قازاقستان پرەزيدەنتى فينليانديانىڭ ءمينيسترىن قابىلدادى
قاسىم- جومارت توقايەۆ نۇر- سۇلتان قالاسىنا جۇمىس ساپارىمەن كەلگەن فينليانديانىڭ سىرتقى ساۋدا جانە حالىقارالىق دامۋدى قولداۋ ءمينيسترى، ساۋدا- ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ تەڭ ءتوراعاسى ۆيللە سكينناريدى قابىلدادى. مەملەكەت باسشىسى مينيسترگە ءىلتيپات ءبىلدىرىپ، قازاقستاننىڭ سىرتقى ساياساتىندا سۋوميدىڭ ماڭىزدى ءرول اتقاراتىنىن اتاپ ءوتتى.
«فينليانديا سولتۇستىك ەۋروپا ەلدەرى اراسىنداعى قازاقستاننىڭ ەڭ ءىرى ينۆەستورى. ءبىز دوستاس ەكى ەلدىڭ بەلسەندى ءارى جان- جاقتى ىنتىماقتاستىعىن جوعارى باعالايمىز»، - دەدى پرەزيدەنت. مەملەكەت باسشىسى جوعارى دەڭگەيدەگى تۇراقتى ساياسي ديالوگتى قولداۋ قاجەت ەكەنىنە نازار اۋداردى. قاسىم- جومارت توقايەۆ فينليانديا پرەزيدەنتى ساۋلي نيينيستگە جۇرەكجاردى سالەمىن جولداپ، ونى قازاقستانعا رەسمي ساپارمەن كەلۋگە شاقىردى. ۆيللە سكينناري قاسىم- جومارت توقايەۆقا كەزدەسۋگە مۇمكىندىك جاساعانى ءۇشىن العىس ايتىپ، پاندەميا باستالعاننان بەرگى العاشقى رەسمي ساپارىن قازاقستاننان باستاعانىن اتاپ ءوتتى. ول مەملەكەت باسشىسىنا فينليانديا پرەزيدەنتىنىڭ سالەمىن جەتكىزدى.
«ءبىزدىڭ ەلدەرىمىز اراسىنداعى ەكىجاقتى قارىم- قاتىناس وتە جاقسى. فينليانديانىڭ تاۋەلسىزدىك العانىنا 100 جىلدان استى، ال قازاقستانعا - 30 جىل. پاندەميا اياقتالعاننان كەيىن ەكىجاقتى بايلانىستاردى دامىتۋدىڭ جاڭا كەزەڭى باستالاتىنىنا سەنىمدىمىز. ساياسي ديالوگتى تەرەڭدەتۋدە قازاقستان مەن فينليانديانىڭ الەۋەتى زور. اسىرەسە، ءوزارا ساۋدا- ساتتىقتى دامىتۋ جانە ينۆەستيتسيا تارتۋ ماڭىزدى»، - دەدى فينليانديا ءمينيسترى.
قاسىم- جومارت توقايەۆ بىرلەسكەن جوبالاردى جۇزەگە اسىرۋدا، اسىرەسە، جاسىل تەحنولوگيالار مەن تەلەكوممۋنيكاتسيا سالالارىنا باسىمدىق بەرىلەتىنىن جەتكىزدى. پرەزيدەنت شەتەلدىك ينۆەستورلار مەن فين تەحنولوگياسىن ترانسفەرتتەۋگە ءبىزدىڭ ەلىمىزدىڭ ەرەكشە جەڭىلدىكتەر جاساۋعا دايىن ەكەنىن اتاپ ءوتتى. ۆيللە سكينناري ەۋروپالىق وداق اياسىنداعى ىقپالداستىقتىڭ پەرسپەكتيۆالارى جاقسى ەكەنىن جەتكىزىپ، كليماتتىڭ وزگەرۋىنە قارسى كۇرەستە قابىلدانىپ جاتقان شارالاردى جانە ەكولوگيالىق ماسەلەلەردى شەشۋ، اۋىل شارۋاشىلىعى، ازىق- تۇلىك سەكتورىن دامىتۋ، سيفرلاندىرۋ، كيبەرقاۋىپسىزدىك جونىندەگى جوسپارلاردى قولدايتىنىن ايتتى.
فين تاراپى اتالعان سالالار بويىنشا ىقپالداستىق ورناتۋعا دايىن. وسى ورايدا ساۋدا- ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ جانە ونىڭ ەنەرگەتيكا، كولىك، اۋىل شارۋاشىلىعى، ءبىلىم سالالارى بويىنشا ءتورت جۇمىس توبىنىڭ قىزمەتىن جانداندىرۋ ماڭىزدى ەكەنى اتاپ ءوتىلدى. اڭگىمەلەسۋ بارىسىندا وڭىرلىك كۇن تارتىبىندەگى وزەكتى ماسەلەلەر قوزعالدى. اتاپ ايتقاندا رەسمي كومەك كورسەتۋدى دامىتۋ اياسىنداعى كووپەراتسيانىڭ، سونداي- اق، ورتالىق ازيانىڭ ەكولوگيالىق ماسەلەلەرىن شەشۋدىڭ جانە اۋعانستانداعى قاۋىپسىزدىك پەن تۇراقتىلىقتى كۇشەيتۋدىڭ الەۋەتى مول ەكەنى ايتىلدى.