اسكەردەن قاشىپ كەتكەن جىگىت پاۆلودارلىق فۋتبولشى بولىپ شىقتى
رۇستەم نازىمبەكوۆ 20 جاستا. ول 2018-جىلى «اقسۋ» فۋتبول كومانداسىنىڭ قۇرامىندا ويناعان، 2019-جىلى «ەكىباستۇز» ف ك- عا اۋىسقان، ءبىراق بەلگىلى ءبىر سەبەپتەرمەن شىعىپ كەتكەن.
«ونىڭ بالاسى بار، ونى قالاي اسكەرگە العانىن بىلمەيمىز. ءبىزدىڭ كوماندادا وينامايتىنىنا ەكى جىل بولدى. ويىنشى رەتىندە بولاشاعى بار ەدى، سپورتقا بەيىمى جاقسى بولعان، ودان جاقسى كاسىبي فۋتبولشى شىعار ەدى. جىگىت ەرتە ۇيلەندى. كوماندادان كەتىپ بارا جاتقاندا وتباسى جاعدايىنا بايلانىستى ەكەنىن ايتقان»، - دەدى «ەكىباستۇز» فۋتبول كلۋبىنداعىلار.
سونداي-اق، جىگىتتىڭ دوستارى ول سابىرلى، ءتارتىپتى بولعانىن اتاپ ءوتتى.
ال قاشىپ كەتكەن ەكىنشى جىگىت، 23 جاستاعى مۇحامەدكارىم قۇلنيازوۆتىڭ تۋىستارى ق ر اسكەري پروكۋراتۋراسى مەن قورعانىس مينيسترلىگىنە شاعىم دايىنداپ جاتىر.
جىگىتتىڭ اناسى گۇلميرا قۇلنيازوۆانىڭ ايتۋىنشا، 26- ساۋىردە بالاسى ەكىباستۇز اسكەري كوميسسارياتىنا قۇجاتقا بەلگى قويۋ ءۇشىن ءوزى بارعان. بۇعان دەيىن جىگىت ءبىرقاتار سوزىلمالى اۋرۋ مەن سالماق جەتىسپەۋىنە بايلانىستى اسكەرگە شاقىرۋى كەيىنگە قالدىرىلعان ەكەن.
«سول كۇنى ۇلىمدى شاقىرۋ قاعازىنسىز، ەسكەرتۋسىز اۆتوبۋسقا وتىرعىزىپ پاۆلودارعا الىپ كەتتى. كازارماعا قونىستاندىرىپ، مەديتسينالىق كوميسسيادان وتكىزدى، ءبىراق ناتيجەلەرىن حابارلامادى. ۇلىمنىڭ سوزىنشە، اسكەري كوميتەتتىڭ قىزمەتكەرلەرى ولارعا جارامسىز بولساڭ دا، اسكەرگە باراتىنىن ايتقان. ءبىر اپتا بويى بالام كازارمادا بولدى. ول قانداي دا ءبىر قىسىم كورمەسە، ەشقاشان ءۇشىنشى قاباتتىڭ تەرەزەسىنەن سەكىرمەس ەدى»، - دەيدى ول.
ايەلدىڭ ايتۋىنشا، ۇلى شاقىرۋدان جالتارعان جوق جانە جاسىرىنبادى. ول ەكىباستۇزدا بانكتە مەنەدجەر بولىپ جۇمىس ىستەپتى.
«مەنىڭ ويىمشا، اسكەري كوميسساريات تاراپىنان ۇلكەن زاڭبۇزۋشىلىقتار مەن قىسىم جاسالدى، ايتپەسە ولاردىڭ ەشقايسى قاشۋعا اسىقپاس ەدى. سول كۇنى تاعى بىرنەشە جىگىت قاشىپ كەتۋگە تىرىستى دەيدى، ءبىراق ۆيدەوعا مەنىڭ ۇلىم مەن تاعى ءبىر جىگىت ءتۇسىپ قالعان»، - دەيدى ايەل.
جىگىتتىڭ اناسى قازىر بالاسى اۋرۋحانادا جاتقانىن ايتتى.
ەسكە سالايىق، جەلىدە پاۆلودار اسكەري كوميسسارياتىنىڭ ءۇشىنشى قاباتىنان سەكىرىپ كەتكەن ەكى جىگىتتىڭ ۆيدەوسى تاراعان بولاتىن. كەيىن قورعانىس مينيسترلىگى ولار مەرزىمدى اسكەري قىزمەتكە شاقىرىلعانىن جانە قىزمەتتەن بوساتۋ ءۇشىن زاڭدى نەگىز بولماعانىن مالىمدەدى.
ق ك- ءنىڭ 387-بابى بويىنشا قىلمىستىق ءىس قوزعالدى. بۇل باپ ءبىر مىڭ ايلىق ەسەپتىك كورسەتكىشكە دەيىنگى مولشەردە ايىپپۇلدى (2 ميلليون 917 مىڭ تەڭگە)، نە سول مولشەردە تۇزەۋ جۇمىستارىن نەمەسە ءتورت ءجۇز ساعاتقا دەيىنگى مەرزىمگە قوعامدىق جۇمىستارعا تارتۋدى ءيا ءبىر جىلعا دەيىن باس بوستاندىعىن شەكتەۋدى، نە سول مەرزىمگە باس بوستاندىعىنان ايىرۋدى كوزدەيدى.