سوت ەلجان ءبىرتانوۆتى ءۇي قاماقتا ۇستاۋ مەرزىمىن تاعى ءبىر ايعا ۇزارتتى

نۇر-سۇلتان. قازاقپارات - نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى بۇرىنعى دەنساۋلىق ساقتاۋ ءمينيسترى ەلجان ءبىرتانوۆتى ءۇي قاماقتا ۇستاۋ مەرزىمىن ۇزارتۋ تۋرالى تەرگەۋ ورگانىنىڭ ءوتىنىشىن ءىشىنارا قاناعاتتاندىردى، دەپ حابارلايدى قازاقپارات ءتىلشىسى.

سوت شەشىمىن وقىعان سۋديا ايبەك ءابۋ ەكس-ءمينيستردىڭ تاعى ءبىر اي ءۇي قاماقتا بولاتىنىن ءمالىم ەتتى.

«اۋدانارالىق تەرگەۋ سوتى ءۇي قاماق مەرزىمىن 8 ايعا دەيىن - 2021-جىلدىڭ 14- ماۋسىمىنا دەيىن سوزۋ كەرەك دەپ سانايدى. سوت تەرگەۋ ورگانىنىڭ ءبىرتانوۆتى ءۇي قاماقتا ۇستاۋ مەرزىمىن 8 ايعا دەيىن ۇزارتۋ تۋرالى ءوتىنىشىن ءىشىنارا قاناعاتتاندىرۋ كەرەك دەگەن شەشىم شىعاردى. ە. ءبىرتانوۆقا مەديتسينالىق مەكەمەلەردەن باسقا نىساندارعا ۇيدەن شىعۋعا رۇقسات بەرمەۋ تۋرالى بولىگىن قاناعاتتاندىرۋدان باس تارتىلدى»، - دەدى سۋديا ايبەك ءابۋ.

ەسكە سالساق، كەشەگى وتكەن وتىرىستا پروكۋراتۋرا وكىلى ەلجان ءبىرتانوۆتى ءۇي قاماقتا ۇستاۋ مەرزىمىن ۇزارتۋدى سۇرادى. بۇرىنعى دەنساۋلىق ساقتاۋ ءمينيسترى ەلجان ءبىرتانوۆ بىلتىر ماۋسىم ايىندا قىزمەتىنەن بوساتىلعان. ال كۇزدە ەكس-مينيستر بيۋجەت قاراجاتىن ىسىراپ ەتتى دەگەن كۇدىكپەن قاماۋعا الىندى.

ەسكە سالساق، وتكەن ايدا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى بۇرىنعى مينيستر ەلجان ءبىرتانوۆتى ءۇي قاماقتا ۇستاۋ مەرزىمىن ۇزارتىپ، ءبىراق ۇيدەن شىعۋعا رۇقسات بەرگەن ەدى.

دەنساۋلىق ساقتاۋ ءمينيسترى الەكسەي سوي بريفينگىنىڭ بىرىندە بۇرىنعى ءمينيستردىڭ سوت بەرگەن مۇمكىندىكتى پايدالانىپ، كوممەرتسيالىق قۇرىلىمدا جۇمىس ىستەپ جۇرگەنىن ءمالىم ەتكەن.