مادەنيەت ءمينيسترى قاراقات باشانوۆانىڭ شىعارماشىلىعىن جان-جاقتى قولداۋعا ءازىر ەكەنىن ايتتى

نۇر-سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆا Junior Eurovision 2020 بايقاۋىنىڭ جۇلدەگەرى قاراقات باشانوۆاعا ەلوردا اكىمى بەرگەن ۋادەنىڭ ورىندالۋىنا ىقپال ەتەتىنىن ايتتى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن بريفينگىدە مادەنيەت جانە سپورت ءمينيسترى اقتوتى رايىمقۇلوۆاعا ەلورردا اكىمى التاي كولگىنوۆتىڭ Junior Eurovision 2020 جۇلدەگەرىنە بەرگەن ۋادەسىن ورىنداماي جۇرگەنى تۋرالى سۇراق قويىلدى.

ب ا ق وكىلىنىڭ ايتۋىنشا، ءانشى قىزدىڭ اپكەسى نۇر-سۇلتان اكىمى قاراقات باشانوۆاعا فورتەپيانو الىپ بەرۋگە ۋادە بەرگەنىمەن، ول ۋادەسىن ءالى ورىنداماعانىن مالىمدەگەن. مينيستر قاراقات باشانوۆانىڭ شىعارماشىلىعىن جان-جاقتى قولداۋعا ءازىر ەكەنىن ايتتى.

«قاراقات باشانوۆا - كۇلاش بايسەيىتوۆا اتىنداعى ەڭ بەلدى رەسپۋبليكالىق مۋزىكالىق مەكتەپتىڭ وقۋشىسى. ءوزى ءبىرىنشى سىنىپتان بەرى وسى مەكتەپتە وقيدى، الماتى وبلىسىندا تۇرادى. Junior Eurovision بايقاۋىنا قاتىسقان كەزدە مينيسترلىكتىڭ قارجىلاي كومەكتەسكەنىن بىلەسىزدەر. كونكۋرسقا اتتاناردان بىرنەشە كۇن بۇرىن مەن قاراقاتپەن كەزدەسكەن بولاتىنمىن. سول كەزدە ونىڭ ماتەريالدىق جاعىنان ۇسىنىستارى بولعان جوق. ۇسىنىس بولسا، قولداۋعا ءازىرمىز»، - دەيدى اقتوتى رايىمقۇلوۆا.

مينيستر انشىگە بەرىلگەن ۋادەلەردىڭ ورىندالۋىنا ىقپال ەتۋگە ءازىر ەكەنىن دە ءبىلدىردى.

«ارينە، ءوزىمىزدىڭ ارىپتەستەرىمىزگە حابارلاسامىز. جەرگىلىكتى اتقارۋشى ورگاندارعا، سونىڭ ىشىندە نۇر-سۇلتان قالاسىنداعى ارىپتەستەرىمىزگە حابارلاسامىز. ءبىزدىڭ مينيسترلىكتە جاس تالانتتاردى قولدايتىن بيۋدجەتتىك باعدارلاما بار. وسى بيۋدجەت اياسىندا حالىقارالىق كونكۋرستارعا كوپتەگەن جاس ونەرپازدارىمىز قاتىسىپ جاتىر. ول باعىتتا دا قاراقاتقا كومەكتەسۋگە دايىنبىز»، - دەدى ۆەدومستۆو باسشىسى.