جالعىزباستى ايەلدەردى الداپ كەلگەن تەمىرتاۋلىق جىگىت ۇستالدى

پەتروپاۆل. قازاقپارات - پەتروپاۆلدا جالعىزىلىكتى ايەلدەردىڭ سەنىمىنە كىرىپ، كەيىن پاتەرلەرىن توناعان تەمىرتاۋ قالاسىنىڭ تۇرعىنى ۇستالدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليسيا دەپارتامەنتى باسپا ءسوز قىزمەتىنىڭ مالىمەتىنشە، كريمينالدىق پوليسيا قىزمەتكەرلەرى پەتروپاۆل قالالىق پوليسيا باسقارماسىنداعى ارىپتەستەرىنىڭ كومەگىمەن ىزدەۋدە جۇرگەن تەمىرتاۋ قالاسىنىڭ تۇرعىنىن ۇستادى. بۇعان دەيىن سوتتالعان 34 جاستاعى ەر ادام جالعىزىلىكتى ايەلدەرمەن تانىسىپ، ولاردىڭ سەنىمىنە كىرگەن. 1-2 ايدان كەيىن پاتەردە ەشكىم بولماعان كەزدە قولىنا تۇسكەن باعالى زاتتاردى الىپ، ءىزىن جاسىرعان. ول وسىعان ۇقساس قىلمىستاردى پاۆلوداردا، تەمىرتاۋ مەن اباي قالالارىندا (قاراعاندى وبلىسى) جاساعان. ەر ادام ءساۋىر ايىنان بەرى ىزدەۋدە بولعان.

قىلمىسكەر پەتروپاۆلدا ءجۇرۋى مۇمكىن دەگەن اقپارات تۇسىسىمەن سولتۇستىك قازاقستاندىق پوليسەيلەر جەدەل- تەرگەۋ ءىس- شارالارىن جۇرگىزدى. سونىڭ ىشىندە جالعا بەرىلەتىن پاتەرلەر تەكسەرىلدى. سولاردىڭ بىرىندە ەر ادام ۇستالدى.

«ەر ادام جالعىزىلىكتى ايەلمەن تۇرعان. ايەل ونى ءوز اقشاسىنا اسىراپ كەلگەن. كۇدىكتى جالعان ەسىممەن تانىسقان. قازىرگى ۋاقىتتا ول تەمىرتاۋ قالالىق پوليسيا باسقارماسىنا بەرىلدى. جالپى، جىل باسىنان كريمينالدىق پوليسەيلەر وبلىس بويىنشا 7 قىلمىسكەردىڭ جۇرگەن جەرىن انىقتادى. سونداي- اق قاراعاندىلىق ارىپتەستەرىمىز ءۇشىن ءبىر قىلمىسكەردى جانە شەتەلدىك قۇقىق قورعاۋ ورگاندارى ءۇشىن 12 ادامدى ۇستاپ بەردىك»، - دەيدى س ق و پ د كريمينالدىق پوليتسيا باسقارماسىنىڭ باستىعى پەتر كليموۆ.