الماتىدا تاعى ءبىر ەمحانا ۆاكسيناتسيا پاسپورتىن ساتقانى تۋرالى اقپارات تارادى

الماتى. قازاقپارات - الماتىدا تاعى ءبىر ەمحانا قىزمەتكەرلەرى ۆاكسيناتسيا پاسپورتىن ساتىپ كەلگەنى تۋرالى اقپارات تارادى، دەپ حابارلايدى قازاقپارات ءتىلشىسى.

الەۋمەتتىك جەلى قولدانۋشىلارىنىڭ جازۋىنشا، 4№ قالالىق ەمحانادا مەديتسينا قىزمەتكەرلەرىنىڭ زاڭسىز ارەكەتتەرى انىقتالدى.

مەديتسينا ماماندارى ۆاكسينالاۋ تۋرالى جالعان پاسپورتتار ساتقان. ولاردىڭ قۇنى 15 مىڭ تەڭگە تۇراتىنى تۋرالى بولجام بار.

«مەديتسينا قىزمەتكەرلەرى، سونىڭ ىشىندە باس دارىگەرلەردىڭ مۇنداي ارەكەتى جاپپاي ۆاكسيناتسيا پروتسەسىن باسەڭدەتەدى. سەبەبى بۇل جاعدايدا ءدارى-دارمەكتەردى، جەكە قورعانىس قۇرالدارىن جانە مەديتسينالىق ماقساتتاعى بۇيىمداردى ساتىپ الۋدى جوسپارلاۋ بولىگىندە ستاتيستيكا وزگەرەدى. بۇل ستراتەگيانىڭ كەمشىلىكتەرىنە اكەلەدى. ول قازىردىڭ وزىندە ساياسي ماسەلە. ۆاكسينالاردى ساتىپ الۋعا بيۋجەتتەن كوپ قارجى بولىنەدى. بۇلاي پاسپورت ساتىلاتىن بولسا، سالىق تولەۋشىلەردىڭ اقشاسى بوسقا كەتەدى. بۇل الماتىداعى ءبىرىنشى جاعداي ەمەس ەكەنىن ەسكەرە وتىرىپ، مۇنداي جاعدايلاردىڭ اۋقىمى مەن جيىلىگىنە بولجام جاساۋعا بولادى»، - دەلىنگەن جازبادا.

الماتى قالاسى قوعامدىق دەنساۋلىق ساقتاۋ دەپارتامەنتى مەديتسينا قىزمەتكەرلەرىنىڭ زاڭسىز ارەكەتتەرىن قۇقىق قورعاۋ ورگاندارى تەكسەرىپ جاتقانىن حابارلادى.

«4№ ەمحانانىنىڭ مەديتسينا قىزمەتكەرلەرىنىڭ جالعان ۆاكسيناتسيا پاسپورتىن ساتۋ فاكتىسى بويىنشا ماتەريالدار قۇقىق قورعاۋ ورگاندارىنا بەرىلدى»، - دەپ حابارلادى قالالىق دەنساۋلىق ساقتاۋ باسقارماسىنان.

بۇعان دەيىن الماتىدا ۆاكسيناتسيادان وتكەنى تۋرالى ەلەكتروندىق پاسپورت ساتىلعانى تۋرالى اقپاراتقا وراي تاعى ءبىر ەمدەۋ مەكەمەسىندە تەكسەرىس باستالعان بولاتىن.