بۇگىن ەلورداداعى تەاتردىڭ ءبىر توپ ءارتىسى ۆاكسينا سالدىردى - فوتو
استاناداعى ابۋ- دابي پلازا ساۋدا ورتالىعىندا كوروناۆيرۋسقا قارسى ۆاكسينالاۋ جۇمىستارى ۇزدىكسىز ءجۇرىپ جاتىر. بۇگىن سولاردىڭ اراسىندا نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىنىڭ ۇجىمى دا بار. ونەر سالاسىنىڭ وكىلدەرىن تەاتر ديرەكتورى اسحات ماەميروۆ باستاپ كەلىپتى.
«بۇگىن ەرەكشە كۇن. نۇر- سۇلتان قالاسى اكىمدىگىنىڭ مۋزىكالىق جاس كورەرمەن تەاترىنداعى ارىپتەستەرىمىزبەن بىرگە ابۋ- دابي پلازا كەشەنىندە ۆاكسينا الدىق.
«سپۋتنيك V» دەگەن ۆاكسينانى الۋدى دۇرىس دەپ ۇيعاردىق. ءبىز كورەرمەندەرمەن تىكەلەي جۇمىس ىستەيمىز، حالىقتىڭ ورتاسىندا جۇرەمىز. سوندىقتان ارتىستەرگە، ونەر ادامدارىنا مىندەتتى تۇردە ساقتانۋ كەرەك»، - دەيدى تەاتر باسشىسى.
ول، سونداي-اق، «سپۋتنيك V» ۆاكسيناسىنىڭ تيىمدىلىگى تۋرالى دوستارى مەن ارىپتەستەرىنەن ەستىگەنىن ايتادى. سول اقپاراتتىڭ شىندىعىنا ءىس جۇزىندە كوز جەتكىزگەن تەاتر وكىلى قازاقستاندىقتاردى ۆاكسينا لاۋعا شاقىردى.
«قازىر عانا الىپ شىقتىم. ەشقانداي جان اۋىرتاتىنداي، ءتاندى اۋىرتاتىنداي اسەرىن بايقاعان جوقپىن. يزاريل، ا ق ش، ۇلى بريتانيا سياقتى وركەنيەتتى ەلدەردىڭ كوبى ۆاكسينا الۋدا العا شىعىپ جاتىر. ءوز كەزەگىندە مەن دە وتانداستارىمدى ۆاكسينا الۋعا شاقىرامىن. وتكەن عاسىرلاردىڭ باسىندا دا وسىنداي ىندەت تاراعان كەزدەر بولعان. سونىڭ ءبارىن ادامزات ءار ءتۇرلى ۆاكسينالاردى ويلاپ تاۋىپ، جەڭىپ وتىرعان. مەنىڭ ۇعىمىمدا پاندەميا كەزىندە ۇلتتى، ەلدى، مەملەكەتتى ساقتاۋدىڭ بىردەن-ءبىر جولى - ۆاكسينا الۋ. ءوزىم ءبىر جىل بۇرىن وسى كوروناۆيرۋسپەن قاتتى اۋىرىپ جازىلعانمىن. سوندىقتان، بيىل ەكىنشى رەت قايتالانباۋى ءۇشىن ەكىنشى رەت ەكپە سالدىرىپ جاتىرمىن»، - دەدى اسحات ماەميروۆ.
وسى تەاتردىڭ جەتەكشى اكتەرى، تانىمال كينو اكتەرى اسىلحان تولەپوۆ تە «سپۋتنيك V» ۆاكسيناسىن تاڭداعانىن ايتتى.
«بۇگىن مەن ءۇشىن راسىمەن ەرەكشە كۇن. ويتكەنى مەن ءوزىم تاڭداۋ جاساپ، ۆاكسينا الامىن دەگەن شەشىمگە كەلدىم. دەنساۋلىق كەرەك، كۇتىنۋ كەرەك. اينالامىزعا دا ءبىزدىڭ ءقاۋىپسىز بولعانىمىز قاجەت. ءاربىر ىسكە سىن ايتپاس بۇرىن، ءبىرىنشى ءوزىڭدى تۇزەۋ كەرەك قوي. وتباسى مۇشەلەرىنىڭ اراسىندا ەڭ ءبىرىنشى مەن باستاپ تۇرمىن. مامانداردان كەڭەس الدىم، ءبارىن ءتۇسىندىردى. جاڭا ەكپە سالعان ماماندار دا ۆاكسينادان كەيىن ءۇشى كۇن جۋىنباۋ كەرەك دەگەن سياقتى ەرەجەلەرىن ايتىپ جاتىر»، - دەيدى اكتەر.
اسىلحاننىڭ ويىنشا، ۆاكسينا الۋ تۋرالى شەشىمدى اركىم ءوزى قابىلداۋى كەرەك. ويتكەنى اقپارات نەعۇرلىم كوپ بولسا، ونىڭ وتىرىك- شىنىن ەكشەۋ دە سوعىرلىم قيىن.
«ازىرگە ۆاكسينانىڭ ەشقانداي كەرى اسەرىن سەزگەن جوقپىن. ەندى ەكىنشى دوزانى كۇتەۋ كەرەك. ءبىر جىل بۇرىن ءدام سەزبەي، كوروناۆيرۋستىڭ بەلگىلەرىن اعزامنان بايقاعان بولاتىنمىن. ۆاكسينا تۋرالى اقپارات كوپ قوي. ءتۇرلى ۆيدەو كەلىپ جاتادى. ونىڭ ءبارىن كورەتىن ۋاقىت تا جوق. بىرەۋدىڭ سوزىنە قاراپ شەشىم قابىلداۋعا بولمايدى دەپ ويلايمىن. سوندىقتان وزىمە ۆاكسينا الۋ كەرەك دەپ شەشتىم. ويتكەنى دەنساۋلىق كەرەك، ءوزىمىزدى دە، جاقىندارىمىزدى دا كۇتۋ د وسىدان باستالادى. بولاشاقتى ويلاۋ كەرەك. سول ءۇشىن ۆاكسينا الدىم»، دەپ تولىقتىردى اكتەر.
وسى تەاتردىڭ تاعى ءبىر اكتەرى ەرماحان ايماحان دا ۆاكسينا العان كەزدە ەشقانداي اۋىرسىنۋ سەزبەگەنىن ايتادى.
«اركىمگە دەنساۋلىق كەرەك. سوندىقتان ءوز ەركىمىزبەن العىزىپ جاتىرمىز. مەن دە وتباسىمدا ۆاكسينا العان ءبىرىنشى اداممىن. مەندە ۆاكسينا الۋىم كەرەك دەگەن وي بولدى. سول ويدى ىسكە اسىردىم. كۇماندانعان ساتتەر بولعان ەمەس. بارىمىزگە ءوز دەنساۋلىعىمىز ءۇشىن ۆاكسينا الۋ كەرەك دەپ ويلايمىن»، - دەيدى ەرماحان.
الماتىداعى ت. جۇرگەنوۆ اتىنداعى ونەر اكادەمياسىنىڭ ماگيسترانتى، ەلورداداعى مۋزىكالىق جاس كورەرمەن تەاترىندا رەجيسەردىڭ اسسيتەنتى رەتىندە تاجىريبە جيناقتاپ جۇرگەن مەكان جۇمابايەۆ ۆاكسينا اۋل تۋرالى كوپتەن بەرى ويلاپ جۇرسە دە، بۇعان دەيىن ۋاقىتى بولماعانىن ايتادى.
«ۆاكسينا الۋعا قاشان ۋاقىت شىعار ەكەن دەپ كۇتىپ جۇرگەنىمە ءبىراز بولدى. بۇگىن ءساتى كەلىپتى. ۇجىمداعى ارىپتەستەرىممەن بىرگە كەلگەنىمىز دە دۇرىس بولعان سياقتى. ەشقانداي اسەر بايقاعان جوقپىن. قالىپتى جاعدايداعىداي سەزىمدەمىن. ويتكەنى ىشتەي دايىن بولىپ كەلدىم. مەملەكەت ءوز حالقىنا ەشقاشان جاماندىق جاسامايتىنىن بىلەمىز عوي. مىنانداي كۇردەلى كەزەڭلە تارتىپكە باعىنۋىمىز كەرەك. ءتۇرلى ۆيدەولار شىعىپتى دەپ ەستيمىن. سونىڭ كوبى مەنى اينالىپ وتكەن سياقتى. سوعان قاراعاندا كوڭىلىندە كۇدىگى بار ادامدار سونداي اقپاراتتاردى وزدەرى ىزدەپ تاباتىن سياقتى عوي. ونداي شىققان جەرى بەلگىسىز دۇنيەلەرگە اسا ءمان بەرمەيمىن. كوروناۆيرۋسپەن ءوزى اۋىرماساما دا، جاقىندارىم، تانىستارىم اۋىردى. ىشىندە دۇنيەدەن ءوتىپ كەتكەندەرى دە بار»، - دەيدى جاس مامان.
اۆتور: ەسىمجان ناقتىباي