قاي ءوڭىردىڭ تۇرعىندارى كارانتين تالابىن ءجيى بۇزادى

نۇر-سۇلتان. قازاقپارات - قازاقستاندا ازاماتتار مەن كاسىپكەرلىك سۋبەكتىلەرىنىڭ كارانتين شارالارىن ساقتاۋىنا جۇرگىزىلەتىن مونيتورينگ جالعاسىپ جاتىر، دەپ حابارلايدى قازاقپارات.

سانيتارلىق- ەپيدەميولوگيالىق باقىلاۋ كوميتەتىنىڭ مالىمەتىنە سەنسەك، 1-قاڭتار مەن 10-مامىر ارالىعىندا جۇمىسشى توپ 80352 رەيد جۇرگىزگەن. ەل اۋماعىندا 500646 نىسان تەكسەرۋمەن قامتىلدى. ناتيجەسىندە 14475 (%2,8) زاڭبۇزۋشىلىق انىقتالدى.

كارانتين تالابىن بۇزۋ فاكتىلەرىنىڭ باسىم كوپشىلىگى مىنا وڭىرلەردە تىركەلدى: ش ق و (3646)، تۇركىستان (2230)، الماتى (2036)، شىمكەنت (1609) جانە الماتى وبلىسى (962). ​

مونيتورينگ بارىسىندا انىقتالاتىن نەگىزگى بۇزۋشىلىقتار: كارانتين كەزەڭىندە قىزمەتىنە تىيىم سالىنعان وبەكتىلەردىڭ جۇمىس جاساۋى، شەكتەۋ رەجيمىن ساقتاماۋ، شامادان تىس ادام جيناي وتىرىپ، بۇقارالىق ءىس- شارالار وتكىزۋ.

​اتالعان مەرزىمدە 268 ماتەريال سوتقا جولداندى.

سوت شەشىمىمەن 70 نىساننىڭ جۇمىسى توقتاتىلدى. 8271 كاسىپكەرلىك نىسان مەن 6425 جەكە تۇلعاعا اكىمشىلىك حاتتاما تولتىرىلىپ، 1,155 ميلليارد تەڭگەدەن استام ايىپپۇل سالىندى.