قازاقستاندىق وقۋشىلاردىڭ جىلقى كوڭىنەن قاعاز الۋ جوباسى حالىقارالىق بايقاۋدا جۇلدەگە ىلىكتى
نازاربايەۆ زياتكەرلىك مەكتەبىنىڭ باسپا ءسوز قىزمەتى ءمالىم ەتكەنىندەي، اتالمىش جارىستى 2007 -جىلدان بەرى تۇركيا ۇيىمداستىرىپ كەلەدى. ورالدىق جاس زەرتتەۋشىلەر تابيعي قوردى ساقتاۋ، قالدىقتى قايتا وڭدەۋ ماقساتىندا جىلقى كوڭىنەن قاعاز الۋ جولىن ۇسىندى. جىلقى كوڭىنىڭ نەگىزىنەن اعاش قۇرامىندا كەزدەسەتىن سەلليۋلوزادان تۇراتىنى بەلگىلى. باعالى جانە سۇرانىسقا يە ماتەريالداردى سينتەزدەۋ ءۇشىن تەك قانا جانۋاردىڭ قالدىعى، قاجەتتى اعاش ماسساسىن ءبولىپ الۋ ءۇشىن بىرنەشە حيميالىق زات قانا كەرەك ەكەن.
اۆتورلاردىڭ ايتۋىنشا، قالا تۇرعىندارى اراسىندا ساۋالناما جۇرگىزىلىپ، جوبانىڭ تەوريالىق جانە ەكسپەريمەنتتىك باعىتى تالدانعان. زەرتتەۋ جۇمىسى قازىلار القاسى مۇشەلەرىنىڭ ۇلكەن قىزىعۋشىلىعىن تۋدىردى، ويتكەنى بۇل جوبا وقۋشىلاردىڭ ەكولوگيالىق جانە ەكونوميكالىق ساۋاتتىلىعىمەن بايلانىستى، قاعاز جاساۋ تەحنولوگياسى، ونىڭ ورمان قورىنا اسەرى، بالامالى شيكىزاتتى قولدانۋ مۇمكىندىگى جانە قاعازدى ۇنەمدەۋ ماسەلەلەرى تۋرالى ءبىلىمدى بىرىكتىرەدى.
وسىعان وراي بايقاۋدىڭ قازىلار القاسى اديا مەن اسەمگە ارنايى سىيلىق - MILSET حالىقارالىق ءىس- شاراسىنا شاقىرۋ بەردى.
- قاعاز ۇلگىلەرىن الۋدا مەحانيكالىق ادىستەر قولدانىلدى، سوندىقتان ارنايى قاعازدى باستىرۋ قۇرالدارى مەن جەلىم، قوسپانىڭ كومەگىمەن ساپاسىن ءالى دە جاقسارتۋعا بولادى. ال مىنا ۇلگىنىڭ ساپاسى مايلىق پەن دارەتحانا قاعازدارى سيپاتتامالارى بويىنشا قاناعاتتانارلىق، - دەيدى اديا.
عىلىمي جوبانىڭ ناتيجەلەرى مەن قورىتىندىسى نەگىزىندە وقۋشىلار قاعازدى الۋ تەحنولوگياسى، ونىڭ اعاش رەسۋرستارىنا اسەرى، بالاما شيكىزاتتى قولدانۋ مۇكىندىكتەرى، قاعازدى ۇنەمدەۋ ماسەلەلەرى تۋرالى وقۋشىلاردىڭ ەكولوگيالىق، ەكونوميكالىق ساۋاتتىلىعىن ارتتىرۋ ماقساتىندا مەكتەپتەردە سىنىپتان تىس شارالاردى ءجيى وتكىزۋدى ۇسىنادى.
الداعى ۋاقىتتا جىلقى كوڭىنەن قاعازدى الۋ كەزەڭدەرىندە تولىقتىرعىشتار، جەلىمدەر ارقىلى ونىڭ قاسيەتتەرىن جاقسارتۋ، جىرتىلۋعا توزىمدىلىگى، زولدىگى، ىلعالدى ورتادا ءىسىنۋى (گيدروكەڭەيۋى)، وپتيكالىق قاسيەتتەرىن ستاندارتتى سىنامالار ارقىلى تەكسەرۋ كوزدەلۋدە. سونىمەن قاتار جىلقى كوڭىنەن الىنعان سەلليۋلوزانى ىدىراتۋ ارقىلى بيوگازدى الۋ جولىن زەرتتەۋ جانە ونىڭ ەكونوميكالىق ەسەبىن شىعارۋ دا كەلەر كۇننىڭ ەنشىسىندە. بۇل باعىتتاعى زەرتتەۋ بالامالى ەنەرگيا كوزىن الۋ ماسەلەسىنىڭ شەشىمىن تابۋعا مۇمكىندىك بەرەدى، سەبەبى مەتان بەنزينگە قاراعاندا، ەكولوگيالىق جاعىنان ءتيىمدى، ال سۋتەككە قاراعاندا، ەنەرگوتيىمدىلىگى ءۇش ەسە جوعارى جانە تاسىمالداعان كەزدە قاۋىپسىز.