قورعانىس مينيسترلىگىندە وتان قورعاۋشىلار كۇنى مەن جەڭىس كۇنىنە ارنالعان سالتاناتتى جيىن ءوتتى
قورعانىس ءمينيسترى گەنەرال-لەيتەنانت نۇرلان ەرمەكبايەۆ باستاعان قازاقستان رەسپۋبليكاسى قارۋلى كۇشتەرىنىڭ جوعارى باسشىلىق قۇرامى قىزمەتتىك بورىشىن اتقارۋ كەزىندە قازا تاپقان اسكەري قىزمەتشىلەردى ءبىر مينۋت ۇنسىزدىكپەن، «ماڭگى ەسىمىزدە» مونۋمەنتىنە گۇل شوقتارىن قويۋمەن ەسكە الدى.
جەكە قۇرام الدىندا سويلەگەن سوزىندە قورعانىس ۆەدومستۆوسىنىڭ باسشىسى اسكەري قىزمەتشىلەر جاۋىنگەرلىك ازىرلىكتىڭ جوعارى دەڭگەيىن ۇدايى قولداي وتىرىپ، وتان الدىنداعى كونستيتۋتسيالىق بورىشىن بەدەلدى ورىندايتىنىن اتاپ ءوتتى.
2020 وقۋ جىلىنىڭ وزىندە قارۋلى كۇشتەردە 60 مىڭنان استام مامان دايارلانىپ، 74 مىڭنان استام شارا، ونىڭ ىشىندە بريگادالىق تاكتيكالىق جانە كەمە وقۋ-جاتتىعۋلارى، تاجىريبەلىك اتىستارى، دالالىق شىعۋلار، ۇشۋ اۋىسىمدارى، سۇڭگۋىرلىك جاتتىعۋلار، پاراشيۋتپەن سەكىرۋلەر وتكىزىلدى.
گەنەرال-لەيتەنانت نۇرلان ەرمەكبايەۆ ق ر پرەزيدەنتى - قارۋلى كۇشتەردىڭ جوعارعى باس قولباسشىسى قاسىم-جومارت توقايەۆتىڭ اسكەرلەرگە باسشىلىق ەتۋ مەن ولاردى باسقارۋ، ولاردىڭ جوعارى جاۋىنگەرلىك ازىرلىگىن قولداۋ جانە مەملەكەتتىڭ قورعانىس قابىلەتىن قامتاماسىز ەتۋ ىسىندە قول جەتكىزگەن تابىستارعا جوعارى باعا بەرىلگەنىن ەرەكشە اتاپ ءوتتى.
جۋىردا اقوردادا مەملەكەت باسشىسى قورعانىس ءمينيسترىنىڭ ورىنباسارى رۋسلان شپەكبايەۆ پەن باس شتاب باستىعىنىڭ ءبىرىنشى ورىنباسارى مارات قۇسايىنوۆقا جوعارى وفيتسەرلەر قۇرامىنىڭ كەزەكتى «گەنەرال-لەيتەنانت» اسكەري اتاعىن تابىس ەتتى.
ال باس شتاب باستىعىنىڭ ورىنباسارى سەرىك بورامبايەۆ، «باتىس» جانە «استانا» وڭىرلىك قولباسشىلىقتارى اسكەرلەرىنىڭ قولباسشىلارى نۇرلان الدياروۆ پەن مەرەكە كۇشەكبايەۆ، «شىعىس» وڭىرلىك قولباسشىلىعى شتابىنىڭ باستىعى قۋانىشبەك ۇشتايەۆ، قارۋلى كۇشتەردىڭ تىل باستىعى الماز احماديەۆ «گەنەرال-مايور» اسكەري اتاعىن يەلەندى.
پرەزيدەنتتىڭ جارلىعىمەن قارۋلى كۇشتەردىڭ 23 اسكەري قىزمەتشىسى مەن ازاماتتىق پەرسونال وكىلدەرى مەملەكەتتىك ماراپاتقا لايىقتى دەپ تانىلدى.
- قارۋلى كۇشتەردىڭ بارلىق جەكە قۇرامىنىڭ قىزمەتىنە بەرىلگەن وسىنداي باعا بىزگە ۇلكەن جاۋاپكەرشىلىك جۇكتەيدى، - دەدى قورعانىس ءمينيسترى.
سالتاناتتى شارا سوڭىندا قورعانىس ءمينيسترى مەملەكەتتىك ناگرادالار مەن مەرزىمىنەن بۇرىن بەرىلگەن اسكەري اتاقتاردى تابىستادى.