الماتى وبلىسىندا پاراپلان جارىق باعاناسىنا سوعىلىپ، ەكى ادام اۋرۋحاناعا ءتۇستى - ۆيدەو

تالدىقورعان. قازاقپارات - الماتى وبلىسىندا پاراپلانمەن ۇشقاندار جارىق باعاناسىنا سوعىلىپ، ەكى ادام اۋرۋحاناعا ءتۇستى.

قازىر 50 جاستاعى ازاماتتىڭ جاعدايى وتە اۋىر، جانساقتاۋ بولىمىندە جاتىر، دەپ حابارلايدى قازاقپارات ءتىلشىسى.

وقىس وقيعانىڭ بارىسى ۆيدەوعا ءتۇسىپ قالعان.

«9-مامىر كۇنى شامالعان اۋىلىنىڭ جوعارعى بولىگىندە وكىنىشتى جاعداي بولدى. پاراپلانمەن ۇشقان دەمالۋشىلار اياق استى ۇيىتقىپ سوققان جەلدەن قۇرىلعىعا يە بولا الماي، جارىق باعاناسىنا سوعىلدى. پاراپلاندا بولعان ەكى ادامنىڭ ءبىرى قازىر اۋىر جاعدايدا جاتىر، ەكىنشىسى جەڭىل جاراقات العان. وسىعان وراي وكرۋگ تۇرعىندارى مەن قوناقتارىنان ءوز ومىرلەرىڭىز بەن دەنساۋلىقتارىڭىزعا قاۋىپ توندىرمەۋدى سۇرايمىز. تابيعات اياسىندا سەيىلدەۋگە شىعاردا اۋا رايى بولجامىنا نازار اۋدارىڭىزدار» دەپ جازىلعان الەۋمەتتىك جەلىدەگى جازبادا.

الماتى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى 1971 -جىلعى ازاماتتىڭ جاعدايى اۋىر ەكەنىن جەتكىزدى.

«9-مامىر كۇنى قاراساي اۋداندىق اۋرۋحاناسىنا پاراپلاننان قۇلاعان ەكى ادام ءتۇستى. 1971 -جىلى تۋعان ناۋقاستىڭ جاعدايى اۋىر. جانساقتاۋ بولىمىنە جاتقىزىلدى. بىرنەشە سۇيەگى سىنعان. باسىنان سوققى العان. ال 2004 -جىلعى ناۋقاس تراۆماتولوگيا بولىمىندە ەم قابىلداپ جاتىر. ميى شايقالعان. جاعدايى ورتاشا. ومىرتقاسى سىنعان» دەلىنگەن ۆەدومستۆونىڭ حابارلاماسىندا.

اۆتور: سامال قابىشەۆا