ەلباسى «ازىرەت سۇلتان» تاريحي- مادەني قورىعى اۋماعىندا ورنالاسقان ەتنواۋىلعا باردى

تۇركىستان. قازاقپارات - قازاقستاننىڭ تۇڭعىش پرەزيدەنتى «ازىرەت سۇلتان» تاريحي- مادەني قورىعى اۋماعىندا ورنالاسقان ەتنواۋىلعا باردى.

بۇل تۋرالى ەلباسىنىڭ باسپا ءسوز حاتشىسى ايدوس ۇكىباي twitter- دەگى پاراقشاسىندا جازدى.

جاڭا نىسان 18- عاسىردان كورىنىس بەرەتىن كەشەن احمەت ياساۋي كەسەنەسىنىڭ جانىندا ورنالاسقان. ەتنواۋىل قازاق دالاسىنىڭ XVIII- XIX عاسىرداعى ءومىرىن بەينەلەيتىن جوبا سانالادى. «ازىرەت سۇلتان» مادەني قورىعىنىڭ بۋفەرلىك ايماعى مەن احمەت ياساۋي كەسەنەسىنىڭ بەكىنىس قابىرعاسى، ەتنوگرافيالىق مۇراجايدىڭ ورتاسىندا ورىن تەپكەن. ينتەراكتيۆتى ەتنو- اۋىلدىڭ اۋدانى 16 مىڭ شارشى مەتردى قۇرايدى.

كەسەنەگە كەلۋشىلەر قازاق حالقىنىڭ باي مادەنيەتىمەن تانىسىپ، ءتىپتى كونە زاتتاردى قولدارىمەن ۇستاي الادى. كوشپەدىلەر وركەنيەتىنەن كورىنىس بەرەتىن ەتنواۋىلدىڭ ايماعىندا قازاق دالاسىنداعى تۇتاس ءبىر ءداۋىر بەينەلەنگەن.

«ەتنواۋىل ارقىلى XVIII- XIX عاسىردىڭ اتوموسفەراسىن كورسەتتىك. گاسترونوميالىق ايماقتا ورتا ازيا ەلدەرىنە تيەسىلى اسپازدىق ونەردى كورۋگە بولادى. 7,8, 12 قاناتتى سىندى بارلىعى 9 ءتۇرلى ولشەمدەگى كيىز ۇيلەر مەن «حان سارايى» تىگىلگەن. اۋىل ماڭىندا جىلقىلاردىڭ «تابىن» مۇسىندىك كومپوزيتسياسى بەينەلەنگەن. ەجەلگى قۇدىق، ساداقشىلارعا ارنالعان اتىس تيرى دە قويىلعان. بىرنەشە ايماققا بولىنگەن اۋىلدىڭ جالپى كولەمى 3 گەكتار . جوبا ەتنوگرافتاردىڭ، تاريحشىلاردىڭ اقىل، كەڭەسى بويىنشا جاسالعان. بۇل جەردە بابالاردىڭ زامانىن تەك كورىپ قانا قويماي، تاماقتى اسپازدارمەن بىرگە ءپىسىرىپ، شەبەرلەرمەن بىرگە ءتۇيىن تۇيۋگە مۇمكىندىك بار. ءتۇرلى كورىنىستەر تۇسىرۋگە بولادى»، - دەدى جوبانىڭ ۇيىمداستىرۋشىسى ايكو توكەن.

ينتەراكتيۆتى رەجيمدە ەجەلگى ادەت- عۇرىپتار مەن داستۇرلەردى قالپىنا كەلتىرۋدى كوزدەيتىن ەتنومادەني ورتالىق جۇمىس ىستەيدى. كەلۋشىلەر ساۋدا بازارىن، ەجەلگى قۇدىق، قولونەر شەبەرحانالارى سىندى كونە كەزەڭنىڭ كورىنىستەرىن كوزبەن كورە الادى. باعزى زاماننىڭ ادىسىمەن اعاش وڭدەۋ، توقىما توقۋ جانە كيىز باسۋ، قىش، زەرگەرلىك شەبەرحانا، تاس قالاۋدىڭ قالاي جاسالاتىنىن دا ۇيرەنۋگە مۇمكىندىك بار.

اۆتور: اينۇر اقبايەۆا