زايساندا مال قىرىلىپ جاتىر

نۇر-سۇلتان. قازاقپارات - «مالىم جانىمنىڭ ساداعاسى.. .» دەپ وتىرعان زايساندىقتاردىڭ قوي- قوزىسى قىناداي قىرىلىپ جاتىر. شىلىكتى، جالشي، قاراساي اۋىلدارىندا جۇزدەگەن باس مال ولگەن.

شىعىس قازاقستان وبلىستىق ۆەتەريناريا باسقارماسىنىڭ ماماندارى مالدىڭ كۇيى بولماعان سوڭ قىرىلدى دەسە، اۋىلدىقتار بۇل پىكىردى جوققا شىعارىپ وتىر. جۇقپالى اۋرۋ ما دەپ قاۋىپتەنەدى.

ءساۋىردىڭ سوڭىنا قاراي شىلىكتى اۋىلدىق وكرۋگىندە ءتورت تۇلىك تۇسىنىكسىز سەبەپتەن ولە باستاعان. مالمەن كۇن كورىپ وتىرعان اۋىل حالقى مىڭ جەردەن شىر- پىر بولعانىمەن، اۋدان باسشىلىعى نازار اۋدارماعان سەكىلدى. ماسەلەگە جۋرناليستەر ارالاسقان سوڭ عانا اكىمدىكتىڭ وكىلدەرى اۋىلدا توبە كورسەتكەن. ولگەن مالدان تالداما العانىمەن، ناتيجەسى ءالى شىققان جوق. الايدا اۋرۋدىڭ بىردەن- ءبىر سەبەبى - مالدىڭ قىستان كوتەرەم بولىپ شىعۋى دەسەدى وبلىستىق ۆەتەريناريا سالاسىنىڭ وكىلدەرى.

- ەشقانداي جۇقپالى اۋرۋ جوق. مال قىستاي جايىلىمدا جۇرگەن. قوسىمشا ازىق بولماعاندىقتان، يممۋنيتەتتەرى تومەندەگەن. ونىڭ ۇستىنە 27-28-ساۋىردە جاۋىن جاۋدى. جاس مال كۇن رايىنىڭ كۇرت سۋىعانىن كوتەرمەي ولە باستاعان. ونى ءبىز كەش ەستىدىك. الدىن الا دياگنوز بويىنشا، مالدى دۇرىس كۇتپەگەندىكتەن وسىنداي جاعداي ورىن الىپ وتىر. بۇگىندە «نۇرداۋلەت» شارۋا قوجالىعىنان 1 باس قوزى ولگەنى راستالدى. الدىنداعى ونداعان مالدىڭ ولگەنى تۋرالى دەرەكتەر ءبىزدىڭ قولىمىزدا جوق. سونداي- اق ءار ۇيدە 7 بۇزاۋ ولگەنى انىقتالدى. ودان سىناما الىندى. زەرتحانا تەكسەرگەن سوڭ ناقتى دياگنوزدى قويامىز، - دەدى ۆەتەريناريا باسقارماسى باسشىسىنىڭ ورىنباسارى ەرتاي باتحولدين.

كوتەرەمدىكتى كوتەرمەي ەنەلەرى ولسە ولگەن شىعار، ال كوكتەمگى ءتول نەدەن قىرىلىپ جاتىر؟ تۇياقتارى سىپىرىلىپ ءتۇسىپ جاتقان قوزى مەن كۇنى كەشە ويناقتاپ جۇرگەن بۇزاۋ نەگە اياق استى سەرەيىپ قالادى؟ مالدىڭ اۋزى كوككە تيگەنى قاشان؟ ! ءىرى قارانىڭ دا ۇرت تەرىسى ۇگىلىپ ءتۇسىپ جاتىر. اشىققان مالدا مۇنداي بەلگى بولا ما؟ ۆەتەريناريا باسقارماسى ءوز- وزدەرىن اقتاعانىمەن، بۇل سۇراقتارعا تولىققاندى جاۋاپ بەرمەدى. ايتقانداي، ءبىر قوزى ەمەس، جۇزدەگەن قوزىنىڭ ولەكسەسىن شۇڭقىرعا تاستاعان ەل. جاعداي ورشىمەۋى ءۇشىن اۋىلدىقتار ءوز بىلگەندەرىمەن ەم جاساپ الەك.

- ەكى رەت ساراپتاماعا دەپ تالداما الىپ كەتكەن. ناتيجەسى ءالى شىققان جوق. قانداي اۋرۋ ەكەنى بەلگىسىز. جوعارىدان كەلگەن باسشىلار مال ارىق دەپ اۋەلى وزىمىزگە كىنا تاعىپ وتىر. ءىرى قارانىڭ ۇرتى، ءتىلىنىڭ تەرىسى سىپىرىلىپ جاتىر. اۋىلدىڭ مال دارىگەرلەرىنە دە جاعداي جاسالماعان. جاياۋ- جالپى ءجۇر. قوجالىقتاردىڭ اراسى كەم دەگەندە قىرىق شاقىرىم. جۇمىس ىستەۋلەرىنە ەش مۇمكىندىك جوق. ويتكەنى بىلتىرعى ءتول ءالى سىرعالانباعان. بۇل ءوز الدىنا ۇلكەن ماسەلە. بىزگە مىناۋ جۇتتى توقتاتۋ كەرەك. وزىمىزشە بىرىمىزدەن- ءبىرىمىز ەستىپ، ەم قولدانىپ جاتىرمىز. ۆەتەرينارلار تىم بولماعاندا تاجىريبە ءۇشىن ءتورت- بەس مالدى ءبولىپ الىپ ەمدەپ كورۋ كەرەك ەدى. العاشىندا انىقتاپ، كارانتينگە جاپسا، مۇنشاما شىعىن بولماس پا دەپ ويلايمىز. كىم ءبىلسىن؟ ! قازىر ولەكسە جيناپ، شۇڭقىرعا تاستاۋدىڭ ءوزى جۇمىس بولدى. اۋرۋدىڭ تارالۋ اۋماعى ۇلكەيىپ بارادى، - دەيدى «نۇرداۋلەت» شارۋا قوجالىعىنىڭ وكىلى ايبول لەكەروۆ.

بۇگىندە شىلىكتى اۋىلدىق وكرۋگىندە ناقتى قانشا مال ولگەنى بەلگىسىز. سەبەبى اكت جاسالعان جوق. اۋىل تۇرعىندارى ايتقانداي، مال دارىگەرلەرىنىڭ جۇمىس ىستەۋلەرىنە كەدەرگى جەتىپ ارتىلادى. بۇل ماسەلە جىل باسىندا «egemen Qazaqstan» گازەتىندە كوتەرىلگەن.

ايتا كەتسەك، اۋىل- اۋىلدىڭ اراسىندا جۇرگەن مال دارىگەرلەرىندە كولىك جوق. بار كولىكتەرىنىڭ جۇرۋىنەن تۇرۋى كوپ. سەبەبى قوسالقى بولشەكتەرگە اقشا بولىنبەيدى. ەكپە جۇمىستارى كەزىندە ءبىر ينەنى موينى ۇزىلگەنشە پايدالانادى. العان قاندى ساقتاۋ ءۇشىن ارنايى تەرموسومكە دە جوقتىڭ قاسى. تىزە بەرسەك ماسەلە جەتەرلىك. ونى وبلىستىق ۆەتەريناريا باسقارماسىنىڭ باسشىسى راميل ساعىندىقوۆ تا جوققا شىعارماعان. بۇل ماسەلەدەن بولەك، ايلىقتارى دا ماردىمسىز. شىلىكتى اۋىلدىق وكرۋگىنىڭ باس مال دارىگەرى اسقار تۇسىپبايەۆ تا جالاقىنىڭ ازدىعىن العا تارتادى.

- شىلىكتى وكرۋگىنە بەس اۋىل قارايدى. قوسىمشا قىستاقتار بار. ال ۆەتەرينارلاردىڭ اۋىلداردى ارالاپ جۇمىس ىستەۋى قيىن. ەڭ باستىسى، ايلىعىمىز ماردىمسىز. قىزمەتتىك كولىك ەسكى. قوسالقى بولشەكتەر جوق. كەرەك- جاراقتارىن بەرگەنىمەن ساپاسىز. ينەنى ءوزىمىز ساتىپ الامىز. مال ەگۋگە ۆەتەرينارلار ءوز كولىكتەرىمەن بارادى. شتات سانى دا جەتكىلىكسىز. مال باسى ءوسىپ بارادى. ۇلگەرمەيمىز. جاعداي جاسالماسا، بۇدان دا زورعىسى بولادى، - دەيدى شىلىكتى اۋىلدىق وكرۋگىنىڭ باس مال دارىگەرى اسقار تۇسىپبايەۆ.

ءيا، باسشىلاردىڭ شىمبايىنا تيسە دە شىندىقتى ايتتى. شىندىقتى ايتقانداردىڭ سوڭىنا شام الىپ تۇسپەسە يگى. ايتپەسە، سۇراق قويعانداردىڭ جۇمىسىنان كىنارات ىزدەپ، تۇرتپەكتەۋ سىندى قيتۇرقى ارەكەتتەر كاتونقاراعاي اۋدانىندا بولعانىن قۇلاعىمىز شالعان. ودان دا ۆەتەريناريا سالاسىنا مينيسترلىكتىڭ شىنايى كوڭىل ءبولىنۋىن تىلەيىك. بۇيتە بەرسە، اسقار تۇسىپبايەۆ ايتقانداي، بۇدان زورعىسى بولادى.

مەرەي قاينار ۇلى

شىعىس قازاقستان وبلىسى، زايسان اۋدانى

egemen.kz