كوروناۆيرۋستان كەيىنگى وڭالتۋ قانشا كەزەڭگە سوزىلادى

نۇر- سۇلتان. قازاقپارات - وڭالتۋ كومەگى جونىندەگى ۇلتتىق ۇيلەستىرۋشى، دارىگەر- رەابيليتولوگ ايگۇل حاسەنوۆا كوروناۆيرۋستان كەيىنگى ساۋىقتىرۋ قانشا كەزەڭگە سوزىلاتىنىن ايتتى، دەپ حابارلايدى قازاقپارات ءتىلشىسى.

«وڭالتۋدىڭ ءۇش كەزەڭى بار. ءبىرىنشى كەزەڭ - ادام ەندى اۋىرىپ، ەرتەرەك وڭالتۋ قاجەتتىلىگى. بۇل كەزەڭ نەگىزگى اۋرۋدى ەمدەۋ پروتسەسىن قامتيدى. ودان كەيىن كۇردەلى پروتسەسس بولىپ، ادام دەنساۋلىعى ءبىرشاما ناشارلاعان كەزدە وڭالتۋدىڭ ەكىنشى كەزەڭىنە كوشەدى. بۇل كەزەڭ اۋىرعان ساتتەن باستاپ 9 اي بويى جۇرەدى. اتالعان كەزەڭدە وڭالتۋدىڭ ەكىنشى كەزەڭىن وتكىزۋگە كەلىسىشارت جاسالعان ستايونارلاردا ناۋقاس تاۋلىك بويى بولادى»، - دەدى ول COVID-19-دان كەيىنگى وڭالتۋ ماسەلەلەرىنە ارنالعان ونلاين ءدارىس بارىسىندا.

ونىڭ ايتۋىنشا، مۇنان كەيىن پاتسيەنت وڭالتۋدىڭ ءۇشىنشى كەزەڭىنە تاپ بولادى. ال بۇل كەزەڭدەگى ساۋىقتىرۋ ەرەسەكتەر ءۇشىن جىلىنا 2 رەت، بالالار ءۇشىن 3 رەت ءوتۋى مۇمكىن.

«ارينە، بەيىندى ماماندارمەن بىرلەسە وتىرىپ باعا بەرەتىن، ساۋىقتىرۋ الەۋەتىن ايقىندايتىن مۋلتيديستسيپلينارلىق كوماندا دا بار. ويتكەنى، كەي ناۋقاستار وڭالتۋدىڭ ەكىنشى كەزەڭىنەن اتتاپ ءوتىپ، بىردەن ءۇشىنشى كەزەڭىنە ءتۇسىپ جاتادى»، - دەدى ايگۇل حاسەنوۆا.

اۆتور: مارلان جيەمباي