جاڭا قاۋلى: اۋەجاي مەن تەمىرجول ۆوكزالىنا كىرۋ ءتارتىبى وزگەردى

نۇر- سۇلتان. قازاقپارات – ق ر كولىكتەگى باس سانيتار دارىگەرىنىڭ جاڭا قاۋلىسى شىقتى، دەپ حابارلايدى قازاقپارات ءتىلشىسى.

COVID-19 ىندەتىنە بايلانىستى «قىزىل» ايماققا جاتقىزىلعان وڭىرلەردە «Ashyq» جوباسىنا قاتىسپايتىن اۋەجايلارعا كۇتىپ الۋشىلار مەن شىعارىپ سالۋشىلاردىڭ كىرۋى شەكتەلەتىن بولدى. كولىكتەگى باس سانيتار دارىگەردىڭ جاڭا قاۋلىسىندا وسىنداي نورما قاراستىرىلعان.

«تاۋەكەلى جوعارى («قىزىل» ايماق) وڭىرلەردە، «Ashyq» جوباسىنا قاتىساتىن اۋەجايلاردى قوسپاعاندا، كۇتىپ الۋشىلار جانە شىعارىپ سالۋشىلاردى اۋەجايلار عيماراتتارىنا كىرگىزۋدى شەكتەۋ قامتاماسىز ەتىلسىن»، - دەپ جازىلعان قۇجاتتا.

تەمىرجول ۆوكزالدارىنا دا ءدال وسىنداي تالاپ قويىلىپ وتىر. « قىزىل» ايماقتاعى وڭىردە «Ashyq» جوباسىنا قاتىسپايتىن ۆوكزالداردىڭ بارلىعىندا كۇتىپ الۋشىلار مەن شىعارىپ سالۋشىلاردىڭ عيماراتقا كىرۋىنە تىيىم سالىندى.

قاۋلى قول قويىلعان ساتىنەن – 11 -مامىر، ساعات 20.15-تەن باستاپ كۇشىنە ەنەدى. ەسكە سالايىق، اۋەجاي عيماراتتارىنا جولاۋشىلار «Ashyq» قوسىمشاسى ارقىلى كىرگىزىلەتىنىن بۇعان دەيىن حابارلاعان بولاتىنبىز.