ريددەردە ابدەن قالجىراعان ءورت سوندىرۋشىلەردىڭ ۆيدەوسى كوپشىلىكتى ەلجىرەتتى
الەۋمەتتىك جەلىلەردە قىزىل جالىنمەن 2 كۇن بويى دامىلسىز ارپالىسقان ءورت سوندىرۋشىلەردىڭ ابدەن قالجىرىپ، ۇيقىعا باس قويعان ۆيدەوسى جاريالاندى.
جەلى قولدانۋشىلارى ماڭداي تەر مەن بىرلەسكەن كۇش- جىگەردىڭ ارقاسىندا ءورتتى جەڭگەن قۇتقارۋشىلارعا ريزاشىلىقتارىن بىلدىرۋدە. اتالمىش ۆيدەودا راسىمەندە ريددەر ورمان شارۋاشىلىعىنداعى الاپات جالىنمەن كۇرەسكەن ءورت سوندىرۋشىلەر ەكەندىگىن شىعىس قازاقستان وبلىستىق توتەنشە جاعدايلار دەپارتامەنتى راستاپ وتىر.
«ۆيدەودا ءتىلسىز جاۋدى اۋىزدىقتاپ بولعاننان كەيىن تىنىعىپ جاتقان №14 ءورت ءسوندىرۋ بولىمشەسى باستىعىنىڭ ورىنباسارى، ازاماتتىق قورعانىس اعا لەيتەنانتى ۇلان نۇرمۇحامبەت، جاساق كومانديرلەرى رينات ساعيدۋلدينوۆ، حافيز ساعييەۆ، نۇرلان جادالينوۆ جانە ءورت سوندىرۋشىلەر ديدار سارسەكوۆ، الماس تۇرسىنعالييەۆ، كاعىبات سىلامبەك»، - دەپ حابارلادى ۆەدومستۆو وكىلدەرى.
ەستەرىڭىزگە سالا كەتسەك، 10 -مامىردا شىعىس قازاقستانداعى ريددەر ورمان شارۋاشىلىعىندا الاپات ءورت شىققان. ورتتەن 1 ادام قازا تاۋىپ، ەكەۋى جاراقات العان. مەملەكەت باسشىسى ۇكىمەت پەن شىعىس قازاقستان وبلىسىنىڭ اكىمدىگى ءتىلسىز جاۋدان زارداپ شەككەن لەسحوز كەنتىنىڭ تۇرعىندارىنا كومەك كورسەتىپ، باسپانامەن قامتاماسىز ەتۋدى تاپسىردى. بۇگىن ساعات 18.20 ءورت اۋىزدىقتالدى.
اۆتور: تالعاتجان مۇحامەتبەك ۇلى