زايسان اۋدانىندا مال قىرىلىپ جاتىر - ش ق و

وسكەمەن. قازاقپارات - شىعىس قازاقستان وبلىسى زايسان اۋدانىندا مالدىڭ قىرىلۋ سەبەپتەرى انىقتالۋدا، دەپ حابارلايدى قازاقپارات ءتىلشىسى.

28 -ءساۋىر مەن 12 -مامىر ارالىعىندا زايسان اۋدانى شىلىكتى اۋىلدىق وكرۋگىندە جاپپاي مال قىرىلۋدا. مال يەلەرىنىڭ ايتۋىنشا، 12 باس ءىرى قارا جانە 100 باس ۇساق مال ولگەن. قازىرگى ۋاقىتتا ماماندار بۇنىڭ سەبەبىن انىقتاۋدا. وسى جايلى ش ق و ۆەتەريناريا باسقارماسى باسشىسىنىڭ ورىنباسارى ەرتاي باتحولدين مالىمدەدى.

«شىلىكتى اۋىلدىق وكرۋگىندە 17 ازاماتتان 100-گە جۋىق ءىرى قارا، 110 باس قوي- ەشكى دەرتكە شالدىققان. سول جەردە ۆەتەريناريالىق دارىگەرلەر حالىقپەن بىرلەسىپ، اۋرۋ مالدى ەمدەۋدە»، - دەدى ول.

وكرۋگ اۋماعىن تەكسەرۋ بارىسىندا 12 باس ءىرى قارا، ونىڭ ىشىندە 7 بۇزاۋ، 5 ءىرى قارا، 1 قوزىنىڭ ولەكسەلەرى تابىلدى. ماماندار 1 قوزى مەن 1 بۇزاۋدان پاتولوگيالىق تەكسەرۋ ءۇشىن سىناما العان.

«اتالعان اۋىلدىق وكرۋگتەگى بارلىق مال باسى قىس مەزگىلىنەن كوتەرەم شىققان. 25-28 -ءساۋىر ارالىعىندا اۋا تەمپەراتۋراسىنىڭ تومەندەپ، قار ارالاس جاۋىن جاۋدى. وسىعان بايلانىستى السىرەگەن مال قولايسىز اۋا- رايى سالدارىنان ءولىپ جاتىر. اۋىرعان مالدان پاتولوگيالىق سىنامالار الىنىپ، وبلىستىق زەرتحاناعا تاپسىرىلدى»، - دەدى ش ق و ۆەتەريناريا باسقارماسى باسشىسىنىڭ ورىنباسارى.

شىلىكتى اۋىلدىق وكرۋگىندە بارلىعى 10 جارىم مىڭ باس ءىرى قارا، 24 مىڭنان استام ۇساق مال، 52 مىڭ جىلقى، 150 يت، 2343 قۇس، 52 مىسىق تىركەلگەن. مال جىل بويى جايىلىمدا ۇستالادى.

ايتا كەتەيىك، 2021 -جىلعى ۆەتەريناريالىق- پروفيلاكتيكالىق شارالار تولىق كولەمدە ورىندالعان. اتاپ ايتقاندا، نودۋليارلىق دەرماتيتكە، ەمكارعا، قۇتىرۋ، ءسىبىر جاراسى، جۇقپالى جىلقى اۋرۋلارىنا قارسى ۋاقتىلى ەكپە سالۋ جۇمىستارى جۇرگىزىلدى. اتالعان وكرۋكتە سوڭعى 3 جىلدا مال شارۋاشىلىعى بويىنشا قاۋىپتى ىندەت تىركەلمەگەن.

اۆتور: تالعاتجان مۇحامەتبەك ۇلى