ىشكى ىستەر مينيسترلىگى ءبىلىم بەرۋ مەكەمەلەرىن تەكسەرۋدى باستادى
ىشكى ىستەر مينيسترلىگىندە ءبىلىم بەرۋ ۇيىمدارىندا وقۋشىلاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا كەزەكتەن تىس جەدەل كەڭەس ءوتتى.
كەڭەس بارىسىندا مينيستر ەرلان تۇرعىمبايەۆ ءى ءى م قىزمەتتەرى مەن اۋماقتىق پوليتسيا دەپارتامەنتتەرىنىڭ باسشىلارىنا بارلىق ءبىلىم بەرۋ مەكەمەلەرىن بەينەباقىلاۋ جۇيەلەرىمەن، قىزمەتكەرلەر مەن كەلۋشىلەردى حاباردار ەتۋ قۇرالدارىمەن، دابىل تۇيمەلەرىمەن، كۇزەت سيگناليزاتسياسىمەن جانە كۇزەتپەن جاراقتاندىرۋدى تەكسەرۋدى تاپسىردى.
17- مامىردا باستالاتىن «قارۋ» جەدەل الدىن الۋ ءىس-شاراسى شەڭبەرىندە قارۋ مەن وق-دارىلەردى ساتۋدىڭ زاڭدىلىعىن، ولاردى قارۋ دۇكەندەرىندە، سونداي-اق اتىس قارۋىنىڭ يەلەرى بولىپ تابىلاتىن زاڭدى جانە جەكە تۇلعالاردا قاۋىپسىز ساقتاۋ شارتتارىن تەكسەرۋدى قامتاماسىز ەتۋ تاپسىرىلدى.
سونداي-اق قاتىگەزدىك پەن زورلىق-زومبىلىقتى ناسيحاتتاۋ فاكتىلەرىن انىقتاۋ جانە دەن قويۋ ءۇشىن ينتەرنەت-كەڭىستىكتىڭ تۇراقتى مونيتورينگى جۇزەگە اسىرىلاتىن بولادى.
«بالالار - قوعامنىڭ ەڭ وسال بولىگى. سوندىقتان ولاردىڭ قاۋىپسىزدىگى ءارقاشان باسىمدىققا يە. جەرگىلىكتى اتقارۋشى ورگاندارمەن، ءبىلىم بەرۋ مەكەمەلەرىمەن جانە ازاماتتارمەن بىرلەسىپ ءبىز بالالاردىڭ مەكتەپتەردە ءبىلىم الىپ، اتا-انالاردىڭ بالا قاۋىپسىزدىگى تۋرالى الاڭداماۋى ءۇشىن بارلىق قاجەتتى شارالاردى قابىلداۋعا ءتيىسپىز»، - دەدى ءى ءى م باسشىسى ەرلان تۇرعىمبايەۆ.
بۇدان بۇرىن حابارلانعانداي، 11- مامىردا قازان قالاسىنداعى مەكتەپتە قىلمىسكەر وق جاۋدىرىپ، ادامدار قۇربان بولدى.
ق ر ءبىلىم جانە عىلىم ءمينيسترى اسحات ايماعامبەتوۆ تاتارستاننىڭ قازان قالاسىندا بولعان جاعدايعا بايلانىستى ەلىمىزدەگى اعىمداعى جاعدايعا تالداۋ جۇرگىزۋدى جانە جاقىن ارادا بالالاردىڭ قاۋىپسىزدىگىن قامتاماسىز ەتۋ بويىنشا بارلىق دەڭگەيلەردە قوسىمشا كەشەندى شارالار قابىلداۋدى تاپسىردى.