدەميولوگيالىق احۋال قازىرگىدەن الدەقايدا جاقسى بولاتىن. الايدا سونىڭ وزىندە شاي ءوندىرىسى 2 ەسەگە قىسقارعان ەدى. ەندى ساراپشىلار ءۇندىستان الداعى 3 -جىلدا الەمدەگى ەڭ ءىرى شاي مونوپوليستەرىنىڭ ۇشتىگىنەن شىعىپ قالۋى مۇمكىن دەپ وتىر.
ادەش حانگال، ءۇندىستان شاي كەڭەسىنىڭ رەسمي وكىلى:
- كوروناۆيرۋستان ءۇندىستاننىڭ عانا ەمەس، بۇكىل الەمنىڭ شاي ءوندىرىسى زارداپ شەگىپ وتىر. الايدا وزگە ەلدەردەگى جاعداي بىزدىكىنەن جاقسى. باستى باسەكەلەسىمىز - شري- لانكادا بۇل تاۋار تەك 5 پروتسەنكە قىمباتتادى. ال كەنيادا ءتىپتى باعا ارزانداپ كەتكەن. ويتكەنى بۇل مەملەكەتتەر شايدى جيناۋ ماۋسىمىن جاقسى ناتيجەلەرمەن اياقتادى. ت
ۇتىنۋشىلار اراسىندا شاي سەكىلدى تانىمال سۋسىنىڭ ءبىرى - كوفە. ونىڭ الەمدەگى ەڭ ءىرى ءوندىرۋشىسى - برازيليا. لاتىن امەريكاسىنداعى ەل ءۇندىستان سەكىلدى كوروناۆيرۋستان ەڭ قاتتى زارداپ شەگىپ جاتىر. بىلتىر كارانتين سالدارىنان لوگيستيكالىق قيىندىقتار تۋىنداپ، كوفە دۇرىس ساقتالماي، ءبىراز ءونىم بۇلىنگەن ەدى. سالدارىنان نارىقتا تاۋار ءتۇرىنىڭ تاپشىلىعى تۋىندادى. ول ازداي، بيىل برازيليانى قۋاڭشىلىق جايلادى. لاتىن امەريكاسىندا ءىرى وندىرۋشىلەر قاتارىندا كولۋمبيا دا بار. ال مۇندا ءونىمدى جيناۋعا تولاسسىز نوسەر كەسىرىن تيگىزدى. ساراپشىلار كوفە باعاسى قىمباتتاۋى مۇمكىن ەكەنىن ەسكەرتەدى.
حارۋمي حودجو، كوفە فەرماسىنىڭ قىزمەتكەرى:
- بىرەۋمەن كەزدەسۋگە بارعاندا، ادەتتە نەگە تاپسىرىس بەرەمىز؟ ءيا، كوفەگە. ونى ءىشىپ وتىرىپ، اڭگىمە دۇكەن قۇرعانعا نە جەتسىن؟ بۇل تەك برازيليالىقتاردىڭ عانا ەمەس، الەمدەگى كوپ ادامنىڭ سۇيىكتى سۋسىنى. سوندىقتان وعان دەگەن سۇرانىس جىل سايىن ۇلعايادى.
ساراپشىلار الداعى ۋاقىتتا الەمدە شوكولاد، ەرىن دالابى مەن ءتىس پاستاسىنىڭ باعاسى دا قىمباتتاۋى مۇمكىن ەكەنىن ەسكەرتىپ وتىر. ويتكەنى اتالعان زاتتاردىڭ وندىرىسىندە پالما مايى قولدانىلادى. كەيىنگى ءبىر جىلدا بۇل مايدىڭ باعاسى 120 پروتسەنتكە قىمباتتاپ كەتكەن. قازىر ونىڭ ءبىر تونناسى ءبىر مىڭ دوللاردان اسادى. بۇل بۇرىن سوڭدى بولماعان كورسەتكىش. بارىنە كوروناۆيرۋس سەبەپ. الەمدە بۇل تاۋاردىڭ 84 پروتسەنتىن مالايزيا مەن يندونەزيا شىعارادى. الايدا پاندەمياعا بايلانىستى بۇل ەلدەر ءوندىرىس كولەمىن قىسقارتۋعا ءماجبۇر. ويتكەنى كارانتيندە ەڭبەك ميگرانتتارىنىڭ كەلۋى قيىنداعان. ودان بولەك، پاندەميا كەزىندە وسىمدىك مايى 100 پروتسەنتكە، ال سويا مايى 150 پروتسەنتكە قىمباتتاعان.
ا ق ش- تا جانارماي باعاسى سوڭعى 7 جىلدا بولماعان كورسەتكىشتەرگە دەيىن جەتكەن. ءبىراق وعان كوروناۆيرۋس سەبەپ ەمەس. بۇل جاعدايعا جەرگىلىكتى كولونيال پايپلاين كومپانياسىنىڭ قۇبىرلار جەلىسىنە جاسالعان كيبەرشابۋىل اسەر ەتتى. سالدارىنان جانارماي تاپشىلىعى تۋىنداپ، بىرنەشە شتاتتا توتەنشە جاعداي جاريالاندى. ال رەسەيدە ۇشاقتارعا ارنالعان جانارماي قىمباتتادى. جىل باسىنان بەرى اۆياكەروسين قۇنى 20 پروتسەنتكە كوتەرىلدى. پاندەميا كەزىندە قاتتى زارداپ شەككەن اۋە كومپانيالارىنىڭ قوسىمشا شىعىندارى 70 ميلليارد رۋبلگە دەيىن جەتۋى مۇمكىن. ساراپشىلار بۇل اۋە بيلەتتەرىنىڭ قىمباتتاۋىنا اكەلەدى دەيدى.
www.24.kz