الماتىلىق ازامات ەكپەدەن سوڭ قايتىس بولدى دەگەن كۇدىك بار

الماتى. قازاقپارات - الماتى قالالىق قوعامدىق دەنساۋلىق ساقتاۋ باسقارماسى ۆاكسينادان قايتىس بولدى دەلىنگەن الماتىلىققا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

ەر ادامنىڭ قايتىس بولعانى تۋرالى اقپارات الەۋمەتتىك جەلىدە تاراعان بولاتىن.

«الەۋمەتتىك جەلىلەردە الماتى تۇرعىنى باقىتجان نۇرتازيننىڭ ءولىمى جايلى اقپارات تاراۋدا. الماتى قالاسىنىڭ اكىمدىگى مارقۇمنىڭ تۋىستارىنا كوڭىل ايتادى. 1979 -جىلى تۋعان ب. نۇرتازين ەسىمدى ازامات بيىل 12-ءساۋىر كۇنى ەمحاناعا كوروناۆيرۋس ينفەكسياسىنا قارسى ۆاكسينانىڭ العاشقى دوزاسىن الۋ ءۇشىن جۇگىنگەن. ەكپە حاتتاماعا سايكەس ءوتتى. ەكپەدەن كەيىن ب. نۇرتازين 30 مينۋت بويى باقىلاۋدا بولعان، ەشقانداي شاعىم جاساماعان»، - دەپ حابارلادى قالالىق قوعامدىق دەنساۋلىق ساقتاۋ باسقارماسىنىڭ باسپا ءسوز قىزمەتى.

قايتىس بولعان 42 جاستاعى الماتىلىق 21 كۇننەن كەيىن ۆاكسينانىڭ ەكىنشى كومپونەنتىن العان. «دارىگەردىڭ قاراۋى كەزىندە جاعدايى قاناعاتتانارلىق بولعان، ەكپە پروتسەدۋراسىنان كەيىن 30 مينۋت باقىلاۋدا بولىپ، ب. نۇرتازين ۇيىنە كەتكەن. جاعدايى ۇيىندە ناشارلاعان. جەدەل جاردەم كەلگەنگە دەيىن قايتىس بولعان»، - دەپ اتاپ ءوتتى باسقارماداعىلار.

الدىن الا بولجامدارعا سايكەس، ول جەدەل جۇرەك-قانتامىر جەتىسپەۋشىلىگىنەن قايتىس بولعان. قازىر ناقتى سەبەپتەرىن انىقتاۋ ءۇشىن تەرگەۋ جۇرگىزىلىپ جاتىر، سوت-مەديتسينالىق ساراپتاما باستالدى. ناقتى دياگنوز گيستولوگيالىق زەرتتەۋدەن كەيىن بەلگىلى بولادى.

اۆتور: الما مۇقانوۆا