ساۋل «كانەلو» گولوۆكينگە شارت قويدى

نۇر-سۇلتان. قازاقپارات - مەكسيكالىق بوكسشى ساۋل الۆارەس (55-1-2، 37 ك و) قازاقستاندىق گەننادي گولوۆكينگە شارت قويدى، دەپ حابارلايدى قازاقپارات Sports.kz سايتىنا سىلتەمە جاساپ.

سپورت سايتىنىڭ جازۋىنشا، گولوۆكين الۆارەسپەن ءۇشىنشى رەت كەزدەسكىسى كەلسە نەمەسە كوپتەن كۇتكەن تريلوگيانىڭ بولعانىن قالاسا، ول سۋپەر ورتا سالماققا كوتەرىلۋى كەرەك.

«مەن گولوۆكينمەن كەزدەسۋ ءۇشىن مىقتى بوكسشىلارمەن، كوپتەگەن چەمپيوندارمەن ايقاسقا شىقتىم، سالماعىمدى دا كوتەردىم. ال گولوۆكينگە نەگە سالماعىن كوتەرمەسكە؟» - دەيدى كانەلو.

ايتا كەتەيىك، گولوۆكيننىڭ «كانەلومەن» ءبىرىنشى جانە ەكىنشى كەزدەسۋلەرى ورتا سالماقتا ءوتتى.

ءبىرىنشى ايقاس ۇلكەن داۋ تۋدىرعانىمەن، تەڭ اياقتالدى دەپ شەشىلدى. ەكىنشى جەكپە-جەكتە تورەشىلەر جەڭىستى الۆارەسكە بەردى.

«كانەلو» ءۇشىنشى رەت كەزدەسۋ وتكىزۋ ماسەلەسىن دە قاراستىراتىنىن ايتتى. ول ءۇشىن گولوۆكين ءوزىنىڭ بارلىق چەمپيوندىق بەلدىكتەرىن 168 فۋنت سالماققا قويۋى كەرەك.