07:30, 17 - مامىر 2021 | GMT +6
يسلانديادا جاڭا ويانعان جانارتاۋ ساتىلىپ جاتىر
رەيكياۆيك. قازاقپارات - يسلانديادا ناۋرىز ايىنىڭ سوڭىندا ويانعان فاگرادالسفيادل جانارتاۋى تۇرعان جەردىڭ يەسى جەر تەلىمىن ۆۋلكانىمەن قوسا ساتۋعا شىعاردى، دەپ حابارلايدى قازاقپارات Bloomberg-كە سىلتەمە جاساپ.
جەر تەلىمى قۇقىعىنىڭ ءبىر بولىگى تيەسىلى اننا تورديس گۋدمۋندسدوتتيردىڭ ايتۋىنشا، ەكى ادام جانارتاۋدى ساتىپ الۋعا نيەت بىلدىرگەن. ماماندار ۆۋلكان كوپ جىلدار بەلسەندى كۇيىندە قالۋى مۇمكىن دەپ بولجاپ وتىر. جانارتاۋ اتقىلاي باستاعالى بەرى جەر يەلەرى جاڭا تۋريستىك ورىنعا ادامداردىڭ ەركىن جەتۋىن قامتاماسىز ەتۋ ءۇشىن جەرگىلىكتى بيلىكپەن بىرگە جۇمىس ىستەگەن.
يسلانديادا كوزگە كورىنەرلىك كورىكتى جەر بولسا سوندا كىرىپ- شىققانداردان مەنشىك يەسىنە اقى الۋعا زاڭ رۇقسات بەرەدى. الايدا ەلدىڭ ۇكىمەت باسشىسى كاترين ياكوبسدوتتير جانارتاۋ تۇرعان جەردى مەملەكەت ساتىپ المايتىنىن، ونى مەنشىككە العىسى كەلەتىندەر بولسا وسى ورىنعا تۋريست كەلۋىنە شەكتەۋ بولمايتىنىن مالىمدەگەن.