20:57, 11 - مامىر 2021 | GMT +6
ق ر پرەزيدەنتى قازانداعى بالالاردىڭ قازاسىنا بايلانىستى ۆلاديمير پۋتينگە كوڭىل ايتتى
نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ قازان قالاسىنداعى گيمنازيادا رەسەيلىك وقۋشىلاردىڭ قازا تابۋىنا بايلانىستى رەسەي فەدەراتسياسىنىڭ پرەزيدەنتى ۆلاديمير پۋتينگە كوڭىل ايتتى.
قازاقپارات بۇل تۋرالى اقورداعا سىلتەمە جاساپ حابارلايدى.
«وسىناۋ قيىن-قىستاۋ ساتتە بالالارى قايتىس بولعان وتباسىلاردىڭ اۋىر قايعىسىنا ورتاقتاسىپ، كوڭىل ايتامىن»، - دەلىنگەن جەدەلحاتتا.
بۇعان دەيىن قايعىلى وقيعاعا بايلانىستى رەسەي باسشىسىنا كوڭىل ايتۋ جەدەلحاتىن ق ر تۇڭعىش پرەزيدەنتى-ەلباسى نۇرسۇلتان نازاربايەۆ جولدادى.
ەسكە سالا كەتەيىك، بۇگىن، 11 - مامىردا رەسەيدىڭ قازان قالاسىنداعى 175№ مەكتەپ-گيمنازيادا بەلگىسىز ەكى ادام وق جاۋدىرعان بولاتىن.
وقيعا سالدارىنان 8 ادام قازا تاۋىپ، 21 ادام اۋرۋحانالارعا جەتكىزىلگەن ەدى.
سوڭعى مالىمەت بويىنشا، قازا بولعاندار سانى 9 عا جەتتى. بۇل تۋرالى ەل پرەزيدەنتى رۋستام ميننيحانوۆ حابارلادى.
تاتارستاندا 12 - مامىر ازا تۇتۋ كۇنى بولىپ جاريالاندى.