الەكسەي سوي ۆاكسينا العانداردىڭ نەلىكتەن قايتا اۋىرىپ قالعانىن ءتۇسىندىردى

نۇر-سۇلتان. قازاقپارات - ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا دەنساۋلىق ساقتاۋ ءمينيسترى الەكسەي سوي ۆاكسينا العانداردىڭ نەلىكتەن قايتا اۋىرىپ قالعانى تۋرالى سۇراققا جاۋاپ بەردى، دەپ حابارلايدى Egemen.kz.

قازاقستاندا كوروناۆيرۋس ۆاكسيناسىن العان ازاماتتاردىڭ تەك 0,02 پايىزى عانا ۆيرۋستا قايتا جۇقتىرىپ العان دەسەدى.

«جالپى العاندا، ۆاكسيناتسيا پروتسەسىنىڭ قازىرگى ۋاقىتتا وتە بەلسەندى ءجۇرىپ جاتقانىن كورىپ وتىرمىز. بۇگىندە ازاماتتارىمىز ۆاكسيناعا ۇلكەن سەنىم ارتا باستادى. ۆاكسينا العان ازاماتتاردىڭ ىشىندە تەك شامامەن 0,02 پايىزى عانا اۋىرىپ قالدى»، دەدى مينيستر.

ءمينيستردىڭ ايتۋىنشا، مۇنداي كورسەتكىش ۆاكسينانىڭ ءتيىمدى ەكەندىگىن كورسەتەدى.

«ول ايقىن كورىنىپ تۇر. ارينە، ۆاكسيناتسيالاۋدىڭ مۇنان ارعى قارقىنى دەنساۋلىق ساقتاۋ جۇيەسىنىڭ ۇيلەسىمدى جۇمىسىنا، سونىمەن قاتار ازاماتتاردىڭ تۇسىنىگىنە، جاقىندارى ءۇشىن دۇرىس تاڭداۋ جاساۋىنا جانە ۇجىمدىق يممۋنيتەتتىڭ دامۋىنا بايلانىستى ەكەندىگىن اتاپ وتكىم كەلەدى»، دەدى الەكسەي سوي.