الماتى اكىمدىگى اعاشتان ءتۇسىپ جاتقان قۇرتتارعا قاتىستى تۇسىنىك بەردى
الماتىدا 15 -ساۋىردەن باستاپ جاسىل جەلەكتەردى زيانكەستەرگە قارسى وڭدەۋ جۇمىستارى جۇرگىزىلۋدە. وڭدەۋدەن كەيىن اعاشتاردان قۇرتتار توگىلدى. وسىعان بايلانىستى جاسىل ەكونوميكا باسقارماسى تۇسىنىكتەمە بەردى.
«الاڭداۋعا ەشقانداي نەگىز جوق. جاپىراق ەگەۋىش قۇرتتار ادامدارعا قاۋىپ توندىرمەيدى. قۇرتتار وڭدەۋدەن كەيىن ءتورتىنشى- بەسىنشى كۇندەرى ءولىپ قالادى»، - دەپ حابارلادى باسقارمادان. باسقارما تاراتقان مالىمەتكە سايكەس، جۇمىس بارىسىندا قازاقستاندا قولدانۋعا رۇقسات ەتىلگەن، قاۋىپتىلىگى تومەن جانە ارنايى سەرتيفيكاتتالعان پرەپاراتتار پايدالانىلادى.
«حيميالىق زاتتارعا قاراعاندا، مۇنداي بيولوگيالىق قورعانىس زاتتارىنىڭ باستى ەرەكشەلىگى - ولاردىڭ ادامدارعا جانە قورشاعان ورتاعا زيانى جوق. سونىمەن قاتار، مۇنداي پرەپاراتتار زيانكەستەردە تاۋەلدىلىكتى جانە پاتوگەندى ميكروورگانيزمدەردە قارسىلىقتى تۋدىرمايدى - ولاردى كوپتەگەن جىلدار بويى، قولداناتىن زاتتىڭ تۇتىنۋ نورماسىن ارتتىرماي، ءتيىمدى پايدالانۋعا مۇمكىندىك بەرەدى»، - دەپ اتاپ ءوتتى قالالىق جاسىل ەكونوميكا باسقارماسىنان.
اۆتور: الما مۇقانوۆا