كوروناۆيرۋس: تۇركيا كۇزگە دەيىن ءوز ۆاكسيناسىن جاساپ شىعارادى

None
None
انكارا. انادولى-قازاقپارات - تۇركيادا جاسالىپ جاتقان كوروناۆيرۋسقا قارسى ۆاكسينا بيىل كۇزدە تولىق دايىن بولادى، دەپ حابارلايدى قازاقپارات انادولى اگەنتتىگىنە سىلتەمە جاساپ.

بۇل جايىندا تۇركيا پرەزيدەنتى رەجەپ تايىپ ەردوعان ارنايى بريفينگتە ايتتى.

«تۇركيادا كوروناۆيرۋس ينفەكسياسىنا قارسى وتاندىق ۆاكتسينا جاساۋ جۇمىسى بەلسەندى جالعاسىپ جاتىر. بيىلعى قىركۇيەك-قازان ايلارىنا دەيىن وسى جۇمىستىڭ ناتيجەسىن كورەمىز دەگەن نيەت بار» دەپ اتاپ ءوتتى تۇرىك كوشباسشىسى.

ونىڭ ايتۋىنشا، وتاندىق ۆاكسينا تۇركياداعى سۇرانىستى عانا جاۋىپ قويماي، باسقا ەلدەرگە دە تاراتىلادى.

«انكارا سۇرانىس جولداعان الەمنىڭ كەز كەلگەن ەلىنە ۆاكسينا جەتكىزۋگە دايىن» دەدى رەجەپ تايىپ ەردوعان.

تۇركيا پرەزيدەنتى بۇعان دەيىن رەسەي پرەزيدەنتى ۆلاديمير پۋتينمەن رەسەيلىك سپۋتنيك V ۆاكسيناسىن ساتىپ الۋ جايىن تالقىلاعان بولاتىن.

«بۇل جەردە اڭگىمە تۇركياعا جەتكىزىلەتىن ەكپەنىڭ وتە قوماقتى كولەمى جايىندا بولىپ وتىر. سوسىن ءبىز تۇركيادا بىرلەسكەن ونەركاسىپتى ىسكە قوسامىز» دەپ تۇيىندەدى ءسوزىن ەردوعان.

ەسكە سالا كەتەيىك، ءبىز بۇعان دەيىن تۇركيادا سپۋتنيك V ۆاكسيناسىنىڭ ءوندىرىسى ىسكە قوسىلاتىنىن جازعان بولاتىنبىز.

سوڭعى جاڭالىقتار