ۋكراينا جەرىندە قازاق جاۋىنگەرىنىڭ سۇيەگى تابىلدى

نۇر-سۇلتان. قازاقپارات - ۇلى جەڭىستىڭ 76 جىلدىعى قارساڭىندا ۋكراين تاراپى دونەتسك وبلىسىنىڭ سلاۆيانسك جانە كراماتورسك اۋداندارىن ازات ەتۋ بارىسىندا قازا تاپقان قازاقستاندىق جاۋىنگەر ۇكەكباي بازاربايەۆتىڭ سۇيەگىن ۋكرايناداعى قازاقستان ەلشىلىگى جانىنداعى اسكەري اتتاشە نۇرجان وماروۆقا تابىستادى، دەپ حابارلايدى قازاقپارات ءتىلشىسى.

2020-جىلى «پلاتسدارم» اسكەري-تاريحي مۇرالاردى زەرتتەۋلەر قاۋىمداستىعى» قوعامدىق ۇيىمى دونەتسك وبلىسى اۋماعىندا سوعىس جۇرگەن ورىنداردان 110 كەڭەستىك اسكەري قىزمەتشىنىڭ سۇيەگىن تاپقان بولاتىن.

ولاردىڭ 8 ءى تابىلعان مەدالدار، كاپسۋلالار، قۇجات ۇزىندىلەرى ارقىلى اتى-جوندەرى انىقتالدى.

سەگىز جاۋىنگەردىڭ قاتارىندا انىقتالعانداردىڭ ءبىرى 1913-جىلى دۇنيەگە كەلگەن قازاق ۇكەكباي بازاربايەۆ بولىپ شىقتى.

ول 39-گۆارديالىق اتقىشتار ديۆيزياسىنىڭ 12-گۆارديالىق اتقىشتار پولكى ساپىندا سوعىسقا قاتىسقان.

ۇرىس بارىسىنداعى باتىلدىعى ءۇشىن «ەرلىگى ءۇشىن»، «ستالينگرادتى قورعاعانى ءۇشىن» مەدالدارىمەن ماراپاتتالعان.

قازاقستان ەلشىلىگى ۇكەكباي بازاربايەۆتىڭ سۇيەگىن اتامەكەنىندە قايتا جەرلەۋ ءۇشىن تۋىستارىنا جەتكىزەتىن بولادى.