قازاقستاندا سوڭعى قوڭىراۋ قالاي وتەتىنى بەلگىلى بولدى

نۇر-سۇلتان. قازاقپارات - سوڭعى قوڭىراۋ اياسىندا مۇعالىمدەرگە سىيلىق الۋعا تىيىم سالىنعان.

بۇل تۋرالى ق ر ءبىلىم جانە عىلىم ۆيتسە-ءمينيسترى شولپان كارينوۆا ءمالىم ەتتى، دەپ حابارلايدى قازاقپارات ءتىلشىسى.

«سوڭعى قوڭىراۋ ادەتتەگىدەي 25-مامىردا وتكىزىلەدى. بيىلعى شەكتەۋ ءىس-شارالارى ەسكەرىلىپ، بىرنەشە فورمات ۇسىنىلماق. بىرىنشىدەن، ءداستۇرلى تۇردە اشىق تازا اۋادا 9- جانە 11-سىنىپ وقۋشىلارى ءۇشىن، سونداي-اق 300 گە دەيىن وقۋشىسى بار ءارى وسى ۋاقىتقا دەيىن شتاتتىق رەجيمدە وقىتىپ كەلە جاتقان مەكتەپتەر وتكىزە الادى. سونىمەن قاتار، ەكى نۇسقا ۇسىنىلىپ وتىر، ياعني سىنىپ ىشىندە نەمەسە ونلاين تۇردە وتكىزۋ قاراستىرىلعان. قاجەت دەپ ساناسا، سىنىپ ىشىندە وتكىزۋ نۇسقاسى ۇسىنىلادى. ال قاشىقتان وقىتىپ جاتقاندار ءۇشىن سوڭعى قوڭىراۋ مەرەكەسى ونلاين رەجيمدە بولادى»، - ش. كارينوۆا مينيسترلىكتىڭ اپپارات جينالىسىندا. مۇنىمەن قوسا ول وقۋ جىلىنىڭ اياقتالۋىنا بايلانىستى پەداگوگيكالىق قاعيداتتى ساقتاۋ ءۇشىن ءارتۇرلى سىيلىقتاردى الۋعا رۇقسات ەتىلمەيتىنىن ەسكە سالدى.

«جالپى، سوڭعى قوڭىراۋدى وتكىزۋدىڭ نەگىزگى ماقساتى - بارلىق مەكتەپ وقۋشىلارى ءۇشىن بەلگىلى ءبىر سىنىپتى اياقتاپ، كەلەسى سىنىپقا ءوتۋ جانە جازعى دەمالىستىڭ باستالۋى. ال مەكتەپ تۇلەكتەرى 9- جانە 11-سىنىپتار ءۇشىن مەكتەپ ءبىتىرۋ ءىس-شاراسى بولىپ سانالادى. اتاپ ايتقاندا، شتاتتىق رەجيمدە (سوڭعى قوڭىراۋ) وتكىزىلەتىن جاعدايدا بارلىق سانيتارلىق تالاپتاردىڭ قاتاڭ ساقتالۋىن مەكتەپ اكىمشىلىگى نازارعا الۋى ءتيىس. ءار وقۋشىمەن، ءار مەكتەپ بىتىرۋشىمەن كەلەتىن اتا- انانىڭ سانى بىردەن اسپاۋى كەرەك. مۇنىڭ ءوزى سانيتارلىق تالاپتاردى ساقتاۋعا مۇمكىندىك بەرەدى»، - دەدى ۆيتسە-مينيستر.

اۆتور: رۋسلان عابباسوۆ