ق ر پارلامەنتى اۋدان اكىمدەرىن سايلاۋ بويىنشا زاڭ جوباسىن ماقۇلدادى

نۇر-سۇلتان. قازاقپارات - ق ر پارلامەنتى ماجىلىسىندە پرەزيدەنت باستامالىق ەتكەن اۋدان اكىمدەرىن سايلاۋ ۇسىنىسى ماقۇلداندى، دەپ حابارلايدى قازاقپارات.

ق ر ۇلتتىق ەكونوميكا ءمينيسترى اسەت ەرعاليەۆ «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» ق ر كونستيتۋتسيالىق زاڭى جوباسىن تانىستىردى.

«مەملەكەت باسشىسىنىڭ وتكەن جىلعى 1-قىركۇيەكتەگى جولداۋىنداعى تاپسىرماسىن ىسكە اسىرۋ بارىسىندا ەلىمىزدىڭ اۋداندىق ماڭىزى بار قالالاردىڭ، اۋىلداردىڭ، كەنتتەردىڭ، اۋىلدىق وكرۋگتەردىڭ اكىمدەرىن تىكەلەي سايلاۋىن ەنگىزۋ ماسەلەلەرى بويىنشا زاڭ جوبالارى ازىرلەندى. نەگىزگى زاڭ جوباسىندا «سايلاۋ تۋرالى» كونستيتۋتسيالىق زاڭعا وزگەرىستەر ەنگىزىلۋ كوزدەلىپ وتىر»، - دەدى ۇلتتىق ەكونوميكا ءمينيسترى ءماجىلىستىڭ جالپى وتىرىسىندا.

ونىڭ ايتۋىنشا، قازىر ەلىمىزدە 2345 اكىمشىلىك- اۋماقتىق بىرلىك بار. ونى ىشىندە، بيىلعى ەكىنشى جارتىجىلدىقتا 836 اكىم تىكەلەي داۋىس بەرۋ ارقىلى سايلاناتىن بولادى.

«ق ر مەملەكەتتىك قىزمەت تۋرالى زاڭناماسىنا سايكەس، بىلىكتىلىك تالاپتارىنا ساي كەلگەن جانە 25 جاسقا تولعان ەلىمىزدىڭ كەز كەلگەن ازاماتى سايلانا الادى. سونداي- اق، ساياسي پارتيا مۇشەلەرى جانە سايلاۋشىلاردىڭ جالپى سانىنىڭ كەمىندە %1 پايىزىنا قول جيناعان كانديداتتار سايلاۋعا تۇسە الادى. بۇل رەتتە، اۋدان اكىمىنىڭ، ەگەر كانديداتتار بولماعان نە بىرەۋى عانا ۇسىنىلعان جاعدايدا، ەكى نە ءبىر كانديداتى ۇسىنۋعا قۇقىعى بار»، - دەيدى ءا. ەرعاليەۆ. زاڭ جوباسىندا بارلىق كانديداتتار ءۇشىن ەڭ تومەنگى جالاقى مولشەرىندە سايلاۋ جارناسىن ەنگىزۋ كوزدەلگەن.

«سايلاۋ 40 كۇن بۇرىن جاريالانادى، ال سايلاۋدىڭ ءوزى قازىرگى اكىمنىڭ وكىلەتتىك مەرزىمى اياقتالعانعا دەيىن 10 كۇن بۇرىن وتەدى. سايلاۋ وتكىزىلگەننەن كەيىن ءۇش كۇن ىشىندە قورىتىندى شىعارىلادى. ءوز كەزەگىندە سايلانعان اكىم جۇرگىزىپ جاتقان جۇمىسى ءۇشىن حالىققا ەسەپ بەرەدى»، - دەدى اسەت ەرعاليەۆ. كونستيتۋتسيالىق زاڭ جوباسىن ءماجىلىستىڭ جالپى وتىرىسىنا قاتىسىپ وتىرعان 95 دەپۋتاتتىڭ بارلىعى ماقۇلدادى.