د د س ۇ: ءۇندىستاندا شىققان كوروناۆيرۋستىڭ جاڭا شتامى وتە قاۋىپتى
مامانداردىڭ ايتۋىنشا، اۋرۋدىڭ بۇل ءتۇرى وزگەلەرگە قاراعاندا تەز تارايدى. بۇگىندە ءۇندىستاننىڭ وزىندە كوروناۆيرۋس ىندەتىنىڭ ۋشىعۋى شارىقتاۋ شەگىندە تۇر. ايماقتا تىركەلىپ جاتقان ءولىم- ءجىتىم كورسەتكىشى كۇن وتكەن سايىن ارتىپ بارادى. جەرگىلىكتى ب ا ق وكىلدەرىنىڭ حابارلاۋىنشا، كوز جۇمعانداردىڭ سانى رەسمي ستاتيستيكادان بىرنەشە ەسەگە ارتىق. ماماندار مايىتتەردى كرەماتسيالاۋعا ۇلگەرمەي جاتىر.
سوڭعى كەزدەرى ەلدىڭ سولتۇستىگىندەگى گانگا وزەنىنىڭ جاعالاۋىندا قازا تاپقان جۇزدەگەن ادامنىڭ ءمايىتى تابىلىپ جاتىر. جەرگىلىكتى تۇرعىندار ايماقتاعى جاعىمسىز يىسكە شاعىمدانا باستادى. اقپارات كوزدەرى ەلدەگى كرەماتسيا قۇنىنىڭ قىمباتتىعىنان حالىق مارقۇمداردىڭ دەنەسىن وزەنگە تاستاي بەرگەنىن حابارلايدى. وسى وقيعاعا قاتىستى پوليسيا تەرگەۋ ءىسىن باستاپ كەتتى. ەندى جەرگىلىكتى بيلىك تابىلعان مايىتتەردىڭ دەنەسى ءتيىستى تۇردە كرەماتسيالانىپ، جەرلەنەتىنىنە ۋادە بەردى.
www.24.kz