الماتىلىق ۋنيۆەرسيتەت ءۇندىستاننان ستۋدەنتتەردى «جاسىرىن» اكەلمەك بولعان
بۇل تۋرالى ءماسليحات سەسسياسىندا قالا اكىمى باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.
اكىمنىڭ ايتۋىنشا، الماتىعا ستۋدەنتتەردى ج و و-لار اكەلگىسى كەلگەن، بۇل جوسپارلى ءىس- شارا بولعان.
«بىزدە بريتاندىق جانە وڭتۇستىك افريكالىق شتامم بار. ەندى، اللا ساقتاسىن، بىزگە ءۇندىستاندىق شتامم كەلمەسىن. جاقىندا بىزدە ءۇندىستاننان جوسپارلى تۇردە ستۋدەنتتەردى اكەلگىسى كەلگەندەر انىقتالدى. ول جاقتان ءبارى قاشىپ جاتىر. ال ءبىزدىڭ كەيبىر رەكتورلارىمىز ۋنيۆەرسيتەت تابىس تابۋى ءۇشىن ءۇندىستاننان ستۋدەنتتەردى شاقىرىپ ءجۇر. ولار بىزگە ءۇندى شتامىن اكەلەدى دەپ ويلاپ وتىرعان جوق. ەشكىمگە بىلدىرتپەي اكەلمەك بولعان، ءبىراق ءبىز ونى توقتاتتىق»، - دەدى الماتى اكىمى باقىتجان ساعىنتايەۆ.
سونىمەن قاتار، ول دەپۋتاتتار مەن مەكەمە باسشىلارىن حالىق اراسىندا ۆاكسيناتسيا بويىنشا ءتۇسىندىرۋ جۇمىسىن جۇرگىزۋگە شاقىردى.
اۆتور: الما مۇقانوۆا