اقمولا وبلىسىنىڭ پوليتسەيلەرى ۇرلانعان جۇك كولىگىن ءبىر ساعات بويى قۋدى

None
None
كوكشەتاۋ. قازاقپارات - اقمولا پوليتسەيلەرى جۇك كولىگىن ايداپ اكەتكەن 25 جاستاعى اقمولالىقتى قۋۋعا ءماجبۇر بولدى، دەپ حابارلايدى قازاقپارات ءتىلشىسى وبلىستىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، مامىردىڭ 3 ىندە تاڭەرتەڭ كوكشەتاۋ قالاسى پوليتسيا باسقارماسىنىڭ كەزەكشى بولىمىنە كراسنويار اۋىلىنىڭ تۇرعىنى جۇك كولىگىن بەلگىسىز بىرەۋدىڭ ايداپ اكەتكەنىن ايتىپ كومەك سۇراعان. كولىك يەسىنە كەلتىرىلگەن شىعىن كولەمى 500000 تەڭگەنى قۇرادى. «پوليتسيا قىزمەتكەرلەرى قىلمىستىڭ تۇندە جاسالعانىن انىقتادى. كۇدىكتى ءۇيدىڭ جانىندا تۇرعان «زيل» ماركالى اۆتوكولىگىن ايداپ اكەتكەن. پاترۋلدىك پوليتسيا جانە جەرگىلىكتى اتقارۋ ورگاندارىنىڭ قىزمەتكەرلەرى جەدەل ىزدەستىرۋ شاراسى بارىسىندا بەينەباقىلاۋ كامەراسى ارقىلى كولىكتى انىقتادى. كۇدىكتى قۋدالاۋ كەزىندە كولىكتى توقتاتۋ تۋرالى زاڭدى تالاپتى ورىندامادى»، - دەدى ۆەدومستۆودان.

بىرنەشە ساعاتتان كەيىن «اسكەر-1» پاترۋلدىك پوليتسياسى ەكيپاجىنىڭ قىزمەتكەرلەرى لەيتەنانت دارحان بوپيەۆ پەن لەيتەنانت ولجاس تىلەۋوۆ «رۋزايەۆكا - كوكشەتاۋ» اۆتوجولىنىڭ 3-شاقىرىمىندا ۇرلانعان كولىكتى توقتاتتى. كولىك ىشىندە 25 جاستاعى قاسكۇنەمنەن بولەك، ونىڭ اناسى بولعان.

«قازىرگى كەزدە وسى جاعدايعا بايلانىستى قىلمىستىق كودەكستىڭ 200-بابىنىڭ 1-بولىگى «اۆتوموبيلدى زاڭسىز يەلەنۋ» بويىنشا سوتقا دەيىنگى تەرگەۋ باستالدى. سونداي-اق ماس كۇيىندە كولىك قۇرالىن جۇرگىزگەنى جانە پوليتسيا قىزمەتكەرىنىڭ تالاپتارىن ورىنداماعانى ءۇشىن اكىمشىلىك حاتتامالار تولتىرىلدى»، - دەپ تولىقتىردى ۆەدومستۆودان.

اۆتور: اسلان وسپانوۆ

سوڭعى جاڭالىقتار