ەرلان قارين: جەر تۋرالى جاڭا زاڭ - بيلىكتىڭ ءتۇرلى داقپىرت پەن قاۋەسەتكە بەرگەن ناقتى جاۋابى

None
None
نۇر- سۇلتان. قازاقپارات - پرەزيدەنتتىڭ كومەكشىسى ەرلان قارين بۇگىن قابىلدانعان جەر قاتىناستارى تۋرالى زاڭعا قاتىستى پىكىر ءبىلدىردى، دەپ حابارلايدى قازاقپارات.

«اۋىل شارۋاشىلىعى جەرلەرىن شەتەلدىكتەرگە ساتۋ جانە جالعا بەرۋ تۋرالى كوپ جىلعا سوزىلعان قىزۋ تالقىعا ءبىرجولا جانە تۇبەگەيلى نۇكتە قويىلدى. بۇگىن مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى.

قاسىم- جومارت توقايەۆ وسى نورمانى زاڭ جۇزىندە بەكىتۋ تۋرالى شەشىمدى بيىلعى 25-اقپاندا ۇلتتىق قوعامدىق سەنىم كەڭەسىنىڭ V وتىرىسىندا جاريالاعان بولاتىن. 12-ناۋرىزدا پرەزيدەنت ءتيىستى زاڭ جوباسىن پارلامەنتتىڭ قاراۋىنا ارنايى جولداعان ەدى. بۇل - پرەزيدەنتتىڭ زاڭ شىعارۋ باستاماشىلىعى بويىنشا ازىرلەنگەن العاشقى زاڭ جوباسى. سول ارقىلى قاسىم- جومارت توقايەۆ اۋىل شارۋاشىلىعى ماقساتىنداعى جەرلەردى شەتەلدىكتەرگە ساتۋعا جانە جالعا بەرۋگە تىيىم سالۋ تۋرالى ماسەلەنى ءبىرجولا شەشكىسى كەلەتىنىن ناقتى كورسەتتى» دەپ جازدى ەرلان قارين Facebook پاراقشاسىندا.

ونىڭ ايتۋىنشا، وتكەن اپتادا زاڭ جوباسى پارلامەنتتە ەگجەي- تەگجەيلى جانە جان- جاقتى تالقىلانىپ، دەپۋتاتتار ماقۇلداعان سوڭ، مەملەكەت باسشىسىنا قول قويۋعا ۇسىنىلعان.

«ءىس جۇزىندە پرەزيدەنتتىڭ جەر تۋرالى زاڭى اۋىل شارۋاشىلىعى ماقساتىنداعى جەرلەردى شەتەلدىكتەردىڭ ساتىپ الۋىنا جانە جالعا الۋىنا توسقاۋىل قويدى. بۇل - بيلىكتىڭ ءتۇرلى داقپىرت پەن قاۋەسەتكە بەرگەن ناقتى جاۋابى. سوندىقتان، وسى ماسەلە بويىنشا جۇرتتى دۇربەلەڭگە سالۋعا بۇدان بىلاي ەش نەگىز جوقتىعىنا تاعى دا باسا نازار اۋدارعىم كەلەدى. جالپى، اتالعان قۇجات «حالىق ۇنىنە قۇلاق اساتىن مەملەكەت» تۇجىرىمداماسىنىڭ تيىمدىلىگىن، قوعامدىق جانە جالپىۇلتتىق ديالوگ ارقىلى ناقتى ناتيجەگە قول جەتكىزۋگە بولاتىنىن تاعى ءبىر مارتە كورسەتتى. ەل دامۋىنىڭ ۇزاقمەرزىمدى مۇددەسىنە ساي كەلەتىن ءدال وسىنداي ۇستانىمدار - پرەزيدەنتتىڭ ساياسي باعدارىنىڭ وزەگى» دەپ تۇيىندەيدى ءسوزىن پرەزيدەنتتىڭ كومەكشىسى.



سوڭعى جاڭالىقتار