مەملەكەت باسشىسى دۇنيەجۇزىلىك بانكتىڭ ۆيتسە- پرەزيدەنتىمەن ونلاين سويلەستى

None
None
نۇر- سۇلتان. قازاقپارات - مەملەكەت باسشىسى دۇنيەجۇزىلىك بانكتىڭ ۆيتسە- پرەزيدەنتى اننا بەردەمەن ونلاين جۇيەسىندە سويلەستى، دەپ حابارلايدى اقوردا.

قازاقستان پرەزيدەنتى ەلىمىزگە جۇمىس ساپارىمەن كەلگەن دۇنيەجۇزىلىك بانكتىڭ ەۋروپا جانە ورتالىق ازيا ءوڭىرى بويىنشا ۆيتسە- پرەزيدەنتى اننا بەردەمەن ۆيدەو كونفەرەنسيا ارقىلى كەزدەسۋ وتكىزدى.

قاسىم- جومارت توقايەۆ پەن اننا بەردە قازاقستان مەن دۇنيەجۇزىلىك بانك اراسىنداعى ىنتىماقتاستىقتىڭ وزەكتى باعىتتارىن جانە الداعى ۋاقىتتاعى كووپەراتسيانىڭ باسىمدىقتارىن تالقىلادى. مەملەكەت باسشىسى نۇر- سۇلتان قالاسىنا كەلگەن اننا بەردەگە ءىلتيپات ءبىلدىرىپ، بۇل ونىڭ قازاقستان مەن ورتالىق ازياعا جاساعان العاشقى ساپارى ەكەنىن اتاپ ءوتتى.

«ءبىز دۇنيەجۇزىلىك بانكپەن اراداعى كوپجىلدىق سەرىكتەستىكتى جوعارى باعالايمىز. وسى ۋاقىت ارالىعىندا بانك ەلىمىزگە 6 ميلليارد دوللاردان استام ينۆەستيتسيا قۇيدى. قازىرگى تاڭدا سىزدەرمەن بىرلەسىپ، ءارتۇرلى 12 جوبانى، اتاپ ايتقاندا، كولىك، ءبىلىم بەرۋ، ەكولوگيا جانە قارجى سالالارىنداعى باستامالاردى جۇزەگە اسىرىپ جاتىرمىز»، - دەدى قاسىم- جومارت توقايەۆ.

مەملەكەت باسشىسى دۇنيەجۇزىلىك بانكتىڭ قازاقستانداعى ءبىرقاتار ەكولوگيالىق ماسەلەنى شەشۋگە ۇلەس قوسقانىن، سونىڭ ىشىندە، «سىرداريا وزەنىنىڭ ارناسىن رەتتەۋ جانە سولتۇستىك ارال تەڭىزىن ساقتاپ قالۋ» جوباسىنىڭ ەكىنشى كەزەڭىنە 1,5 ميلليارد دوللار كولەمىندە قارجىلاي قولداۋ كورسەتكەنىن ايتتى.

وسى رەتتە قاسىم- جومارت توقايەۆ ەكولوگيالىق پروبلەمالاردىڭ شەشىلۋىنە باسا ءمان بەرەتىنىن، «جاسىل ەكونوميكا» ماسەلەلەرىنە جانە اتالعان سالاداعى ىقپالداستىقتى جەكە باقىلاۋىنا الۋعا دايىن ەكەنىن جەتكىزدى. اننا بەردە قاسىم- جومارت توقايەۆقا كەزدەسۋگە مۇمكىندىك جاساعانى جانە دۇنيەجۇزىلىك بانكپەن اراداعى ىنتىماقتاستىقتى جوعارى باعالاعانى ءۇشىن ريزاشىلىعىن ءبىلدىردى. سونىمەن قاتار ول ەلىمىزدە قازاقستان پرەزيدەنتىنىڭ باسشىلىعىمەن جۇزەگە اسىرىلىپ جاتقان رەفورمالاردى قولدايتىنىن ايتتى.

سوڭعى جاڭالىقتار