تۇركىستانداعى جاڭا مۋزىكالىق دراما تەاترىندا تۇركى الەمىنە ورتاق قويىلىمدار ساحنالانادى

None
None
تۇركىستان. قازاقپارات - تۇركىستاندا جاڭادان اشىلعان مۋزىكالىق دراما تەاتردا تۇركى الەمىنە ورتاق قويىلىمدار ساحنالانادى.

بۇل تۋرالى ەلباسى نۇرسۇلتان نازاربايەۆتىڭ تۇركىستان وبلىسىنا ساپارى بارىسىندا ايتىلدى، دەپ حابارلايدى قازاقپارات ءتىلشىسى.

تۇڭعىش پرەزيدەنت جاڭادان سالىنعان مۋزىكالىق دراما تەاتردىڭ اشىلۋ سالتاناتىنا قاتىسىپ، ۇجىممەن كەزدەستى.

كومپوزيتسيالىق كورىنىسى مەن ساۋلەتتىك كەلبەتى وزگەشە تەاتردا تەك قازاق اكتەرلەرى عانا ەمەس، شەتەلدىك تانىمال ونەر قايراتكەرلەرى دە ونەر كورسەتەدى.

ءتورت قاباتتى مادەنيەت ورداسىنىڭ كورەرمەندەر زالى 510 ادامعا ارنالعان. مۇندا ۆەستيبيۋلدىڭ، كۋلۋارلاردىڭ، فويەنىڭ، جيناقتاۋ حولدارى مەن VIP زالدار ۇلتتىق ناقىشپەن بەزەندىرىلگەن.

تەاتردا كورەرمەنگە جانە قىزمەتتىك پەرسونالعا شۇعىل مەديتسينالىق كومەك كورسەتەتىن دارىگەر دە قاراستىرىلعان. تەاتاردىڭ باس ديرەكتورى اينۇر كوپباساروۆانىڭ ايتۋىنشا، 190 ادام شتاتتىق رەجيمدە جۇمىس ىستەي الادى.

قازىر اكتەرلەردى جۇمىسقا قابىلداۋ ءجۇرىپ جاتىر. ولاردىڭ قاتارىندا دۋبايدا، ماسكەۋدە تاجىريبە جيناعان رەجيسسەرلەر مەن كومپوزيتورلار، مەنەدجەرلەر بار.

«سان عاسىرلىق تاريحى بار وسىنداي كيەلى ولكەدەگى ونەر ورداسى ەلباسىنىڭ باستاماسى، قولداۋىمەن سالىندى. بۇل ونەر ورتالىعىنىڭ ەرەكشەلىگى جانە كونتسەپتسياسى - پرەفورماتيۆتى تەاتر اتانۋىندا. ياعني، قازاقستاندىق قانا ەمەس، تۇركى الەمىنە ورتاق مەملەكەتتەردىڭ اكتەرلەرى دە كەلىسىمشارت نەگىزىندە وسىندا جۇمىس ىستەيدى. تەاترعا جاس باللەت ترۋپپاسى، حور، وپەرا ارتىستەرى، دراما اكتەرلەرىن كاستينگ ارقىلى الىپ جاتىرمىز. 25 جاسقا دەيىنگى جاس اكتەرلەردى وسىندا ءۇش جىلعا وقىتىپ، ءتۇرلى كۋرستار، قويىلمدار ارقىلى شەبەرلىگىن شىڭدايمىز. الىس-جاقىن شەتەلدەن، رەسپۋبليكانىڭ ءار وڭىرىنەن تالانتتى جاس رەجيسسەرلەر، سەنوگرافتار، حورەوگرافتار، اكتەرلەردى جيناپ جاتىرمىز. تالانتتى جاستاردىڭ ىشىندە «Belcanto» ۆەنا اكادەمياسىنىڭ تۇلەگى ايا ءشارىپ، تانىمال كومپوزيتور حاميت شانعالييەۆ، «Watanabe Buber» بالەت اكادەمياسىن، ۆاگانوۆا اتىنداعى ورىس بالەت اكادەمياسىن بىتىرگەن ماو ساكاي سىندى پريما- بالەرينالارىمىز بار. تەاتردىڭ العا قويعان جوسپارى كوپ»، - دەيدى اينۇر كوپباساروۆا.

جاڭا عيماراتتىڭ جالپى اۋدانى 11 مىڭ شارشى مەتردەن اسادى. تەاتر باسشىلىعىنىڭ مالىمەتىنشە، العاشقى قويىلىم 5 - قىركۇيەكتە كورەرمەن نازارىنا ۇسىنىلادى. وعان دەيىن ساحنانى بەزەندىرۋ، قاجەتتى قۇرال-جابدىقتارمەن قامتاماسىز ەتۋ جۇمىستارى جۇرگىزىلمەك.

سوڭعى جاڭالىقتار