ورازا ايت نامازى مەشىت اۋلالارىندا وقىلادى

نۇر- سۇلتان. قازاقپارات - ەلىمىزدىڭ بارلىق وڭىرىندەگى مەشىتتەردىڭ اۋلالارىندا ورازا ايت نامازى وقىلادى. بۇل جايىندا قازاقستان مۇسىلماندارى ءدىني باسقارماسىنان ءمالىم ەتتى، دەپ حابارلايدى قازاقپارات ءتىلشىسى.

«سىزدەرگە ەلىمىز بويىنشا مەشىتتەردىڭ اۋلالارىندا ورازا ايت نامازى وقىلاتىندىعىن (جەرگىلىكتى باس سانيتارلىق دارىگەرلەردىڭ قاۋلىسى بويىنشا رۇقسات ەتىلگەن) قۋانىشپەن جەتكىزەمىز. ەڭ باستىسى مەشىتكە كەلۋشى مۇسىلمان جاماعاتىن تومەندەگى ساقتىق شارالارعا ءمان بەرۋگە شاقىرامىز:

بەتپەردە (ماسكا) كيىپ كەلۋ؛

ۇيدەن دارەت الىپ كەلۋ؛

نامازدان سوڭ قول بەرىپ امانداسپاۋ؛

نامازدان كەيىن كوپ كىدىرمەي ۇيگە قايتۋ؛

جاماعاتپەن وقىلاتىن نامازعا باليعاتقا تولماعان بالالاردى الىپ كەلمەۋ. ناۋقاستار مەن ايەلدەردىڭ ايت نامازىنا قاتىسپاعانى ابزال»، - دەلىنگەن ءدىني باسقارما مالىمدەمەسىندە.

ق م د ب بارشا مۇسىلمان قاۋىمىن وسى جاعدايلارعا تۇسىنىستىكپەن قاراۋعا شاقىرادى.

«جۇقپالى ىندەتتى تاراتپاۋ ءۇشىن ءار ازامات ءوزىنىڭ وتباسى، قوعام الدىنداعى جاۋاپكەرشىلىگىن تەرەڭ سەزىنىپ، سانيتارلىق تالاپتار مەن مەشىت تارتىبىنە باعىنۋى قاجەت. بارشا جاماعاتتى ءوزى مەن وتباسىنىڭ، ەلىمىز بەن جەرىمىزدىڭ اماندىعى ءۇشىن جاراتقانعا دۇعا جاساۋعا ۇندەيمىز. اللا تاعالا جەر بەتىندەگى كۇللى ادامزاتتى ءتۇرلى اپاتتان ساقتاپ، جۇقپالى ىندەتتەن امان ەتكەي! ءامين!»، - دەپ اتاپ وتەدى ق م د ب- دان.

اۆتور: مارلان جيەمباي