USD 434.24 EUR 492.69
RUB 5.67 CNY 68.46
جاڭالىقتار

سەناتور سولتۇستىك ايماققا قونىستاندىرۋ باعدارلاماسىن جۇزەگە اسۋ بارىسىن سىنعا الدى

13 مامىر 12:35
:ءبولىسۋ
سەناتور سولتۇستىك ايماققا قونىستاندىرۋ باعدارلاماسىن جۇزەگە اسۋ بارىسىن سىنعا الدى

نۇر-سۇلتان. قازاقپارات - پارلامەنت سەناتىنىڭ جالپى وتىرىسىندا دەپۋتات ءالىمجان قۇرتايەۆ ەلىمىزدىڭ وڭتۇستىك ءوڭىرىنىڭ تۇرعىندارىن سولتۇستىك ايماققا قونىستاندىرۋ جونىندەگى باعدارلامانىڭ جۇزەگە اسۋ بارىسىن سىنعا الدى.

وسى ورايدا ول ۇكىمەت باسشىسىنىڭ ورىنباسارى ەرالى توعجانوۆتىڭ اتىنا دەپۋتاتتىق ساۋال جولدادى، دەپ حابارلايدى قازاقپارات ءتىلشىسى.

سەناتوردىڭ پىكىرىنشە، اكىمدىكتەر كوبىنەسە قونىس اۋدارۋشىلارعا ءومىر ءسۇرۋ مەن ەڭبەك ەتۋگە لايىقتى جاعداي جاساماي وتىر.

«كوشۋگە نيەت بىلدىرگەن وتباسى قونىس اۋدارۋشىلاردى قابىلدايتىن اۋداندار تۋرالى اقپاراتقا تولىقتاي قول جەتكىزە المايدى. سوندىقتان ولاردىڭ تاڭداۋى شەكتەۋلى بولىپ وتىر. كەيبىر اكىمدىكتەر وتباسىن قالاعان اۋىلعا ەمەس، اكىمدىك ءوزى كورسەتكەن اۋىلعا جىبەرەدى. تاعى ءبىر ماسەلە - تۇرعىن ءۇي جايى. كەيبىر وڭىرلەردە جاڭا جەكە تۇرعىن ۇيلەردى سالۋ جۇمىستارىمەن فەرمەرلىك شارۋاشىلىقتار اينالىسادى جانە ۇيلەردى رەسمي كەلىسۋ پروتسەسىن تولىق وتكىزبەستەن سالا بەرەدى. باق- تا جاريالانعان اقپاراتقا سايكەس، قۇرىلىستىڭ ساپاسى قويىلاتىن تالاپتارعا جاۋاپ بەرمەيدى»، - دەدى ءالىمجان قۇرتايەۆ.

سەناتوردىڭ ۇسىنىسى - ءتۇسىندىرۋ جۇمىستارىن كۇشەيتۋ. ول ءۇشىن كەم دەگەندە جىبەرۋشى جانە قابىلداۋشى سالالاردا Call-ورتالىقتار اشۋ قاجەت. وندا قونىس اۋدارۋشىلارعا تولىق اقپارات جانە ولارداعى بارلىق سۇراقتارعا جاۋاپتار بەرىلۋى كەرەك.

«اتالعان Call-ورتالىقتاردىڭ ءتيىمدى جۇمىس ىستەۋى ءۇشىن بوس جۇمىس ورىندارى، تۇرعىن ۇيمەن قامتاماسىز ەتۋ، كورسەتىلگەن وبلىستاردا شارۋاشىلىقتىڭ قانداي تۇرىمەن اينالىسۋعا بولاتىنىن، سونداي- اق ماسەلەلەر بويىنشا كوشۋگە نيەت بىلدىرگەن ازاماتتاردى حاباردار ەتە الاتىن مامانداردى تارتۋ كەرەك»، - دەدى دەپۋتات. سەناتور بانك نەسيەلەرى بار كوشىپ- قونۋشىلارعا 6 ايدان 1 جىلعا دەيىنگى مەرزىمگە نەسيەلىك دەمالىس بەرۋدى ۇسىنىپ وتىر. بۇل كوبىنەسە كوشۋ پروتسەسىندە تۋىندايتىن قارىزداردان كەيىن ازاماتتارعا سۋبسيديا بەرۋدەن باس تارتىلاتىن بولعاندىقتان اسا ماڭىزدى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات