يزرايل حاماس باسشىسىنىڭ ۇيىنە بومبا تاستالعانىن حابارلادى

نۇر- سۇلتان. قازاقپارات - بەيبىتشىلىك تىلەۋشىلەر ءتۇن بالاسى تاياۋ شىعىسقا الاڭدادى. كۇندىز دە سول جاقتان كەلەتىن اقپاراتقا قۇلاق تۇرەدى.

بىرىككەن ۇلتتار ۇيىمىنان باستاپ ءتۇرلى قوعامدىق بىرلەستىكتەر ۇندەۋى ازىرشە قىرعي قاباق ەكەۋىنە اسەر ەتپەگەن سەكىلدى. مىسالى، يزرايل تاڭ بوزىنان حاماس باسشىسىنىڭ ۇيىنە بومبا تاستالعانىن حابارلاپتى. تاعى ءبىر دەرەك تەل- اۆيۆ زىمىرانمەن اتقىلانعانىن ايتادى.

ياعني، 7 كۇننەن بەرى ەكى جاق تا ءوش الۋ، كەك قايتارۋعا كوبىرەك بەكىنگەن سەكىلدى. دەنساۋلىق ساقتاۋ سالاسى وكىلىنىڭ ايتۋىنا قاراعاندا، پالەستينا جاقتان كەم دەگەندە 3 ادامنىڭ قايتىس بولعانى ايتىلادى. يوردان وزەنىنىڭ باتىس جاعالاۋى ءتۇن بالاسى جارىلىستان كوز اشپادى دەگەن دە پىكىر بار. جارالانعاندار سانى ناقتىلانعان جوق. الايدا ولاردىڭ از ەمەستىگى ايتىلادى.

تاعى دا سول رەسمي وكىل سوزىنە سەنسەك، دۇيسەنبىدەن بەرى گازا سەكتورىندا كەمى 148 ادام قايتىس بولعان. ونىڭ قىرىق ءبىرى - بالالار. يزرايل جاعى 10 ادامنىڭ قازا تاپقانىن حابارلادى. ال وتكەن تۇندە تەل- اۆيۆكە قاۋىپ تونگەنى جايىندا ەسكەرتىلىپ، جەرگىلىكتى جۇرت قورعانۋ ءۇشىن جەرتولەگە جۇگىرگەن. ءبىرىن ءبىرى جانشىپ كەتە جازداعان حالىق اراسىندا جاراقات العاندار بار.

ا ق ش اراعايىندىعى، بىرىككەن ۇلتتار ۇيىمىنىڭ بەيبىتشىلىك ورناتۋداعى ۇمتىلىسى جانە مىسىر باستاماسى ازىرشە ناتيجە بەرەر ەمەس. تاياۋ شىعىستا ناقاق قان توگىلۋدە. بۇگىن قاۋىپسىزدىك كەڭەسى تاعى ءبىر كەڭ كولەمدى جيىن وتكىزۋگە بەكىنىپ وتىر. ال يزرايل مەن حاماس تاياۋ ارادا تاتۋلاسۋ جاعىن ءتىپتى قاراستىرعان دا جوق.

www.24.kz