جەڭىلدىكپەن اۆتونەسيە الۋ ءۇشىن قارجى قاشان بولىنەدى؟
وسى تۇستا «يمپورتتىق كولىكتەر تاپشىلىعىنا قاراماستان شاعىن كروسسوۆەرلەرگە دە سۇرانىس جوعارى» دەيدى ماماندار. ءبىراق شەتەلدىك كولىكتەردى رەسپۋبليكامىزعا جەتكىزۋ ۋاقىتى ۇزارعان.
ارتۋر ميسكاريان، «قازاۆتوپروم» وداعى باسقارما ءتوراعاسىنىڭ ورىنباسارى:
- يمپورتتىق كولىكتەردى كۇتۋ ۋاقىتى ونىڭ تۇرىنە، قۇرىلىمىنا بايلانىستى ەكەنىن ەسكەرۋ كەرەك. سوڭعى ۋاقىتتا شەتەلدىك تەمىر تۇلپارلاردىڭ جەتكىزىلۋ مەرزىمى ۇزارعانى بايقالادى. بۇل سالاداعى ءوندىرىس تىزبەگىنىڭ بۇزىلۋىمەن بايلانىستى. مىسالى، وڭتۇستىك- شىعىس ازيا ەلدەرىندە كولىكتەرگە ارنالعان ميكروسحەمالار زاۋىتتارىنىڭ جۇمىسى ۋاقىتشا توقتاپ تۇردى. سول سياقتى باسقا بولشەكتەردىڭ ءوندىرىس قۋاتتىلىعىندا وزگەرىستەر بايقالدى. سالدارىنان تەمىر تۇلپارلاردى قۇراستىرۋ مەرزىمى ۇلعايعان.
بۇعان قاراماستان وتاندىق كولىك نارىعى ءوسىپ كەلەدى. باعالار دا كوتەرىلگەن. بىلتىر كولىكتەر 20 پروتسەنتكە قىمباتتاۋى تىركەلدى. قازاقستاندىقتار جەڭىلدەتىلگەن اۆتونەسيە باعدارلاماسىنا بولىنەتىن كەزەكتى اقشا اۋدارىمىن كۇتىپ وتىر. جىل باسىنان بەرى جەڭىلدەتىلگەن نەسيەمەن تەك 302 وتاندىق كولىك ساتىلعان. وتكەن جىلدىڭ وسى كەزەڭىندە 21 مىڭنان استام كولىك وسى باعدارلاما ارقىلى نەسيەلەندىرىلدى. بۇل قازاقستان دامۋ بانكىنىڭ دەرەگى.
وتكەن جىلى جەڭىلدەتىلگەن اۆتونەسيە باعدارلاماسىنا 20 ميلليارد تەڭگە ءبولىندى. ۇلتتىق بانك بۇل باعدارلاماعا 2019 -جىلدان باستاپ 2023 -جىلعا دەيىن جىل سايىن وسىنشاما كولەمدە قارجى ءبولۋ تۋرالى شەشىم قابىلداعان ەدى. الايدا وسى جىلعا ارنالعان قاراجات قاشان تۇسەتىنى ازىرگە بەلگىسىز. ال بۇعان قاتىستى يندۋستريا جانە ينفراقۇرىلىمدىق دامۋ مينيسترلىگى بىلاي دەپ جاۋاپ بەردى:
«بيىل ۇلتتىق بانك قاراجاتىنان 20 ميلليارد تەڭگە كولەمىندە كەزەكتى ترانش جىبەرۋ كوزدەلگەن ەدى. ءبىراق اقشا ءالى تۇسپەي وتىر. ءبىز قازاقستاننىڭ دامۋ بانكىنە قارجى مەيىلىنشە تەز بولىنەدى دەپ ۇمىتتەنەمىز».
سونداي- اق باعدارلاماعا قاتىساتىن ەدب اراسىندا قارجىنى ءبولۋ تۋرالى شەشىم قابىلدانعاننان كەيىن جۇرتشىلىقتى حاباردار ەتۋگە ۋادە بەردى. ەسكە سالايىق، جەڭىلدەتىلگەن نەسيەمەن الىناتىن كولىكتەرگە ارنايى تالاپتار قويىلادى. ول قازاقستاندا جاسالۋى ءتيىس. قۇنى 15 ميلليون تەڭگەدەن اسپايتىن تەمىر تۇلپار بولۋى دا شارت. سوندا عانا كولىكتى ساتىپ الۋ ءۇشىن جىلدىق مولشەرلەمەسى 4 پروتسەنت بولاتىن جەتى جىلعا دەيىن نەسيە بەرىلەدى.
قازاقستاندا جاسالعان ەلەكتروموبيلدەر ەندى ەكوتاكسي تۇرىندە قولدانىلادى. مىسالى، مەدەۋ- شىمبۇلاق باعىتىنا ەلەكتر قۋاتىمەن جۇرەتىن كولىكتەر قاتىناماق. وسى ماقساتتا سەگىز كولىك قىزمەت كورسەتەدى. قازىر مۇنداي كولىكتەردى جىلدام قۋاتتايتىن ەلەكتر ستانسيالارىن سالۋ اياقتالدى. ەكوتاكسي ايماقتاعى سانيتارلىق- ەپيدەميولوگيالىق جاعداي تۇراقتانعاننان كەيىن ىسكە قوسىلادى.
ايتا كەتۋ كەرەك، ەكوتاكسي قىزمەتىن قازاقستاندا شىعارىلعان ەلەكتر كولىكتەر اتقارادى. بولجام بويىنشا ەلەكتروموبيلدەرمەن شاڭعى بازاسىنا جىلىنا 150 مىڭنان استام ادام قاتىنايدى. بۇل تۋرالى وندىرۋشىلەردىڭ كەڭەيتىلگەن مىندەتتەمەلەرى وپەراتورى حابارلادى. الداعى بەس جىلدا الەمدە ساتىلاتىن كولىكتەردىڭ جارتىسىنان كوبى ەلەكتروموبيلدەر بولماق. بوستون كونسالتينگتىك توبى وسىنداي بولجام جاسادى.
وتكەن جىلى كومپانيا ساراپشىلارى بۇل كورسەتكىشكە تەك 2030 -جىلعا قاراي قول جەتكىزۋگە بولادى دەپ مالىمدەگەن. ءبىراق پاندەميا كەزىندە ەلەكتر قوزعالتقىشتارعا سۇرانىس ارتتى. سوندىقتان ماماندار ءوز بولجامدارىن قايتا قاراپ، وسىنداي توقتامعا كەلىپتى.
www.24.kz