تاياۋ شىعىس: جاڭا اۋە سوققىلارى، قاقتىعىستار مەن تارتىپسىزدىكتەر
تۇرعىن عيمارات گازا قالاسىنان باتىسقا قاراي ەش- شاتى بوسقىندار لاگەرىندە ورنالاسقان. ءبىر وتباسى مۇشەلەرى تۇرعان ءۇي بومبالاۋ كەزىندە تولىق قيرادى، دەپ حابارلايدى قازاقپارات Euronews اقپارات اگەنتتىگىنە سىلتەمە جاساپ.
زارداپ شەككەن 20-عا جۋىق ادام گازانىڭ ورتالىق اۋرۋحاناسىنا جەتكىزىلدى. دۇيسەنبىدەن باستاپ يزرايل جانە گازا سەكتورى اراسىندا راكەتا سوققىسىمەن الماسۋ جالعاسىپ جاتىر. ب ۇ ۇ جانجالدىڭ شيەلەنىسۋىنە قاتىستى الاڭداۋشىلىق ءبىلدىرىپ وتىر.
ب ۇ ۇ باس حاتشىسىنىڭ رەسمي وكىلى ستەفان ديۋجارريك: «باس حاتشى (انتونيۋ گۋتەرريش) شيەلەنىس تاراپتارىن گازا مەن يزرايلدە اسكەري قيمىلداردى دەرەۋ توقتاتۋعا شاقىرىپ وتىر. جالعاسىپ كەلە جاتقان اسكەري ەسكالاتسيا كوپ قايعى اكەلدى. ول ونداعان بەيبىت تۇرعىننىڭ ءومىرىن قيىپ اكەتتى، وكىنىشكە قاراي، ولاردىڭ اراسىندا بالالار كوپ».
يزرايلدىڭ سولتۇستىگىندەگى كافر- كاندا يسلامشىلاردىڭ كوشباسشىلارىنىڭ ءبىرى قاماۋعا الىنعان سوڭ جاپپاي تارتىپسىزدىكتەر ورناعان. ارابتار يزرايلدىك اسكەريلەرگە تاس لاقتىرىپ، جولدارىن بۇعاتتاعان، ءتارتىپ ساقشىلارىنا وق اتقان. يزرايل پوليتسياسىنىڭ حابارلاۋىنشا، توعىز ادام جاراقات العان. ونىڭ تورتەۋى اۋىر حالدە جاتىر.
جۇما كۇنى يزرايل پوليتسياسى يەرۋساليمنىڭ سيلۋان اۋدانىندا ورناعان تارتىپسىزدىكتەر كەزىندە جاس شىعاراتىن گاز بەن جارىق- شۋ گراناتاسىن قولداندى. يزرايلدىقتار مەن پالەستينالىقتاردىڭ شيەلەنىسىنەن كەيىن شىعىس يەرۋساليمدە قاقتىعىستار يوردان وزەنىنىڭ باتىس جاعالاۋندا باستالعان. ءتۇرلى قالالارداعى جۇزدەگەن پالەستينالىق ازامات يزرايلدىڭ گازا سەكتورى مەن شىعىس يەرۋساليمدەگى ارەكەتتەرىنە نارازىلىق رەتىندە كوشەلەرگە شىقتى. پالەستينانىڭ قىزىل جارتى ايىندا يزرايلدىك اسكەريلەرمەن قاقتىعىس سالدارىنان 100-دەن استام ادام قازا تاپقانىن مالىمدەدى. ونشاقتى پالەستينالىق ازاماتتى اسكەريلەر اتتى. تاعى بىرەۋى يزرايلدىك ساربازعا شابۋىل جاساماق بولعاندا ولتىرىلگەن.
اۆتور: زارينا تۋعانبايەۆا