تانىمالى قازاق جازۋشىسىنىڭ قۇلپىتاسىن ۆاندالدار قيراتىپ كەتتى

سەمەي. قازاقپارات - سەمەي قالاسىنىڭ زيراتىندا عالىم قايىم مۇحامەدحانوۆتىڭ قۇلپىتاسىن بەلگىسىز بىرەۋلەر بۇزىپ كەتكەن، دەپ حابارلايدى قازاقپارات ءتىلشىسى.

قوعام قايراتكەرى، مەملەكەتتىك سىيلىقتىڭ يەگەرى قايىم مۇحامەدحانوۆتىڭ قۇلپىتاسى بيىل ءبىرىنشى رەت بۇزىلىپ وتىرعان جوق. عالىمنىڭ بەل بالاسى قاناعات قايىم ۇلىنىڭ ايتۋىنشا، وسىدان 10 جىلدام استام ۋاقىت بۇرىن بەلگىسىز بىرەۋلەر قۇلپىتاستى العاش رەت قيراتىپ كەتكەن.

«بيىل اكەمىزدىڭ 105 جىلدىعىندا دا بۇل قيانات قايتالانىپ وتىر. كۇنى كەشە تۋعان- تۋىستارمەن بىرگە زيارات جاساۋ ءۇشىن اكەمىزدىڭ باسىنا بارعان ەدىك. بۇزىلىپ، توز- توزى شىعىپ جاتقان قۇلپىتاستى كورگەندە جاعامىزدى ۇستادىق. بۇل دەگەن ماسقارا عوي! ەلى ءۇشىن ەڭبەك ەتكەن، ولە- ولگەنشە حالقىنىڭ قامىن جەگەن اكەمىزدىڭ ارۋاعىن قورلاۋ كىمگە كەرەك؟! ۆاندالداردىڭ ارەكەتىن وسىلاي بەي- جاي قالدىرۋعا بولمايدى. ولار باسقا قۇلپىتاستارعا ەش زاقىم كەلتىرمەي، تەك اكەمىزدىكىن عانا تالقانداپ كەتكەن، - دەدى ول.

وسى ماسەلەنى سەمەي قالاسىنىڭ اكىمدىگى بىردەن نازارعا العان.

«بۇگىن شاھار اكىمىنىڭ ورىنباسارى ايدار سادىربايەۆ بىزبەن بىرگە بەيىت باسىنا باردى. بۇزىلعان جەرلەرىن قاراپ، ماماندارعا تەكسەرتىپ، الداعى ۋاقىتتا جوندەۋ جۇمىستارى جۇرگىزىلەتىنىن جەتكىزدى. الداعى ۋاقىتتا مۇنداي جاعداي قايتالانباسا ەكەن دەيمىز»، - دەدى قاناعات قايىم ۇلى.

****

قايىم مۇحامەدحانوۆ (1916 - 2004) - عالىم، مەملەكەتتىك سىيلىقتىڭ يەگەرى (1996)، قازاق س س ر گيمنىنىڭ اۆتورى (1945)، سەمەي قالاسىندا ابايدىڭ مەملەكەتتىك مۋزەيىن ۇيىمداستىرۋشى (1940)، ابايدىڭ اقىندىق مەكتەبى مەن قازاقستانداعى تەكستولوگيا عىلىمى، شاكارىمتانۋ جانە الاشتانۋ عىلىمدارىنىڭ نەگىزىن قالاعان كورنەكتى عالىم، اقىن، جازۋشى - دراماتۋرگ، اۋدارماشى، ۇستاز، قوعام قايراتكەرى، 1000-نان اسا عىلىمي ەڭبەكتىڭ اۆتورى.

1940 -جىلدان باستاپ ك س ر و جازۋشىلار وداعىنىڭ مۇشەسى. ك س ر و جانە قازاق س س ر حالىق اعارتۋ ءىسىنىڭ ۇزدىگى، شىعىس قازاقستان وبلىسىنىڭ سەمەي، اياگوز قالالارى، جاڭاسەمەي جانە اباي اۋداندارىنىڭ قۇرمەتتى ازاماتى.

كوپتەگەن مارتەبەلى اتاقتار مەن ماراپاتتار يەگەرى: حالىقارالىق اباي اكادەمياسىنىڭ التىن مەدالىنىڭ يەگەرى (لوندون 1995)، قازاقستان جازۋشىلار وداعىنىڭ حالىقارالىق اباي سىيلىعىنىڭ ءبىرىنشى لاۋرەاتى (1996)، قازاقستان جازۋشىلار وداعىنىڭ حالىقارالىق «الاش» ادەبي سىيلىعىنىڭ ءبىرىنشى لاۋرەاتى (1996)، قازاقستان جۋرناليستەر وداعى سىيلىعىنىڭ لاۋرەاتى. ۋاق تايپاسىنىڭ شوعا رۋىنان شىققان.